olinhk

[olinhk]

星期四催至有：牛津大學推測 2040年最吃香工作

2040年你會喺邊？相信早已退休印印腳啦（希望係！）不過如果閣下有子女，會唔會想知到嗰陣佢哋做緊咩工？2040年仲會唔會有Startup，定還是大量工作已經被AI取代咗？定還是人類已經唔存在？近日英國牛津大學就推測，2030年時80%工種都會係目前無嘅新工種，仲話2040時呢類新工種將會發展良好，推測以下幾種係最吃香最搶手嘅工作咁話：

網上商店經理

推測2040年時，大部人買嘢已經唔會再去實體店，而係上網，而網上商店嘅技術已經可以令客人係電腦前已經感受到色香味、質感、甚至大細等嘅概念，就必須實網上商店經理嘅幫忙安排。

機械人操作師

2040年好多工作會交畀機械人負責，但佢哋未可以完全無須人類幫忙之下獨立完成工作，操作人員要靠觀察實際情況輸入各種指令，即係話機械人只係負責做，諗嘅依然係人類。

無人機導航員

目前已前係無人機當道，去到2040年更加係無人機多過車，類似現今道路上嘅交通督導員，無人機到時都要有人負責指揮交通、決定航道，好似目前嘅飛機一樣，以免碰撞。

催至有：80後港女OL一名，每日返工即係扮工，熟讀辦公室生存之道，最愛煲韓劇，返工奉行三大宗旨：拖、推、御。

#催至有 #office #column

[olinhk]

星期二催至有：畫漫畫有發達 Marvel員工搵幾多錢？

戲院近幾年嘅戲呢，大家唔知有無留意，不斷都Keep住有超級英雄嘅電影上，上到你見到都忍唔住講「又嚟呀？」「唔係拍過咩？」正係因為票房收得，加上其他收入，令片商樂此不疲不斷拍；當然要數最大嘅漫畫公司，就係Marvel同DC，相信都無咩人有異議。近日有外國傳媒就披露咗當中職員從畫師至老闆嘅人工，不妨做過參考：

編輯

漫畫公司中嘅編輯負責校對文字之外，亦會對齊對白同漫畫格唔會配錯，同時連故事嘅論述邏輯都要幫手檢查。Marvel嘅助理編輯年薪約為$40,000美金；DC嘅高級編輯就高達$84,000！

畫家

大家可能有所不知，其實呢類漫畫書一本之中係多位畫師負責，而畫師每人只會畫到4至10頁，佢哋嘅人工都係按頁支持，而非月薪，新畫師約$200美金10頁，但去到資深畫師，行業龍頭的話，成$600一頁！

草稿員：$160-$260美金每頁

填墨員：$75-$100美金每頁

上色員：$20-$121美金每頁

作者

最後當然要講到作者，Marvel嘅大佬Stan Lee，個人身家有4千萬美金；至於《The Walking Dead》嘅作者Robert Kirkman都有成2千萬美金！

催至有：80後港女OL一名，每日返工即係扮工，熟讀辦公室生存之道，最愛煲韓劇，返工奉行三大宗旨：拖、推、御。

#催至有 #office #column

[olinhk]

星期一催至有：唔食早餐損傷仲大過長期玩電話？

宜家個個都做低頭族，返工放工搭車行街食飯有邊個唔會拎住個電話吖？偏偏矛盾嘅係，大人一面做低頭族，一面又擔心小朋友會變低頭族，幾諷刺呢？一項調查指，小朋友每日平均會對住個Mon 263分鐘；年輕人仲厲害，有391分鐘。至於成年人有71%受訪者都覺得玩手機、平板電腦會對8至11歲嘅發育有影響，咁事實上有無實質證據支持先？近日英國牛津大學聯同卡迪夫城大學有一個研究出咗，好有聲地顯示，原來年輕人唔係過度沉迷，其實做低頭族，唔及唔食早餐或者唔夠瞓嘅害處大！

調查話99.9% 15歲嘅受訪者每日都會接觸電子科技，手機、平板、電腦、打機等等，但佢哋使用呢啲裝置時係會得到明顯嘅快樂，對身心其實係有益，而對身體嘅損害就要睇佢哋有無用過咗一個臨界點，變成過份沉迷。雖然好多時係因人而異，但調查機構就提供咗參考，臨界點就係4個鐘；因為玩4個鐘嘅年輕人，如果嗰日多玩咗1個鐘，該日嘅身心戕態明顯轉差，所以條線就係4個鐘，記住喇！

