Zäck da bini wieder! Und zwar simmer vo armenia us is 'valle de cocora' go wandara. Mit me dänische päärli hemmer de weg eus de weg dur meterhöchi palme bahnt um irgendwo denn zu me ussichtspunkt glange. Nach 10km simmer denn imne 2 mensche- und 2 hunde-seele dorf acho wos es chlises br��tli zur stärchig geh het. Het mi dunkt als wär no nie em andere mensch det gsi. Kei ahnig womer falsch abboge sind. Mer hend denn euses glück wiiterhin versuecht - leider nomal ohni erfolg. Nach 20km zfuess simmer denn wieder bim startpunkt acho - ohni e geili ussicht und mit hunger. De nechschti tag het eigentlich nur us busfahre bestande. 9 anstatt 6 stund simmer det dine verrottet. Weg me umfall ufnere passtrass hemmer also s'spiel vo independiente medellin verpasst :( Als wer das ned scho gnueg schwer z'verdaue gsi sind denn am 10i langsam die andere hostelgäst itrudled. Die einte mit me medellin libli, die andere fangsäng am singe. Ihr chönd eu vorstelle wimmer eus gfühlt hend. I de nechschte paar täg hemmer medellin uf verschidnige weg erkundet. Z'fuess, velo, bus, tram, metro, und gondle. Ja, mer sind ohni ski ine gondle igstige. Es git drü verschidnigi telefericos wo die ärmere viertel mitem stadtzentrum verbindet. Wemmer us de gondle abegluegt het, hettemer au guet in rio überd favela schwebe chöne. Eis huus unstabiler als andere. Blechdach. 2/3-stöckig. Wüki zimli unschöni aber spannendi szenerie. Uf de biktetour hemmer denn aber au no schöni gegende gse wie z.b. de jardín botanico oder früchtemärkt. Was mer uh gfalle het isch es projekt vo 'epm'. Die hend en airbol finanziert. (Air = luft , 'bol' vo 'arbol' = baum -> 'luftbaum'). De wandlet co2 usem umchreis vo 80m i o2 um und betrifft so öppe 60k mensche. Das isch au en mitgrund wieso die stadt zu de innovativschte städt vo de welt zellt. Au öv isch sehr fortgschritte und guet organisiert. Besser als in bogota ^^ A eim tag hemmer no en usflug uf guatape und em piedra del peñol gmacht. Das isch en fels vo wo mer mit 679 steggetritt eh wunderbari ussicht uf de ursprünglich künstlich agleiti stausee het. Wemmer ned zersch holländer, amis und kasache usem weg bitte müsst. Sehr sehr touristisch. S'städtli guatape isch sau schön. Jedes einzelne huus isch bemalt und verziert mit bluemestrüss. Sehr iladend für die touris ... Nach paar täg luege, esse, fäschte in medellin simmer is flugi istige und hocked jetzt i de karibik. De flug hettemer aber fasch um paar minute verpasst. Wenn kolumbianer eimal pünktlich sind denn isches de flugverchehr. Hemmer leider ned drahdenkt :) Also, villicht schribi nachme piña colada am strand nomal en iitrag. Susch bis bald :)
1 note
·
View note
San augustin isch vor allem bekannt für mehreri dutzend statue wo öppe 1000 v. Chr. gfertigt worde sind. Für me infos kontaktiered bitte de felix 😂😂 Nei spass beiseite. Für historiker und archäologe muss das s'paradies uf erde sie. Ich bi vor allem vo de natur fasziniert gsi. So wiit s'aug reicht grüeni wälder und wiese. Zwüscheddinne immer wieder chlini 'fincas'. Mer hend i so einere übernachted. Sehr pflegt, tischtennistisch, pool , resti. Leider hemmer aber ned vo allem chöne profitiere will mer am nechschte tag scho wieder hend müsse uf neiva zruggfahre. Es wiiters mal simmer mit esse verwöhnt worde. Dasmal mit tamales. Das isst mer zum zmorge oder zmittag und bestaht us riis, ei, rind, poulet, herdöpfel u.ä. Am abig simmer mit paar cousins vom francisco und bekannte go tschuute. Eifach numme geil. Au wenns de felix und ich voll cheggt hend hettis niveau scho no chli höcher chöne si. Trotzdem isch wüli top gsi und ha sogar no es nati-libli vo kolumbie ergattered 😍 Momentan befinder eus i de 'zona cafetera' in armenia. Hüt simmer ufe kafiplantage. Da wird sogar ich zum kafi-fan. Wieder mal e umwerfendi natur, agnehmi 25-30 grad und 'gente muy amable'. I die lokale lüt verliebt mer sich eifach. Eifach so offe, guetherzig, hilfsbereit, witzig, interessiert und eifach herzig. Susch denki mer amigs dass e diskussion oder au smalltalk oft zimli erzwunge würkt. Aber da tuscht mer sich eifach us. Mer erfahrt vom gegenüber vieles über kultur und gschicht aber au eifach übers alltagslebe, sodass mer sich stundelang mitme früsche kafi ( ja ich ha mich zwunge , kafi ztrinke) chönd underhalte. Top top top!!
