dimas-inag

[dimas-inag]

Disyembre 7, 2023

Matagal na rin huli kong paskil dito.

Gaya ng dati, may dahilan ang pagbabalik.

Inaatake na naman kasi ako ng mga agam-agam, guni-guni, at iba pang negatibong kaluluwa na naipon din sa mahabang panahon.

Pinipilit akong hilahin pababa mula sa mga pagtatanong kung kumusta na ang mga 'di nakamit na layon?

Tila ba ipinamumukha ang bagal nang itinatakbo ko sa liwasan ng pagsubok; na palagi na lamang ba akong mahuhuli o malulunod sa mga kadahilanan ng katamaran.

Wala akong mairason kaya't nalilibing sa katahimikan at ikinikimkim ang mga nais ibulalas.

Ang hirap maghila ng sariling mga paa lalo sa mga tanaw sa malayo ay ikinapapagod na agad sa mahabang tatahakin.

May makakasalubong pa ba sa daan? May mahihintuan ba na pahingahan?

Walang makapagsabi.

Kaya sa mga pagtitiis, kalahati ang dasal ay sa ikatatagumpay ng paglalakbay habang ang nalalabi ay sa kisap-matang pagkapawi sa animo'y daang libong taong ikinapapagod.

Walang padayon. Kundi nagpapakakampon lamang sa "bahala na."

[dimas-inag]

Mayo 1, 2023

Mahabang panahon din ang lumipas bago ako bahagyang sipagin sa muling pagsusulat dito. Oo, bahagya lang dahil maski magpahanggang ngayon ay nalalasing pa ako sa katamaran. Minsan kasi, pasulat na, tsaka naman dahan-dahang naglalaho ang mga salitang gusto kong malikha. Badtrip ‘di ba par? 

Siguro, masasabi kong pang-uudyok muli para maligaw sa “talaarawan” ko ay ang masidhing damdamin na hindi ko na kayang sarilinin pa. Literal na nakauumay, nakasusuya, nakasusuka, at lalong nakawawalang gana na kasi ang buong perspektiba ko sa tatahaking hinaharap. 

Maraming tagpo na yung sumunog sa mga nais kong makamit. Nahihirapan na akong manampalataya sa tila hungkag na lakad. Nananaig yung kagustuhan kong magpahinga na lamang. At... at... taena. Sa susunod na lang ulit.

[dimas-inag]

Oktubre 1, 2022

Dati'y mababaw ang damdamin kaya naman hindi ito pinapansin.

Ipinagkikibit balikat kung may dahilan ba para lumalim.

Hanggang sa ang panahon na mismo ang nagsasabing tiyak na ikaw'y kapupungawan sa 'yong paglisan.

Alam ko na sa una'y sinasabing "hindi ikaw" ngunit napagtatanto mula sa malalim mong pag-unawa sa mga bulong kong 'unga' na siyang ikaw'y dinalangin kong maging giliw sa pangakong walang hanggan.

Sa panahong sinayang, ang bawat pagkuyom sa mga palad ay tila kumpol ng mga buntong hiningang walang mapaglibingan.

Sa anyo ng hirayang ikaw ang natatabihan, bangungot ang katotohanang namumutawi't umaaninag sa paparating na bukas.

Hindi ako dahil hindi kita agad na pinili.

Masakit... ngunit ito talaga ang gaba nang pagsisisi.

[dimas-inag]

Hunyo 22, 2022

May kiliting hindi sa akin.

Pinipilit kong pigilan ang kilig ngunit patuloy na nabibihag ang dibdib.

Sinusubukang tumindig sa matuwid ngunit nalulumpo sa matatamis na mga titig.

Nais kong isigaw at manindigang “hindi ako at wala sa dapat na pagpipilian”

Ngunit heto sa loob-loob nga’y bumubulong at nananalanging makabalik sa nakaraan…

Sa dakong wala pang nakasisilat ng iyong pangakong pang walang hanggan.

[dimas-inag]

Marso 21, 2022

May gabing nasira sa isang tinig na umalingawngaw sa harap ng dapat sana’y masiglang hapunan. Maraming saksi. At tiyak ng mga tunay na nakarinig at nakauunawa na may isang nabasag na damdamin.

[dimas-inag]

Lawakan at lawakan pa ang pang-unawa at baka hindi natin namamalayang gumagawa na tayo nang masama sa kasasamba sa akala’y mabuti.