催至有：80後港女OL一名，每日返工即係扮工，熟讀辦公室生存之道，最愛煲韓劇，返工奉行三大宗旨：拖、推、御。

#催至有 #office #column

[olinhk]

星期五催至有：港資大公司定美資細公司 網民點揀好

過完年又到轉工潮，唔少人都拎完Bonus準備走人喇！近日討論區有人出帖，希望各位畀意見，就係點揀好喇。呢位樓主轉工，話得到兩個Offer，一個係香港本地公司，人工高，但要返5日半，仲得12日大假，而且講明要經常返大陸做嘢；另一間係美資公司香港分部，比較細，得20人，但返5日，有15日大假，但人工少$5,000 ；不過唔使出差之餘，仲話明好Free，唔多要OT。網民雖然話美資公司少$5,000 ，但都一面倒叫樓主揀美資公司，究竟美資公司有咩咁吸引？ 講規矩 美國公司好多大小事都有規有距，跟足程序去做，對員工嚟講，更覺公平唔會覺得公司用人唯親，或者係講人事多過實力。 生活質素 愈嚟愈講求Work Life Balance，美資公司比香港多3日大假，加上只返5日；而且美國假期時，例如聖誕、感恩節，香港就無嘢要做。 無階級觀念 外國人多數唔會太重視階級觀念，而且員工好講求公平、自由；好多時可以同老細盡訴心中情，相反，香港公司傳統就係「以錢買命」，用人用到盡！ 催至有：80後港女OL一名，每日返工即係扮工，熟讀辦公室生存之道，最愛煲韓劇，返工奉行三大宗旨：拖、推、卸。

#催至有 #office #column

[olinhk]

星期四催至有：高層自認做得差要問責 自罰100萬

大家出咗嚟做嘢都知，每間公司基本上都係肥上瘦下，一方面話公司生意唔好加唔到太多人工，一方面公司高層嚿花紅就大到嚇親人；另一方面，公司所有問題都會責難係中層問題，唔少攬到自己上身，更加唔會講咩問唔問責，甚至會炒人去頂去孭飛，都已經係職場規則啦。不過國內公司華為偏偏另走一條路，繼當年起草《華為基本法》，提到高層必須負責，公司一直都係使用問責制。最近，華為首席領導任正非，仲向員工出聲明，話因為公司近排有問題有意外，因此全體高層一律罰錢，任正非就首先自罰100萬，其餘各高層分別罰50萬不等！ 華為仲有唔少令其他公司高層汗顏嘅舉動，例如將中層職員降級，好多上咗軌道嘅大公司，有唔少身為中層管理階級人士都會進入一個做又36唔做36嘅Hea底局面。任正非就好憎呢類人，公司經常會將表現唔稱職嘅員工降級，做到賞罰分明。網民就大讚任正非處理好，為基層員工出一口員，唔會有錯就員工錯，有獎就老細分。大家又點睇？ 催至有：80後港女OL一名，每日返工即係扮工，熟讀辦公室生存之道，最愛煲韓劇，返工奉行三大宗旨：拖、推、卸。

#催至有 #office #column

[olinhk]

星期三催至有：工作時間做義工 不如我直接捐一日人工啦

唔少公司目前都要講社會責任，有時更加係為名聲，一定會安排公司員工做義工，通常係抽一日工作時間，等員工去做義工。但其實呢種做���，有唔少資深HR都話，呢種做法其法極為「愚蠢」。點解咁講呢？原來「人嘅時間就係金錢，尤其愈高人工人士，每個鐘嘅錢就更高。如果一個人一日搵1,000蚊，做一日義工，等如無咗1,000蚊，等做義工幫助嘅可能只係探下公公、婆婆，餵下流浪貓狗，其實成本根本就唔值1,000 ；如此一來，對社會係等如資源流失。」

換句話講，最直接嘅做法，係應該由員工繼續返工，而當日嘅人工直接捐助該慈善機構，然後慈善機構再用呢啲錢去請人工作，如此一來又付合經濟原則，又用人唯才，無浪費人力資源。嗱！不過呢個從宏觀角度講咋，如果從各員工自身角度出發，啋你都傻啦，做一日義工，只係自己無咗一日工作時間，但捐一日人工，就係直接無咗一嚿錢。咁你哋又會點揀喇？

