#امنة | Explore Tumblr Posts and Blogs

goingnoowhere · 1 year

Text

“للبيع، حذاء رضيع لم يتم ارتدائه من قبل”

دي حسب موسوعة جينيس، أقصر قصة بالانجليزية في تاريخ الأدب، ارنست همنجواي هو اللي كتبها وعظمتها انها رغم قصرها شملت كل مكونات القصة. الشخصيات: أم ورضيعها. الحبكة: واحدة بتحمل، تشتري حذاء للبيبي، البيبي بيموت قبل ما يلبسه. الصراع: الأم بتحاول تتجاوز مشاعر الحزن والفقد وتبيع الحذاء اللي بيفكرها بانها كانت هتبقى أم .. ولو كملت في التفكير كمان ممكن تطلع بسيناريوهات كتير عشان بس تفسر 6 كلمات (بالانجليزية)

القصص دايمًا بتمثل لغز محدش قدر يفسره، والسبب في كده انها مرتبطة بشكل عميق بالنفس البشرية وطريقة الانسان في النظر للعالم ولنفسه، وعشان كده مكنتش صدفة خالص إن لما الإله حب يتواصل مع البشر اللي خلقهم من خلال الكتب السماوية، إختار إنه يكلم عباده عن طريق القصص، تخيل خالق اللغة وخالق البشر لما جه يتواصل مع البشر ملاقاش افضل من لغة القصص .. وده في حد ذاته بيخلينا نسأل، اشمعنى القصص؟

المؤرخ يوفال هراري بيحكي في كتابه Sapiens إن القصص هي اللي انقذت البشر من الانقراض. زي ما إحنا عارفين كل الكائنات تقريبًا عندها لغة تواصل على حد علمنا، لكن لغتهم بتشمل ظرفين بس: ظرف الغذاء وظرف الخطر. دي الاوقات اللي بقية الكائنات بتحاول تتواصل لغويًا فيها مع غيرها، يعني عند النمل مثلَا، على حد اللي توصلناله، النملة مش بتتواصل لغويًا مع بقية النمل غير عشان تقولهم تعالوا هنا فيه اكل او ابعدوا عن هناك فيه خطر، طبعًا فيه طرق تواصل تانية غير الكلام بيتسخدموها للتزاوج وأغراض اخرى، لكن لغويًا دي ظروف التواصل الوحيدة.

لو رجعنا بالتاريخ حوالي 300 الف سنة، هنلاقي إن الارض كان بيسكنها 9 انواع من البشر (او اشباه البشر)، وكانوا متقسمين اعراق حسب المنطقة اللي عايشين فيها زي إنسان "نياندرتال" اللي كان عايش في سهول اوروبا الباردة، وانسان "دينيسوفا" اللي كان عايش في آسيا، وانسان "الهومو إريكتوس" اللي كان عايش في إندونيسيا، وسبحان الله يا مؤمن كل الاعراق البشرية دول انقرضوا ومقدروش ينجحوا في الاستمرار على وجه الارض، ماعدا عرق واحد بس اللي عرف ينجو من الكوارث البشرية والحروب والحيوانات المفترسة، وهو انسان الهومو سابينس اللي ظهر في الجزء الجنوبي من افريقيا ، واللي انا وانت وكل البشر انحدرنا من سلالته. ف يا ترى ايه المميز في العرق ده وخلاه ينجو عن بقية الأعراق اللي الحفريات بتثبت انهم كانوا اقوى بدنيًا وعاشوا في بيئة امنة اكتر من بيئة الهومو سابينس؟

السر اللي خلى سلالتنا البشرية هي الوحيدة اللي تنجو هو اننا نجحنا في تطوير لغة بدائية عن بقية الكائنات، كل الاعراق دي لغة تواصلها متطورتش عن النمل اللي اخرهم الغذاء والخطر، اما احنا فاضطرينا نطور لغتنا لحاجات اكثر تقدمًا من كده، وتطور اللغة ده خلانا نقدر نعمل في جماعات ونعيش في قبائل ونوحد القبائل مع بعض ونستمر في الاتحاد والتعاون ومواجهة الاخطار كجماعات كبيرة العدد مش صغيرة زي بقية الاعراق، وفضلنا نتطور ونتحد بسبب اللغة لحد ما القبائل كبرت وكونت حضارات ودول وامبراطوريات، كل ده بسبب نجاحنا في تطوير لغة التواصل ما بينا .. بس برضه لسه مجاوبناش على السؤال: اشمعنى احنا اللي طورنا اللغة والباقيين لأ؟