1 note
·
View note
Mittlerwiile simmer vo bogota wiiterzoge. Am leschte abig simmer mitem francisco (2. v.t.), zwei cousin und fründinne in usgang. Zersch isch electronischi musig gloffe. Hani ohni müeh chöne mithebe (wills ja ned aspruchsvoll isch). Denn simmer aber plötzli uf salsa, bachata und co umgstige .. - Ja de gedankestrich seit alles. Schlechti und gueti gfühl. Schlechti will de felix und ich eifa h nöd wüssed was mache ( ja mama tanzschulen sind so toll!!) Gueti gfühl wills eifach geili musig isch und all um dich ume super druf sind. Als wäri ned scho gnueg mit de situation überforderet gsi schickt de eint cousin sini fründin zu mier und scho bini im seich. Zum glück het sie mich den gführt und denn ischs no halbwegs gange. Macht u huere spass isch aber au sau astrengend. Vor allem wenn sie öppe 1.50 gross isch (ganz links) und darum mini wädli zimli beasprucht werded. Ich wird sicher no vill tanze müsse/döfe und ich hoff dassis vo mal zu mal besser in griff bechum!! Obwohl de francisco scho fasch en 40er ufem puckel het und de rest vo de truppe au scho es rechts alter ufwiiset hettmer chöne meine sie seget sie eh und je eusi kollege. Hend eus super ufgno, tanze bibracht, ghulfe wos au numme gaht und natürli vill spanisch mit eus gredt. Vier vo dene chömmed us neiva, was öppe so isch als würsch als appezeller me walliser 'züeluse'. Han also recht müe ka die zverstah aber wills kei englisch grest hend hani da müsse dure 😅 Usgrechnet i dem neiva simmer jetzt, bi de tante vom francisco, wo eus au mit offne arme empfange het. Willmer so spat cho sind und sie au scho sicher 65 isch hemmer denkt ischs sie scho am schlafe und mer münd eus es hostel sueche. Aber - dem sei nicht so! Sie isch mit paar kolleginne ufem balkon am spille gsi und wosi gmerkt het dassmer hungrig sind het sie eus schnell znacht kocht. So lüt hani gern!! Wills da am tag aber bis zu 40 grad werde chan gömmer morn scho wiiter uf san augustin. Auf ein weiteres!
