Heto Ako
Ayaw kong magtago.
Nais kong magpakatotoo.
Hindi ako si Nathan na tila isang makinang nagkokompyut na isiniksik sa utak ng tao,
na kayang suriin at paglaruan ang mga numero
na para lang bang isang simpleng laro ng tumbang preso,
na tila natatama sa bawat hagis ng tsinelas
ang latang nariyan at akalain mong nakakaiwas.
Hindi ako si Jashan na tila isang gripong
patuloy-tuloy ang agos ng kanyang mga naiisip
na kanyang napupulot mula sa pinakailaliman ng kanyang mga panaginip
na parang malinis na tubig na umaagos sa isang ilog
na naging dahilan para kanyang kakayahan ay maging bantog.
Akala ko nga iyon na nga’y akin, eh—
ang kakayahang magsalita,
ngunit ipinamukha sa’kin ng buhay na hindi pa talaga ako handa
para maglahad ng impormasyon dahil sa aking pagkamahinhin,
na nag-uutal-utal at nawawala pa rin.
Hindi ako si Kristian na marunong humawak ng kamera
upang kumuha ng mga retrato at bidyong hindi natatalo ang ganda!
Paano nga ba galawin ‘tong mga botones, nakakatakot naman kasi.
Kung masira ko ‘yung gadyet ay matagal na panahon ako magsisisi.
Hindi ako si Jenzzo na isang baril ang singlakas
na kung mag-ispayk ng bola sa court ay kala mo’y wala nang bukas
At kung matamaan ka nga ng bola,
malas ka, wala ka ngang bukas!
Dahil mababali ang iyong buto
at iyong buong pagkatao. Charot!
Hindi ako si Ronn na kay galing gumawa ng disenyo
upang iparating sa madla ang nais ipahayag ng kanyang puso
sa pamamagitan ng mga grapiko, imahe, at tekstong inilagay sa espesipikong ayos
upang tumatak sa lahat ng mga matang titingin at lilingon
Hindi ako si Wilfredo na sobra kong hinahangaan,
Astetik, akads, at atletiks: kay rami niyang kakayahan.
Halimaw na nga sa court, pinantayan pa si Nathan sa acads!
Ulitin ko, baka hindi niyo narinig:
NAPANTAYAN NIYA SI NATHAN SA ACADS
Tapos ang kinis ng mukha niya, akalain mong hindi lumalakadz :c
Hindi ako si Miggy na matatag ang kalooban
para mamuno sa mga kaedad niyang lumaki sa kapariwaraan
Napakarami rin niyang kakayahan,
isa siyang amang tinitingalaan
Ang lahat ng nasa kanya ay kanyang mapursigidong pinaghirapan
Sino nga ba ako kung di ako sila?
Ano nga ba ang kasaysayan ng pangalang Ryan Rivera?
Pangarap ko lang nama’y gumawa ng impak sa mundo
at sa lipunang kinabibilangan
ngunit para akong nakakahon sa sarili kong pag-aalinlangan
Hindi ako si Quintin na tulad din ng isang ama
Sapagkat wala kang maiisip na hindi niya kayang gawin, at nasa kanya ang damdaming tumingin
sa kung ano ang maaaring matutunan
at kung ano ang puwedeng aralin
tulad ng acting, pagdidisensyo, at kahasaan sa musika
At ang paghasa sa kanyang kalusugan at pangangatawan
Hindi ako si Melo na mayroon na ang lahat
Lahat ng kakayahan, malaking ipon, at mabuting pamilyang walang halong alat
Napakasuwerteng bata ang taong ito
Kung maka-tres sa korte o kung maka-iskor sa net ay konsekutibo
Ngunit sa dulo ng araw isa pa rin siyang taong
may pakiramdam sa kapwa
Hindi man halata sa umpisa
Hindi ako si Matthew na magaling magsulat
na hanggang sa Pangasinan ang kanyang pangalan ay bumakat
bilang isang mahusay na kawani ng eskwela sa pagiging isang manunulat
Ang dami ko namang binanggit na pangalan--
Sila’y mga taong lubos kong hinahangaan
para sa kung ano man mayroon sila
na lubos naman nilang pinagsikapan
Kaya narito tayo ngayon upang sagutin ang tanong.
Ano nga ba ang saysay ng pangalan ko?
Ang Ryan Riverang hindi marunong maglaro!
Ang Ryan Riverang plastik at di talaga totoo!
Ang Ryan Riverang nag-uutal-utal,
Ang Ryan Riverang di umabot sa kumpetisyong nasyonal!
Ang Ryan Riverang tulog pag siya’y kailangan!
Ang Ryan Riverang nilamon na ng pag-aalinlangan!
Ang Ryan Riverang walang ginawa sa buhay,
Ang Ryan Riverang kakalimutan kapag siya’y namatay.