催至有：80後港女OL一名，每日返工即係扮工，熟讀辦公室生存之道，最愛煲韓劇，返工奉行三大宗旨：拖、推、卸。

#催至有 #office #column

[olinhk]

星期二催至有：2018加薪幅度排名 Top10

踏入2018年兩個月喇，過完年相信大家都已經收咗Bonus/雙糧過肥年啦！除咗呢樣，最多人關心應該係今年人工加幅，畢竟辛勞咗全年，人工加幅先係打工仔最緊張，唔通同你講感情咩？今年國際權威機構怡安翰威特就發表《2018人力成本調查》，直接點出Top 10人工加幅最多嘅行業，睇下有無你份？

第十位：化工（6.4%）

第九位：零售（6.5%）

第八位：消費品（6.5%）

第七位：藥品（6.8%）

第六位：醫療器材（7.1%）

第五位：高科技（7.4%）

第四位：醫學研究（7.4%）

第三位：臨床醫療（7.6%）

一向人工高嘅醫生護士繼續領先，加上世界愈嚟愈多傳染病及其他病症出現，臨床醫療人員自然人高上到快。

第二位：房地產（8.2%）

睇嚟世界各地都一樣，炒樓炒地已經係慣常之事，當中從事嘅工作人員自然撈到唔少油水。

第一位：互聯網程式（9%）

以9%大大拋離一眾行業，不過都應該唔意外，今時今日大家衣食住行都係靠互聯網之時，係好合理嘅！

催至有：80後港女OL一名，每日返工即係扮工，熟讀辦公室生存之道，最愛煲韓劇，返工奉行三大宗旨：拖、推、卸。

#催至有 #office #column

[olinhk]

星期一催至有：HR辛酸史！只有1% CEO為HR出身

HR係每間公司幾乎都有嘅部門，無論大、小規模，總會有人力資源呢個部門，負責嘅包括請人、調配人手、培訓等等。不過，好多HR都話不斷呻苦，而且外國有「HR苦主大聯盟」，不停出現唔到公司HR話自己好慘好慘，甚至形容係公司之中最容易被人遺忘嘅部門，「如果Sales係前鋒，市場推廣係中鋒，HR可以話係場外後援。」更有數字顯示，全球CEO之中，大部分出身都係Sales，當中只1% 係由HR出身。究竟點解呢個每間公司都必有嘅部門，反而會咁唔討好呢？

受每個部門氣

HR好多時要幫各部門請人、培訓，但更多時會被該部門嘅主管問責，例如好耐都未請到人，其實可能係上面Budget未批，但又係HR受氣；例如培訓唔合主管心水，都要HR去不斷改。

請錯人？

人夾人緣，好多新入行同事就算能力合適，但都未必一定融入到公司，一旦出現呢個情況，就會令部門老細向HR質疑「請錯人」，覺得無揀啱合適人士，但實際上可能係人工太低請唔到人。

做磨心

HR管理埋人力資源調配，即係人工嘅分配，人力嘅配給都係由HR去執行，但好多時都係���命大老細旨意，但下面各個部門就會搵HR出氣，覺得HR唔體諒，唔夠Headcount，人工加幅不足等等。

催至有：80後港女OL一名，每日返工即係扮工，熟讀辦公室生存之道，最愛煲韓劇，返工奉行三大宗旨：拖、推、卸。

#催至有 #office #column

[olinhk]

星期四催至有：晚晚OT走唔到 有得走反而仲問：咁早無嘢做點算

打工仔，離唔開OT，尤其香港人大部分都忙到平日夜晚連自己私人時間都無埋，晚晚留到9點先走，返得屋企都成10點，真係好慘慘豬架。唔知大家有無見過有啲同事，明明呢排唔多嘢做，但依然死坐住張櫈一直唔肯走，都要特登等到9點先走。至有姐我有朋友就係咁，問佢做咩唔做，佢會話：「咁早走唔知去邊。」「唔走啦，都無嘢做。」原來呢班同事正正走入一個永不收工嘅惡性循環之中！成個循環就係，因為你經常OT，所以你無晒私人時間同生活，繼而你開始失去一啲舊朋友，或者屢次爽約後令對方開始唔再叫你，繼而你無人約無自己活動，就算早收工你仍然選擇留喺公司；就係咁一直惡性循環！

作為打工仔，返工時間OT唔係話要計到盡，不過畢竟工作唔係人生嘅全部，如果因為OT放棄晒自己原本有嘅生活同朋友，某程度上真係用錢買青春。如果你唔係跌入呢個黑洞、惡性循環嘅，不如今日起，早少少收工，出去搵番自己好過啦！