السبب إننا عشان نعيش معرفناش نستحمل قدر المعلومات القليل ده، معلومات عن اماكن الغذاء واماكن الخطر والحيوانات المفترسة مكنتش كفاية عشان تخلي الهومو سابينس يعيشوا مع بعض، وده المختلف عننا، اننا كنا عايزين نعرف معلومات عن بعض اكتر، عشان اقبل اعيش جنبك واتقبلك كجار ليا كان لازم اعرف عنك معلومات زيادة، كان لازم اسأل جارك اللي قبلي اذا كنت شخص يستاهل الثقة ولا لأ، وخلي بالك الثقة كان اهم صفة بالنسبة لينا ساعتها، مهو انا لازم ابقى عارف انك مش هتغدر بيا وتسرق الاكل اللي هنجيبه ولا مثلا هتسرق بيتي وتخطف مراتي وعيالي وانا رايح اصطاد، وعشان العيش في جماعات يتطلب معلومات عن بقية الناس اللي عايشين معاهم، الهومو سابينس بدأوا يطوروا لغتهم الخاصة بيهم، ليه؟ عشان يعرفوا يحكوا قصص عن جيرانهم واللي حواليهم، والقصص ساعتها كان غرضها الاساسي هو تناقل المعلومات، انا بحكيلك عن الشخص اللي سرق اكلي عشان تبعد عنه وانت بتحكيلي عن الشخص اللي انقذ حياتك عشان اقبل بزواج بنتي منه .. ودي كانت بداية تطور القصص عند الهومو سابينس اللي انقذتهم من الانقراض.

لكن بعد مرحلة ما، القصص تحولت من المستوى الفردي الى المستوى الجماعي، ومن القصص عن الافراد الى القصص عن الجماعات والقبائل والعائلات، بل وعن الالهة، ومع تطور وعي الانسان القصص هي كمان زاد تعقيدها، فبدل ما كان غرضها نقل المعلومات أصبح غرضها تناقل الخبرات والروئ بل والفلسفات كمان، كل ده من أجل توحيد أكبر قدر ممكن من الناس بيتشاركوا في فكرة واحدة وفلسفة واحدة تقدر تساعدهم يبنوا حوالين فلسفتهم دي حضارة خاصة بيهم.

يعني مثلا لو بصيت على أشهر قصة في التراث/الميثولوجي البابلي هتلاقي إنها قصة خلق الكون، وابطال القصة هما الإله ابزو ومراته تيامات (بيمثلوا ادم وحواء)، ابزو إله الماء العذبة (النهر) وتيامات آلهة الماء الملحة (المحيط)، بعد ما اتجوزوا انجبوا الجيل الأول من الآلهة، كانوا آلهة شريرة وطماعة (زي قابيل) انقلبوا على الاله أبزو وعملوا لنفسهم بيوت من جثته.

وده طبعًا ضايق مراته تيامات وقررت تعمل جيش من التنانين والوحوش بيجري في أجسادهم سم بدل الدم، تنتقم بيهم لمقتل جوزها وتقتل كل الآلهة اللي عملوا انقلاب. من الآخر كانت عايزة تصفيهم كلهم، تعمل زي طوفان نوح ومحدش يتبقى من الآلهة غير هي وجيشها، وعشان المهمة الخطيرة دي اختارت لجيشها الاله كينجو (بيمثل ابليس قائد الشياطين) .. المهم جيش الوحوش والتنانين كان عامل شغل جامد وقتل كتير من الآلهة ومحدش بقى قادر عليهم، لحد ما اتولد الإله مردوخ.