[dimas-inag]

Nobiyembre 21, 2021

Bagot

Ang utak - sa malayo nag-iikot

Nag-aabang kung may kakatok

Ngunit walang lumalagok

Sa isang mangkok

Kung saan sa isang dako napulot

Kasama nang walang lilim na salakot

Kaya dinapuan ng antok

Ang matang dugyot

Na nakatanaw sa look 

Nabilot sa sapot

Ng gagambang tulog

Na ‘di mabusog

Sa naipong mga hamog

Na kung maaalog

Mawawalan ng saplot

Ang katawang lamog

Matapos ngang makuyog

Heto’t nagpapatihulog

Na gaya ng uhog

Na walang anumang hubog

Na kung masisinga sa ilog

Magmamantsang ‘di masusubok

Sa mga ‘di nakisangkot

Sa aking pagkabagot.

[dimas-inag]

Setyembre 11, 2021

May misteryong naglalaro sa isipan.

Magaling sa taguan.

Mahusay sa takbuhan.

Hindi ko makita’t mahuli.

[dimas-inag]

Setyembre 5, 2021

Sandamukal ang hikab na ‘di madilaan ng himbing. Tuwing umaga’y nag-aalmusal ng pag-asang “maaayos din ang lahat” ngunit maya-maya’y masusuka rin sa mapait na sandaling tinatayuan. Ang haba ng gabi. Oo at nangangawit na ang mga kalamnan sa hinihintay. Baka naman. Baka lang naman. Maalalayan mo pa nang bahagya ang nangangatog kong paniniwala sa nabanggit mong mga hiraya.

[dimas-inag]

Hulyo 25, 2021

Natapos ang araw at may nadagdag na naman na taon.

Masaya, oo.

Ngunit hindi gaano.

Okay lang.

Sapat lang.

Mas pipiliin ko na ang ganito kay sa lublob sa galak.

Kahit paano, natatauhan sa makasariling hangad at nakukuntento sa ibinabato ng panahon.

Mula sa pagputok ng sinag, isa na namang bagong kapitulo ang bubunuin.

Papadyak at lulukso-luksong tuwid ang ikinakatwiran.

Hanggang sa masumpungan ang tinatangkang makabuluhang wakas.

[dimas-inag]

Hulyo 24, 2021

Walang tigil sa pagtangis.

Tahan na. Pakiusap.

[dimas-inag]

Hulyo 8, 2021

O siya't muli na namang sumapit ang malalim na gabi

Pumupungay na ang mga mata't natitikom na ang labi

Ang oras, maaga nga ngunit nahuhuli

May hinintay pa atang naligaw na oyayi.

[dimas-inag]

Mayo 1, 2021

Minsan may kalungkutan ngang biglaan ang pagdapo. Mahirap bugawin. Mailap kapag naambahan lang ng tapik. Sa mga pangungulit sa tainga, hindi ko rin mabilang kung ilang beses nga bang nagtangkang sumulat upang maghabol sa inis. Kinubkob ako. At mahirap tanggapin na ako'y nagpakubkob; sa kabila ng mga ibinunyag na walang pagkagapi nga akong tatayo sa bantayog ng mga nauntog at natauhan.

[dimas-inag]

Abril 4, 2021

‘Di na mabilang ang mga hikab ngunit wala pang dumarayong antok.

Naiiwan ang isipan sa tanghalang malawak na maya’t maya rin nabubulahaw ng mga kahol ng aso sa labas.

Nagpapaihip sa hangin para manaboy ng sanib ng alinsangan.

Pinipilit managinip ng gising upang manalbos ng mga ikakatwiran — sa pag-idlip at sa mga imumulat pa sa pagtilaok ng mga paparating.

[dimas-inag]

Abril 1, 2021

Walang mga ulap ngunit malungkot.

Balot ng damdaming hindi madaig ng mga pilit na ngiti.

Ito ba ang biro ng panahon?

Walang dahilan upang humalakhak.

Walang humpay sa pamumugtong hininga.

[dimas-inag]

Marso 27, 2021

Nananalig sa mga panalangin.

Umaasang darating.

Walang sawang naghihintay.

‘Di paparapo ng pagod sa paghiling.

[dimas-inag]

Pebrero 25, 2021

Marami akong sinayang na pagkakataon. Pero nandito na eh. Harapin na lang. Abang na lang ulit.