催至有：80後港女OL一名，每日返工即係扮工，熟讀辦公室生存之道，最愛煲韓劇，返工奉行三大宗旨：拖、推、卸。

#催至有 #office #column

[olinhk]

星期三催至有：出親聲都講錯嘢 真係唔適合留喺辦公室

返工從來講嘅係人際關係，識人好過識字係千古不變定理，要去到呢一點，就算唔使你口甜舌滑都好，都起碼唔好開口夾著脷吖！至有姐我有個朋友就話最近公司有個新同事，好鍾意講嘢，但偏偏有一個問題，就係亂用成語！最經典係曾經「讚」過一位同事「徐娘半老」，即係等如話人係「中女」！另外又見到有女同事生仔，竟然用「老蚌生珠」去「恭喜」人哋！最慘係佢仲係真心唔知，但聽到嘅人就即時火都起埋呢。最後呢位同事慘被調組，真係話佢可憐又唔係，話佢抵死又唔係。隨時中伏嘅說話之中，仲有邊啲呢？

「你都幾食得架喎」

女仔就梗係怕肥嘅，十個有九個都係，仲要明明自己係瘦到得棚骨，但仍然話要減；如果你見人哋食嘢就咁講，人哋會以為你串佢肥，再唔係就覺得你挑起咗佢內疚感。

「估唔到你咁醒」

好多人，尤其男仔，成日懶幽默，想串下人就會講呢句；但講者無心，聽者就會認為你一直覺得自己好蠢，再甚者就係覺得你質疑佢工作能力，甚至對其他同事講話佢蠢！

催至有：80後港女OL一名，每日返工即係扮工，熟讀辦公室生存之道，最愛煲韓劇，返工奉行三大宗旨：拖、推、卸。

#催至有 #office #column

[olinhk]

星期二催至有：公司師奶齋講大台劇 同事無癮到要辭職

大家記得舊年最勁搜尋字眼，竟然10個有7個都有關大台劇集或者藝人，好多香港人其實都係邊鬧邊睇，大台原來一直係大家避唔開嘅媒體。有人話公司年齡普遍較大，而且特別多師奶，一放工6點就去買餸買屋企煮飯，然後再睇大台，一路直至夜晚。不過呢位朋友就唔係咁開心，事關唔單止對無睇大台嘅佢一啲話題都無，都令佢好嬲，話唔明點解大家要咁反智仲睇大台喎。呢位朋友更加嬲到接受唔到，最後乾脆離職。其實唔好話睇大台啦，公司同事如果同自己興趣、年齡差太遠，的確好令人覺得被孤立，畢竟傾唔埋，即係玩唔到一齊。日日返工就好難受喇，除咗電視節目有分別，仲有咩呢？

買嘢

無錯，係女人都鍾意買嘢，不過就唔係個個女人都鍾意買名牌。一旦你同事係不停買名牌嘅女人，而你就買開淘寶、葵廣嘅話，就基本上大纜都拉唔埋喇，雙方各有各寄望怎麼辦。

湊仔

女人另一大話題當然就係湊仔，從大肚至湊B至讀書，媽媽之間嘅話題可以話係永無止境，如果大家身邊同事全部都係媽媽級，而你未係，咁恐怕最常聽嘅係「幾時到你咇返件呀？」

老公

好多女人唔知點解結咗婚之後，好似就無咗自己，無論講起咩話題都會牽連到自己老公，無論只係傾芝麻綠豆嘅小事，定係國家大事，三句唔埋兩句就會提起「我老公呢」，喂大姐，咁你不如直接叫你老公嚟傾好過啦！

催至有：80後港女OL一名，每日返工即係扮工，熟讀辦公室生存之道，最愛煲韓劇，返工奉行三大宗旨：拖、推、卸。

#催至有 #office #column

[olinhk]

星期一催至有：有車無車 就係同事間財富嘅象徵？

香港地地少人多，養自己都成問題，莫再講話好多人想買又唔敢要嘅車仔呢？香港人養車真係好貴，停車場、出街泊車、罰款等等，仲有大批雜費要畀，所以先話買車容易養車難。不過唔知大家有無留意，公司總係有唔少男同事，唔係太高職位，但又會養架車仔。唔同人有唔同價值觀，大家唔可以話人點解要揸車、香港搭的士仲方便之類嘅話；因為男人對車嘅感覺，唔可以齋以錢去衡量，好多人寧願每個月死慳死抵，就係為咗架車。最近討論區有人話公司有位男同事因為有車，令到唔少女人都對佢「刮目相看」，覺得佢有錢有地位。至有姐我就唔知點解佢公司嘅女同事咁膚淺，今時今日有車嘅男人真係跌個招牌都壓中幾個。不過大家又唔睇少有車嘅男同事，喺職場，佢哋都會有優勢架！