1 note
·
View note
I de letschte täg vor mim flug bini denn no in quito gsi. Han es super hostel ka zum alles chli usschwinge lah. So 5 oder 6 täg vorem flug hani mich iwie gfreut eu all bald wieder zgseh. Aber denn am letschte abig, womer all mit me bierli uf de terasse ghockt sind und gschwätzt hend bis eus d'auge und d'müler zuegheit sind hani gar nümm wölle hei gah. Die ziit isch so schnell verbii gange. Das isch mit leider ersch bewusst worde woni denn sletschte mal is bett gheit bin und bitzli zum denke cho bin. Ich wird uf jede fall bald wieder starte wills s'lebe mitme rucksack so andersch isch, so spannend, so neu, abentürrich, gsellig, ja es git gar ned gnueg wörter zum das beschriebe. Wett allne danke wo die reis besser und besser gmacht hend ( was die zwar ned lesed, aber dassis gseit han) und dene, wo mich ga lah hend. -> ja mama, es war nicht gefährlich!! Saludos, Claudiús
1 note
·
View note
De dschungel - das het mi scho immer fasziniert. Unberührti wälder, mysteriösi flüss, und unendlich vill planze und tier. Dass mis erste tier denn en amazonasdelfin isch hani aber trotzdem ned erwartet. Nach 3 stunde ufem amazonas simmer i de nicky lodge acho. Innere chline lagune hemmer denn chöne usem kanu usstige und sind mitnere warme supp empfange worde. Aso wenn d'ecuadorianer eis chönd, denn ischs suppechoche. Ja es dönt simple, aber ich han da nöd eimal die glich suppe zweimal g'esse. Zrugg zum dschungellebe. Mir sind denn gwarnt worde, dass mer den ned verschrecke sölled wenn mal en frosch oder e spinne uf de wc schüssle si sött. Und wemmer im dunkle umelaufed immer mit taschelampe weg de schlange. Woni während em znacht e vogelspinne a de decki gse han, hanni die warnige denn dankend ernst gno. 100 meter vo de hüsli entfernt hets denn en chline steg uf me siiteflüssli vom amazonas womer au go bade chan. Us angst vor me kaiman hani denn aber nomal nahgfrögt. I de lagune womer acho sind hets nämli kaiman. De agstellti het denn aber gseit, dass s'siiteflüssli es flüssends gwässer isch und d'kaiman eh stilli lagune vorziend. VORZIEND!! Das bedüted no lang ned dass si ned i dem siiteflüssli sii chönd. Bin denn aber trotzdem mit de liane is wasser gsprunge, nachher aber schneller als de michael phelps as ufer gschwumme. Am morge vo me wiisbrusttukan gweckt zwerde isch chli schöner als vo BÄ BÄ BÄ BÄ BÄ. Morge- und abigstimmig isch wunderschön im dschungel. Vögel zwischtered, grille grilliered und ab und zue en aff wo schreit. Ich wird jetzt da ned alli tier ufzele woni gse han, für das hani es foti vo de lischte gmacht. Am zweite abig simmer go piranha fisch gange. Leider bini ned ganz so erfolgriich gsi wie de marsupilami :) Zwei kaiman hemmer denn spöter au no gseh. Mit taschelampe hemmer usem boot uselüchte müsse dassmer die rot reflektierende auge gseh chönd. Am tag 3 simmer am 5:30 uf de fluss usetuckeret und verschiednige affe endteckt. Chönt stundelang ufem böötli hocke und dene gsellige entertainer zueluege. Leider het eus denn en amazonasdelfin vom affe-beobachte abglenkt. Insgesamt eh super erfahrig gsi!! Sicher öppis vom beste woni i mim lebe gmacht han :) Jetzt bini no 6 täg da, evtl gahni no es fuessballspiel go luege :)
1 note
·
View note
Verzellrundi
Bin jetzt überme monet da z'südamerika und ich wür sege hami scho zimli ahpasst. Vor allem as esse. Han scho es wiili kei dünnpfiff me ka :) Bis jetzt laufts rund. Verdammt vill cooli lüüt hets. Schad dra isch, dassi vill nie meh wird gseh ... Cha ja ned all go bsueche. Und immer wieder triffi wieder paar woni vor 3 wuche kenneglernt han. Eini us tschechie hani scho 4 mal troffe (un- und absichtlich verstaht sich ;)) Zrugg zum esse: isch supergünstig. Han welle uf me märt da z'ecuador mit me dollar 3-4 banane poschte. Isch ned gange. Für ein dollar hetti de ganz struch mit 20 banane chöne ha. Aber das schaffi ja nie!! Aso hani mer denn für 2.50$ eh suppe, hauptgang, dessert und es getränk gönnt. Ich glaub da nimm sogar ich zue!! Was ich numme einigermasse cool find, isch d'ahzahl auge wo mich jede tag alueged. Wenni mal