Binitbit ko ang papel at plumang ito
dahil heto ako. Buhay ako. Lalaban ako.
Hindi man positibo ang mensahe ng tulang ito
sapagkat ninais ko lamang ibuhos ang lahat ng nadarama ng puso.
Mayroon akong misyon,
at ito’y bigyan ng halaga ang pangalan ko.
0 notes
Patawad sa Aking Pagiging Pala-hugot
Nakikita kong naiinis ka
sa aking pagiging pala-hugot
kaya patawad
Patawad kung tuwing ako’y nababagot
nakukuha kong asarin ka
imbis na maging patnugot
para ika’y makaahon na
Patawad kung lahat ng salitang sinasambit
ay nakukuha ko pang iayon sa iyong
naranasang pagkaipit,
sa iyong naranasang pagpipilit,
sa isang relasyong nagwakas nang pilipit
Giniba ko na ang dahilan
kung bakit ninais ko ‘tong sulatan,
kaya para sa aking pagiging pala-hugot
nais kong muling humingi ng kapatawaranan,
At patawad dahil di ko mapapangakong
titigil ‘yung mukha kong makapal
sa pagsigaw ng mga bagay tulad ng
di ka niya naman minahal
Ngunit sigurado akong
hindi na pagkabagot ang dahilan
bagkus ang mga lalabas sa tulang ito’y
alam kong kailangan mong malaman
Alam mo, paborito kong sabihin
ang pariralang “Lahat na lang”
na palaging may karugtong
kapag may naririnig tayong mga bugtong
at kagintuan mula sa mga miyembro ng kaguruan
at kung sinuman nga naman
Noong sinabihan tayo sa CL ng
“Pakawalan niyo ang inyong mga kasalanan”
ang narinig mo mula sa bibig kong tila binasbasan,
“Lahat na lang, pinapakawalan.”
At ang iyong tugon,
“Pati ako, kanyang pinakawalan”
sabay balik ng mga alaala ng nakaraan
Noong di gumana ang Flash sa TLE,
“Ay p*ta, nawala!” ang sinigaw palagi
“Lahat na lang, nawawala!” tugon ng marami,
sabay balik na naman ng mga
alaalang nanantili, tulad lang ng dati
Noong tinuruan tayo sa Math kung paano “mag-eliminate,
“Kailangan nating tanggalin ‘yung
isang pares ng like terms” ang binanggit,
at “Lahat na lang, tinatanggal” ang tugong sambit,
at muling bumabalik ng mga alaalang tila humihirit
sa iyong puso’t isip na walang kalaban-laban
sa mga puwersang dahilan kung bakit mo binabalikan
ang mga bahagi ng buhay mong kailangan mo nang kalimutan
imbis na palakihin at pahalagahan sa loob ng iyong isipan
Kaya ngayon na tayo’y nasa panahong kasalukuyan
tayo’y nasa loob ng isang katotohanan
kung saan hindi na siya
ang karapat-dapat para sa’yo, dalaga,
na naghirap at nagpumilit na umibig,
na nagsayang ng laway mula sa’yong bibig
upang siya’y mahalin nang todo
kahit sa huli siya ay niloko
hindi nga ng sinta, kundi ng pag-asa
dahil ang akala ng dalagang ito
ay kailanma’y wala nang magbabago
kahit ang lahat ay nagbago sa kanyang harapan,
hindi niya hinarap ang katotohanan
Lahat na lang ng relasyon, nagsisimula
lahat na lang ng relasyon, nagiging maligaya
lahat na lang ng relasyon, minsa’y gumigiba
lahat na lang ng relasyon, minsa’y nawawala
Ngunit hindi ibig sabihin ng paggiba at pagkawala’y
maging dahilang mawala ang saysay ng buhay
mawala man ang sinta,
mayroong kaibigang nag-aalala
mawala man ang sinta,
mayroon pa ring nagtitiwala
nagtitiwalang aahon ka
nagtitiwalang babangon ka
mula sa iyong pagdududa
Nandito lang ako, mananatili ako,
at sinisigurado kong kailanman ay hindi ako lalayo
~ end ~
0 notes
Bawat Patak ng Ulan
1Tuwing bumabagsak ang ulan
mula sa makulimlim na kalangitan
naaalala ko ang bawat patak
ng pawis at luhang sinayang ko sa’yo
dahil hindi ko inakalang ika’y bibitaw pala
mula kung saan tayo nakakapit.
Tuwing bumabagsak ang ulan
mula sa makulimlim na kalangitan
naaalala ko ang bawat ngiti at tawang
ibinahagi natin sa isa’t isa
akala natin magtatagal ang ligaya
hindi kailanman magdurusa
pero tayo’y lubos na nagkamali
pagkat tuwing bumabagsak ang ulan
mula sa makulimlim na kalangitan
naaalala ko nang mabilis
ang oras na nawala ang iyong tamis
nawala ang iyong pag-ibig
tuloy, naghanap ka pa ng iba
kahit ako’y nandito pa.