同事車出車入

返工最緊要打好人際關係，有車可以代步，有時公司活動、同意Gathering可以做下柴可夫，車同事車上司都好，一樣盡顯自己貼心一面，喺車入面仲可以乘機溝通溝通，加唔少分架。

有車有承擔

好多老闆都話最怕後生仔無承擔，唔努力工作唔緊張工作，話裸辭就裸辭；一架車就可以令人覺得你係有心機工作搵錢，情況等如好多人話結咗婚嘅男人更得老闆歡心，因為有負擔先有承擔嘛！

多個興趣多個話題

同老闆層次好難相若，要同老闆有共同話題就更難；不過老闆通常唔係玩錶就玩車；男人最緊要乜都可以傾一餐，尤其對住老闆，如果大家都係識車之人，以後搭升降機或者去廁所撞到，都唔怕Dead Air老尷！

催至有：80後港女OL一名，每日返工即係扮工，熟讀辦公室生存之道，最愛煲韓劇，返工奉行三大宗旨：拖、推、卸。

#催至有 #office #column

[olinhk]

星期五催至有：LEGO今年要炒1,400人？

LEGO呢粒小小嘅塑膠，可以話引起全球數以億計嘅大人小朋友為之瘋狂，自然LEGO聯乘埋其他電影系列，更加係令LEGO掀起炒風。炒呀炒呀，但原來睇落非常架勢嘅LEGO，今年不斷裁員，啱啱又炒咗1,400位員工喇！今年LEGO業績原來麻麻，比去年跌咗5%，成24億美金咁多，主要原因係美國嘅銷售額跌咗唔少，縱然亞洲賣得非常好都追唔番。主席就話到明因為營利未如理想，今年過年前又會再炒多一批人，可以話個個都危在旦夕。

其實LEGO表面上好似賣得唔平，但其實開支唔少，除咗面對原材料價格上升之外，仲有不斷向各大電影購買版權，最大兩個老細分別係漫威漫畫，即係超級英雄系到；另外就係迪士尼，即係《星球大戰》、《魔盗王》等等。呢啲版權費用每年都加價，賣一盒LEGO隨時有一大半都用咗去畀版權，都咪話唔慘。仲有呀，大家可能無留意近年LEGO都要玩電子化，又搞埋APP又出Game，但實際上最好賣嘅反而係傳統嘅積木系列。所以話，係嘅，所有嘢都應該與時俱進，不過有啲嘢反而都係舊嘅好，LEGO就係一大例子囉！

催至有：80後港女OL一名，每日返工即係扮工，熟讀辦公室生存之道，最愛煲韓劇，返工奉行三大宗旨：拖、推、御。

#催至有 #office #column

[olinhk]

星期四催至有：當貨櫃車都開始有自動駕駛？

成日聽到話AI人工智能會取代好多人類嘅職業，而的確事實上唔會工種陸續被AI做咗，不過好多人應該點都估唔到，連貨車司機原來都有機會無得撈！AI智能車喺美國研究得七七八八，甚至Tesla喺美國已經推出咗自動駕駛，可以喺好多地方自行郁動，日後私家車係注定會成為電腦控制；但反子，身型龐大嘅貨車，其實好難操控，無論係睇位及操作上，都比私家車要難得出。近日貨車國際品牌Peterbilt就公佈，話正研究自動駕駛貨車喎！

其實目前全美國有350萬名貨車司機，而主要發生意外嘅成因，9成都係因為司機疲勞所到，如果用上自動駕駛而又安全的話，可以減少好多意外。每年因為貨車意外而死亡嘅人數多達4千人，1萬人受傷，可見馬路上呢種大貨車真係非常危險嘅移動致命工具。不過Peterbilt就話要採用全自動無人手操作的確仲有段好長距離，但如果主要由AI操控，人類司機做輔助嘅話，其實就已經好快可以開始試用喇！