مردوخ كان عنده قوتين مش عند أي إله غيره، الاولى انه بيتكلم كلمات سحرية (اللوجوس، وإحنا موضوعنا القصص فخلي بالك)، يعني يقدر بمجرد ما يقول الحاجة يخليها تحصل، فيحول النهار لليل والليل لنهار بكلمة واحدة تخرج منه. (بيقول للشئ كن فيكون) والقوة التانية كانت إنه عنده عيون حوالين وشه كله، يعني بيقدر يشوف من كل النواحي مش بس من قدام. لما الآلهة اكتشفت قوة مردوخ اقترحوا عليه يروح يقاتل جيش تيامات الوحشي اللي محدش قادر عليه، بس مردوخ كان بيفهم وكان مؤمن بمقولة الجوكر اللي بتقول لو انت شاطر في حاجة متعملهاش ببلاش. فقبل ما يوافق على اقتراحهم اشترط عليهم ينّصبوه كبير لكل الآلهة ويدوله السلطة انه يكتب القدر بنفسه (يعني تبقى معاه السلطة المطلقة على الوجود).. وساعتها الآلهة كانوا شايفينوا كده كده هيتقتل في الحرب فوافقوا وخلاص.

بس مردوخ اثبت جدارته وقدر ينتصر على جيش تيامات، وكمان قطع أجساد الوحوش والتنانين اللي مليانة سم بدل الدم، من هنا خلق الكون، خلق الكون من سم الوحوش (الشياطين)، وكذلك قتل كينجو (ابليس) وخلق البشر من دمه المسمم، عشان نعيش في كوكب مخلوق من سم الوحوش والتنانين وجوانا بيجري سم كينجو زعيم الشياطين.

قد تبدو قصة أسطورية عادية من وسط اساطير كتير، لكن لو قارنتها بتاريخ الحضارة البابلية هتلاقي إن حياتهم كانت مبنية بشكل كامل على اننا عايشين في عالم الشر فيه هو الاصل وسم الشياطين بيجري في دم البشر، وكل اللي المفروض نعمله إننا نتحد ونحافظ على حضارتنا ضد أي غريب عايز يفرقنا.

ودي من الحاجات اللي لاحظها برتراند راسل وهو بيقارن بين الحضارة الفرعونية والبابلية وبين حضارة كريت، راسل ذكر الموضوع في كتابه تاريخ الفلسفة الغربية (الجزء الأول) ولاحظ إن الحضارة الفرعونية والبابلية كانت متشددة وصارمة اخلاقيًا ودينيًا بسبب كل القصص اللي اخترعوها في التراث بتاعهم عن صراع الخير والشر والحياة بعد الموت، في حين إن حضارة كريت كانت قصصهم تشبه الاساطير الاغريقية وكمان اتميزت بكونها بتدور حوالين المتعة واللذة وعدم وجود حياة بعد الموت، وده خلى حياتهم مركزة على السعادة اكتر والمتعة عكس المصريين والبابليين اللي حياتهم كانت مليانة معاناة وشقاء.

وهنا تظهر اهمية القصص تاني، لكن على مدار زمني اوسع عشان تتناقلها الاجيال وتصبح جزء من لاوعي الاجيال الجديدة اللي مش واخدين بالهم وهما بيتناقلوها من الاجداد ان القصص دي بتحدد اسلوب حياتهم وبتشكل نظرتهم للرب وعلاقتهم بالحياة. وهنا يظهر الجانب الاخطر للقصص في سيكولوجية الانسان ذات نفسه ونظرته لنفسه.

في كتابه “الرجل الذي حسب زوجته قبعة” بيحكي الدكتور أوليفر ساكس طبيب الاعصاب الاشهر في العالم عن حالة تكاد تصاب بالجنون بسبب قصة، او بلفظ أدق بسبب عدم وجود قصة!

الحالة اللي اقصدها هي السيد ثومبسون اللي كان بيعاني من حالة نادرة من حالات فقدان الذاكرة الناتجة عن متلازمة كورساكوف (خلل دماغي) واللي كانت بتخليه يصاب بنوبات بتكون فيها ذاكرته خالية وفاضية بشكل غريب، لدرجة ان السيد ثومبسون هرب من المستشفى مرة وركب مع سواق تاكسي وفي الاخر لما لاقوه سألوا سواق التاكسي الراجل ده قالك ايه بالظبط؟

فرد السواق: إنه أفضل راكب حظيت به مطلقًا، بدا أنه قد كان في كل مكان، وفعل كل شئء، والتقى بكل شخص، أكاد لا اصدق أن حياة شخص واحد يمكن أن تتسع لكل هذا.