2Kung bilangin ko ba ang bawat patak ng tubig
na nahuhulog mula sa umiiyak na langit
makikita mo bang pag-ibig ko’y di lamang maliit?
Makikita mo bang pag-ibig ko’y di lamang pilit?
Dahil ang bawat patak ng ulan
ay may kanya-kanyang kahulugan
maging ligaya man o tunggali
kahit matagal man o sandali
Sindami ng ating pinagdaanan
ang nahuhulog na patak ng ulan
Kinaya natin lahat ng hamon sa ating ibigan
sapagkat alam natin na ang kaligayahan
ang ating makukuhang kapalaran.
Kaya ngayon ako’y nagtataka
bakit lahat iyan iyong binaliwala.
Pareho tayong nagkulang,
ngunit ika’y nagtangkang bumitaw.
At bumitaw ka nga, kahit nandito pa
ang nais, kahit nandito pa ang pag-asang
tayo’y tutuloy pa.
3Kay sarap ang tinig ng pagbagsak ng ulan
dahil ang lahat ng sakit at pagod na iyong nararamdaman
ay tila mabilis na nakalilimutan
Bakit di mo na lang ito pinakinggan?
Bakit imbis na sakit at pagod iyong kalimutan, ako pa?
Bakit pa’ko nagtiis ng hirap at pagdurusa
kung sa huli, ito lamang ay mababaliwala?
Ngayon, kailangan kong magpakatotoo
Mahal, maraming salamat sa iyo
sapagkat tinuruan mo rin ang aking isip at puso
na magmahal nang magmahal sinlakas ng
pagbagsak ng ulan
at hanggang maubos ang mga patak nito.
Maraming salamat din sa iyo
sapagkat tinuruan mo ang aking isip at puso
na sindami rin ng patak ng ulan
ang napakaraming natitirang dahilan
kung bakit kailangan na kitang kalimutan.
Hindi na ako maliligo sa ulang
nagpapaalala lamang ng nakaraan
Hindi na ako maglulublob sa baha
bagkus ako’y babangon na.
4Maraming salamat, sinta
dahil ika’y dumating sa aking buhay
at nagdala ng pag-ibig na walang kapantay.
Ngunit tulad ng malakas na ulan
ika’y nawala rin nang biglaan.
Kahit ikaw ang nagbigay-buhay sa aking katuyuan
naging madali para sa’yo ako’y kalimutan.
5Tuwing bumabagsak ang ulan
mula sa makulimlim na kalangitan
naaalala ko nang mabilis
ang oras na nawala ang iyong tamis
nawala ang iyong pag-ibig
tuloy, naghanap ka ng iba
kahit ako’y nandito pa.
- end -
1 note
·
View note
Pagkapit
1Sa dinami-rami ng inyong pinagdaanan
wala nang tatalo sa inyong kaisahan
pero nakikita kong kayo'y nanginginig na
nawalan ng tiwala sa isa't isa
ang dating pagkasamang masaya
ngayo'y kay lamig na nga
pero bakit? Bakit nga ba nag-iba?
2Ang pag-ibig ay tulad ng
pagsakay ng dyip na puno na
Kayo'y kakapit na lamang sa pag-asa
na hindi kayo babagsak
Kahit minsa'y di niyo kinakaya
dahil sa sikat ng araw
na uminit sa bakal kung saan kayo nakakapit.
Pero kailangan niyo pa ring humawak
sapagkat mas masakit bumitaw at bumagsak
Kahit masakit na, kahit kayo'y magdurugo na
walang titibag. Walang susuko. Walang bibitaw.
3Hindi man parehas
ang iyong mahalan ngayon kumpara sa dati
Pag-isipan. Kakayanin niyo bang bumitaw?
Kakayanin niyo bang mawala sa piling ng isa't isa
dahil lamang hindi niyo matanggap
ang inyong mga pagkukulang
nang buong buo?
Ipikit niyo ang inyong mga mata
at buksan niyo ang inyong mga pusong
tila nagsasarado na
nang maramdaman niyo ang dating
tunay na pagmamahalang naiwan sa kawalan,
ang kawalang dati’y kalawakan
4Nakikita ng aking mga mata
at naririnig ng aking mga tainga
na kayo'y nagpupursigi pa
kahit sobrang hirap na
Nais niyo pang ibalik sa nakaraan
ang pag-ibig ninyong magkasintahan
Ngunit kayo'y natagpuan din
sa pagitan ng pagkapit at pagbitaw
hindi alam kung magtutuloy pa
o sa sakit ay maglulublob na
5Kumapit.