催至有：80後港女OL一名，每日返工即係扮工，熟讀辦公室生存之道，最愛煲韓劇，返工奉行三大宗旨：拖、推、御。

#催至有 #office #column

[olinhk]

星期三催至有：最搵錢大學學系 法律系都只排第7？

早幾日同大家講過有咩大學學系畢業之後要淪落做低薪工作，雖然係咁，大家都唔好怪自己父母細細個迫你讀書呀，因為今日要講嘅係最近公佈大學最搵錢學系！始終大學畢業生都係佔咗社會上最多資源，人工地位最高嘅一群人，今次公佈頭九位！（以下由美金計）

第九位：物理系

對數學及科學有認識，可從事製造及科技業，年薪$78,400 。

第八位：電子工程

當然吃香啦，做電腦科技公司甚至電力公司都得，年薪$78,600 。

第七位：法律

成日以為律師搵好多，原來都係排第7 ？年薪$79,000 。

第六位：建築

除咗建築師之外，原來仲撈埋圖像設計等。年薪$81,200 。

第五位：商業管理

非常廣泛嘅門路，從MT至財經、保險都得。年薪$83,700 。

第四位：工程師

主要係幫公司或者政府統籌建築或產品項目。年薪$85,800 。

第三位：社會學

呢個估唔到！會成為治療師、研究員等等。年薪$87,900 。

第二位：視覺藝術

無錯！原來呢一科嘅藝術好吃香，可以從事平面或產品設計師。年薪$90,390 。

第一位：電腦科學

呢個唔使多介紹啦，目前最搵錢嘅企業全部都係想請呢一科嘅學生。年薪$92,300 。

催至有：80後港女OL一名，每日返工即係扮工，熟讀辦公室生存之道，最愛煲韓劇，返工奉行三大宗旨：拖、推、御。

#催至有 #office #column

[olinhk]

星期二催至有：40%同性戀員工表示曾被同事取笑

世界嘅趨勢都係講緊博愛包容，唔會國家仲已經開始允許同性戀合法結婚，唔少同性戀人士都開始不避諱出櫃公開自己性取向，有時大家更加會喺街上見到佢哋好似一般人咁親熱。正當大家都以為世界大同，大愛盛行之時，結果又係咪真係咁和諧呢？最近美國一個網上調查得出結果令人擔心，原來有4成嘅同性戀人士都曾經喺辦工地點被人取笑或者歧視，比例比起一般人高出11%。大部分人都話取笑者係一個人，但同時有13%人話係被一班3個或以上嘅同事一齊取笑。至於被人攻擊嘅又主要係咩呢？

外型

最常被人笑嘅係同性戀者嘅外表，例如髮型、身型、衣著打扮等等，基本上就係日日返工最易被人注視嘅地方。

感情生活

另外被��取笑就係佢哋嘅感情生活，例如佢哋同伴侶嘅生活，或者婚姻狀態之類，同類令人覺得難堪。

工作準則

另外一種欺凌唔係言語上取笑，而係對佢哋有另一把尺，例如工作表現及評分都會被偏頗，得唔到公平嘅對待。

催至有：80後港女OL一名，每日返工即係扮工，熟讀辦公室生存之道，最愛煲韓劇，返工奉行三大宗旨：拖、推、御。

#催至有 #office

[olinhk]

催至有：UCLA研究 開會用手抄筆記更有效率

日常打工仔，開會真係家常便飯，有時會接會，一日開4、5個會更加令人頭昏腦漲。大家開會時基本上一定會帶埋自己公司部Laptop入去，而絕大部份人都係用Laptop去記低會議重點，有咩要做嘅待辦事項咁呀。不過近日美國UCLA大學嘅最近研究，就話原來用手抄筆記比起用Laptop更有效率！

抄筆記要先消化

首先要比較一下，用Laptop做筆記速度一定較手寫快，因為打字速度比手寫快；但打字好多時大家要一字不漏咁記低，反而欠缺咗手寫時要先整合消化訊息再寫抄，所以手抄筆記更有印象及記憶。

減少互動影響對方

除咗對自己有影響，原來用Laptop同時對其他同事都有負面影響，研究話一個人用Laptop開會，幾乎會癱瘓咗個人同其他人互動嘅渠道，當人人都只顧著用Laptop入資料，根本失去咗開會交流嘅意義！

催至有：80後港女OL一名，每日返工即係扮工，熟讀辦公室生存之道，最愛煲韓劇，返工奉行三大宗旨：拖、推、卸。

#催至有 #office