وطبعا كل القصص دي كان السيد ثومبسون هو اللي بيألفها عشان يملى فراغ ذاكرته ويمد نفسه بأي أرض صلبة يقف عليها ويستمد منها هويته، أو زي ما دكتور أوليفر ساكس كتب في تشخيص الحالة:

“كل واحد منا هو سيرة وقصة، كل واحد منا هو حكاية فريدة يتم تركيبها باستمرار بدون وعي بواسطتنا ومن خلالنا وفينا. نحن لا نختلف عن بعضنا كثيرًا بيولوجيًا ولا فسيولوجيًا، أما تاريخيًا، كقصص، فكل منا فريد من نوعه. فمن أجل أن نكون أنفسنا لابد أن نملك أنفسنا، أن نملك قصص حياتنا، يجب أن نتذكر انفسنا ونتذكر الدراما الداخلية لأنفسنا وقصتها، يحتاج الانسان إلى قصة داخلية مستمرة للحفاظ على هويته ونفسه”

فالقصص مش بس ساعدت أجدادنا الاوائل وانقذتهم من الانقراض، ولا بس هي السبب الرئيسي في قيام كل الحضارات على مدار التاريخ، دي كمان هي المسؤولة عن صحتك العقلية والنفسية، ومن غيرها حياتك توقف ونظرتك لنفسك تنهار وموقعك في العالم ميبقاش له وجود، وده نفسه بيخلي لكل القصص بُعد ذاتي غير بُعدها العام، يعني الطريقة اللي انت قريت بيها قصة تيامات ومردوخ مش هي نفس الطريقة اللي انا قريتها بيها، هي نفس القصة بس كل واحد فينا بص للقصة بطريقته وترجمها من الزاوية الاقرب له، وعشان كده الروائي الامريكي دان براون كان بيقول إن الكاتب مش بيكتب رواية واحدة، بل روايته بتتضاعف بعدد الاشخاص اللي بيقروها لان كل واحد فيهم بيشوفها بطريقة مختلفة من خلال تجربته وخبرته وطريقة تفكيره.

وده بيفكرني بكلام دونالد ميلر في كتابه مليون ميل في الف عام، عن إن حياة الانسان كلها عبارة عن قصة وإن الإله هو الحكاء الاعظم وصانع القصص الامهر، وإن ده ممكن يكون سبب هوسنا بالقصص، إننا لما بنصنع قصص بنكون في اقرب حالتنا للتحلي بصفة الخالق. وده اللي خلى القصص محور دائم لحياة الانسان مهما تغيرت احواله ومهما تغيرت ظروفه، وهو في الكهف و وهو في القصر، وهو في الغابة و وهو بيبني اعظم حضارة شهدها الكوكب.

القصص دايمًا كانت العمود الاساسي لكل خطوة خدتها البشرية للأمام، وأصل نظرة الانسان لنفسه وللإله ولكل اللي حواليه، القصص هي اللي خلتنا بني آدمين وفرقتنا عن بقية الكائنات، ميّزت الانسان وساعدته على البقاء وعلى تطوير انسانيته، بل وخلته يصنع حياته كلها حولها، من خلال القصص بنعيش ونموت، بنؤمن ونتعبد، بنحب ونكره، من خلال القصص بنعيش انسانيتنا اللي مكنتش هتكون ابدًا من غيرها، عشان كده مش هبقى ببالغ لو قولت إن القصص هي اللي صنعت الانسان والانسان بيعيش بقية حياته يردلها الدين بإنه بيني كل حاجة حولها ويتذوق كل حاجة من خلالها.