Kahit anumang mangyari, kailangang kumapit
Ipadama niyo sa isa't isa
ang natitira pang tamis sa mga puso niyong nabubulok na
Kumuha ng lakas para tumuloy pa
imbis na hayaang mawala na
ang pag-ibig inyong dating
parating hinahandog nang lubusan,
ang pagmamahalan niyong magkasintahan
Mawala man ang mundo
at lahat ng taong nakapaloob dito
kailangan niyong ipadama
ang pag-ibig niyong dakila.
6Kumapit at kumapit
kahit saktan man kayo nang sobra
ng mga hamon sa inyong ibigan
sapagkat hanggang may nais, may pagmamahalan.
7Ang pagkapit sa pag-ibig ay isang biyaya
Ibig sabihin ay pinapahalagan ninyong dalawa
ang bumuo sa inyong matamis na saya
imbis sa pagmamataas sa inyong mga sarili
na hindi nga kumpleto kapag wala ang sinta
at ang lubos na pagmamahal na kanyang dala.
Kumapit nang maligaya
Ang inyong mundo ay umiikot
sa mga salitang "Mahal kita."
--- end ---
0 notes
Totoong Katapatan
1Nakapagtatakang isiping
ang mga luhang kasinglawak ng karagata’y
nasayang dahil lamang
sa mga salitang akin ka, sayo ako.
Dito nga umiikot ang bawat relasyon
ngunit, bakit selos ang nababaon?
Mula sa matamis at masayang konsepto
mga walang kwentang pakiramdam ang nabuo
dahil sa pagkasara ng busilak na pusong
umiibig sa kapwa, at di lang sinta.
2Ang pag-ibig sa kapwa, at di lang sinta
ay tila nakalimutan na
sapagkat ang turing ng mga tao sa salitang katapatan
ay pagmamahal nang walang hanggan
at ang pagsara ng puso’t diwa
sa lahat ng kabilang sa kabaligtarang kasarian
sapagkat akin ka, sa’yo ako.
Hindi na hinahayaang ipahayag ng mga tao
ang nilalaman ng kanilang isip at puso
at sa sarili nila’y magpakatotoo
sapagkat akin ka, sa’yo ako.
Ito nga ba ang tunay na hiling
ng mga pusong mayroong kapiling?
3"Mahal kita at wala nang iba."
Tila di na naiintindihan nang lubusan
ng mga batang nagmamahalan
ang totoong kahulugan
ng naituring na kasabihan.
"Kung ika'y magmahal, ang ibang babae
ay wag mong kakausapin!
Magseselos nang lubos ang iyong kapiling!"
Talaga bang ganoon? Hindi ba ito isang
limitasyong humahadlang lamang sa pakikipag-ugnayan
ng tao sa kapwa? Ang tao'y hindi isla.
Ang tao'y may karapatang maging bahagi ng lipunan
upang mamuhay nang masaya
Hindi dapat humadlang dito ang pag-ibig,
gaano man kadakila.
4Ano nga ba ang tunay na katapatan?
Ibig sabihin bang dapat kalimutan
ang lahat ng tao maliban sa kasintahan?
Ano nga ba ang kwenta ng pag-ibig
kung isasara lang ang mga bibig
ng mga taong nais kumibo?
Ano nga ba ang kwenta ng pag-ibig
kung isasara lang ang mga tainga
ng mga taong nais makarinig?
Kung ganoon, hindi ba totoo na
ginawa mo ang iyong sintang isang prenda—
isang prendang nawalan ng karapatang
magtaglay ng sariling importansya?
Bakit? Bakit ganito?
5Bakit ginawang limitasyon ang mahalan
imbis na simula ng kaginhawaan?
Ang pag-ibig ay pagpapalawak
at hindi pagkakaltas ng mga emosyong matatamis
kahit gaano man kabilis maramdaman ang mga ito.
Ang pag-ibig ay pagtatanggap
pagtatanggap ng mga kakulangan,
kakulangang bahagi ng bawat tao,
kakulangang di basta-basta binabago.
Ang pag-ibig ay tumatayo lamang sa tiwala,
kapag tiwala ay nawala
ang relasyo'y manginginig at tuluyang babagsak.
6Nakapagtatakang isiping
ang mga luhang kasinglawak ng karagata’y
nasayang dahil lamang sa mga salitang
akin ka, sayo ako.
7Hangga’t may tunay na pagtatanggap,
hangga’t ang tiwala’y lumaganap,
hangga’t may nais pang tumuloy,
hangga’t ang karapta’y di binaboy,
hangga’t may totoong respeto,
hangga’t may sapat na espasyo,
hangga’t may matamis na pagmamahalan,
mayroong totoong katapatan.
8Itaga mo man sa bato,
at ito ay pangako.
Kung bubuksan ng bawat pares
ang puso at isip na tila nagsasarado,
magiging maligaya muli ang mundo.
- end -
0 notes