17 notes · View notes

sena3ar · 1 year

Text

عملية الليزك وانواعها

تعتبر عملية الليزك من أكثر العمليات انتشارًا في الوقت الحالي، وهذا بسبب ان تلك العملية تتم بسهولة وتؤدي الى نتائج فعالة ولعل كونها امنة هو ما يفسر انتشارها على نطاق واسع بين جميع الفئات، وكل ما زاد التقدم والبحث العلمي تطورت عمليات الليزك وأدخلت تقنيات كثيرة فيها مما أدى الى تنوع أشكالها ومسمياتها الى انواع كثيرة من الليزك طبقًا للتكنولوجيا المستخدمة فيها

الليزك التقليدي

وهو أقدم الأنواع ويعتبر الأساس لكل تقنيات الليزك الحديثة ويستخدم في علاج الانكسارية واخطاءها و هذه العملية على رغم بساطتها إلا ان التقنيات الاحدث تعتبر الافضل لانها تسرع الاستشفاء وتتسم بأنها الافضل والادق

الليزك السطحي

يسمى ب prk ويستهدف علاج الأخطاء الانكسارية التي تؤدي إلى مشكلة الأبصار المتمثلة في طول النظر، ويتم إجراؤها على سطح القرنية باستخدام المشرط الجراحي والليزر من أجل اعادة تشكيل القرنية

الليزك التفصيلي

كما هو واضح من اسمه وكما يسمى ايضًا بالليزك بصمة العين، إذ يتم رسم خارطة ثلاثية الأبعاد للعين حيث تتم العملية وفق أدق التفاصيل مما يعني الحصول على قياسات سليمة 100%

الفيمتوليزك

وهو أفضل التقنيات التي تستهدف تعديل وتصحيح الانكسارية التي تسبب قصر النظر، وهى تستخدم شعاع الليزر بالكامل سواء بالقطع او اعادة تشكيل سطح القرنية

مشاكل الليزك واضرارة

كي تتضح الصورة لمن يخطط لعمل عملية الليزك فإن هناك بعض الاثار الجانبية تحتم علينا الامانة العلمية ان نسردها كما هي دون إنقاص الحقيقة أو تجميلها وهي من ضمن اضرار الليزك التالي:

جفاف العين، من أكثر ما يعانيه المريض بعد عملية الليزك هو جفاف العين والذي يتم وصف قطرة طبية عن طريق الطبيب لمعالجته، وتاتي اهمية العلاج كي لا تصاب العين بالالتهابات عدم استقرار النظر، قد يستمر فترة بعد عملية الليزك تصل الى 6 أشهر حتى يتأقلم الشخص مع القياسات الجديدة لا تعالج كل حالات ضعف النظر، حيث انها ممنوعة على فئات كثيرة منها اصحاب القرنية المخروطية

فوائد عملية الليزك

كما ان لها اضرار كذلك تتعدد فوائدها لذلك معلومات عملية الليزك تشمل اضرارها ومميزاتها لتشمل التالي:

لا تستغرق سوى عشر دقائق ويمكن للمريض العودة للبيت مباشرة تصحيح الإبصار بشكل كبير وتعالج درجات متعددة لا يتم إجرائها إلا بعد كشف وفحص وتحليل طبي للتأكد من تناسبها مع المريض تكلفة مناسبة، وتعتبر من أقل الإجراءات الطبية لعلاج الأخطاء الانكسارية سعرًا تتم تحت تخدير موضعي ولا تسبب الم يمكن ان تستغرق السديلة على سطح القرنية فقط 3 ايام الى اسبوع على اقصى تقدير كي تتعافى وتعود لوضعها تلقائيًا تعالج أكثر من مشكلة مثل الاستجماتيزم بالإضافة الى مشكلة ضعف النظر سواء طول النظر وقصره

سعر عملية الليزك

يتراوح سعر عملية الليزك بين 8000 جنيه الى 15000 جنية، وهذا التباين له مرده المفهوم ومنها نوع التقنية المستخدمة و مدى الجراحة وحالة المريض وغيرها

هل يسبب الليزك العمى؟

بالطبع لا، لأن الجراحة تخضع لإشراف طبيب متخصص وبعد تحاليل وفحوصات كما أنها مصرح بها من قبل هيئة الدواء والغذاء الأمريكية ال FDA

متى يخضع أصحاب القرنية المخروطية لعملية الليزك؟

لا يمكن إجراء العملية لمن يعاني القرنية المخروطية لذلك فإن إجراءها غير متوفر لهم إلا في بعض الحالات التي تكون فيه القرنية غير مخروطية وتتمتع بالسماكة وفي النهاية الأمر راجع الطبيب المعالج

#عملية الليزك #سعر عملية الليزك #اسعار الليزك #مميزات الليزك #مخاطر الليزك

2 notes · View notes