ned amne touri ort bin hani d'ufmerksamkeit vo jedem lebewese mit me funktionierende aug. Blond, hellhütig und attraktiv. Irgendwenn isch mer das denn unagnehm worde und han mi halt welle as alltags-verhalte ahpasse. Also: autos haltet bim fuessgänger ned ah. Das heisst sobald' e lucke zwüsched zwei strassespure gsehsch : los! Aber ned renne! Gemächlich laufe, will du us de langjährige erfahrig ja weisch dassd ned under dräder chunsch. Und das laufe muss usgseh wie wenn de james bond öpper verfolgt. Du weisch aso, dass schlussendlich am ziel achunsch, spillsch aber mit dim lebe. Ich bin aso scho paar mal zwüsched zwei nebedenand fahrende auto gstande, numme zum cool sie und echli weniger agluegt zwerde. Sobald die iheimische nämli gsehnd, dass du laufsch wie sie, stuuneds grad chli weniger. Oder umso meh. Zweite trick: ÖV: die büs da fahred scho ufnere bestimmte linie aber du weisch ned wenn. Eifach ane strass stah und winke sobald die richtig nummere chund. Denn istiige und 25 cent für egal wie lang zahle. So eifach ischs. E chli möchtegern-iheimisch si isch also zimli cool. Erstens fühlsch die vill meh verbunde mit nere stadt ( au wennd innerlich jedesmal denksch: bitte bus, halt ah; oder bitte auto, überfahr mich ned). Zweitens chund der denn die grossstadt gar nümm so hektisch vor. Die meiste wo mich agügsled sind neb de frau chlini chind. Die chömmed us em stuune amigs fasch ned use. Wow, so en geile siech, oder wow, ao wet ich au mal werde. Nei; spass beiseite. Uuh herzig. Paar seged es fröhlich ¡Hola!, paar sinds schüch mir numme id auge zluege. Angseh vo de lüüt und em esse isch au alles im grüene bereich. Für natur- und tierfreaks das paradies. Han selte es land gseh wod d'natur so fescht variiert wie z'peru. Strand, wüeschti, wälder, seeä und berge. Ja sogar schnee hets da une!! Und leon: überall wod aneluegsch en neue vogel. Ich han imfall scho villmeh gseh als du!! 😘 Jetzt döfi nomal en knappe monet da une verbringe bevor denn en cervelat oder zürigeschnetzlets dihei uf mich wartet. Es grüsst Claudio (Pizarro)
1 note
·
View note
S'image vo Huaraz isch aso tatsächlich grettet. Unglaublich geili natur. Fasch so wie i de schwiiz!! Für die wo vor minere reis gseit hend, peru seg gföhrlich und ich muss unglaublich ufpasse: ihr hend recht. Aber ned weg de mensche. Weg dene scheiss hünd!! Zwei mal hani mitbecho wie paar meter vo mir empfernt öpper bisse worde isch. Ich selber bin bis jetzt zum glück numme verfolgt worde. Üner gfühlti 5 minute!! Und da i dem chline städtli hends halt leider kein impfstoff geg tollwuet. Also hend die zwei arme eh 7-stündigi fahrt uf lima müsse überstah bevor's d'nadle becho hend. Truurig aber wahr...
1 note
·
View note
Huaraz
Ufem weg richtig norde bini denn nomal für e nacht is gliche hostel in lima willis bi minere akunft so gnosse han. Obwohls numme für e churzi nacht gsi isch het sichs glohnt :). Will all vo Huaraz vertellt hend bini jetzt aso da. Ich bin aber entüscht. Ussert de wunderschöne wanderige het de ort glaub nüt z'büte. D'stadt gfallt mer bis jetzt gar ned und es het numme wenigi backpackers. Und die wo trotzdem da sind reded französisch ?! Hetti doch mal i de schuel besser ufpasst. Ich han aso für die nächschte zwei täg zwei wanderige buecht wo's image vo dere gegend rette sölled. Am 20. gahts denn uf Mancora, vorussichtlich mis letschte ziel in peru. Isch eh chlini stadt am strand mit super traveller, munklet mer. Freufreu 😍🎉
1 note
·
View note
Als 25-jährige afgan bini denn am 5 am morge dur de igang dunne in aguas calientes spaziert. Am 5.50 bini obe acho. Als eine vo de erste hani no d'rueh döfe gnüsse, bevor s'klick vo de japanische fotiapparät nümme z'übertöne gsi isch. Nene so schlimm ischs denn au ned gsi. Es het mi überascht wie lang mer dur das weltwunder cha laufe. Nach 2h stege uf stege ab hani immer wieder neus entdeckt. Amigs zerbröcklet, amigs perfekt gstaplet - die steikreatione hend mi fasziniert. Au wennis uf fotis scho tusigma gseh han, isch es mit de auge eifach nomal schöner. Die details, die kreativität, die wiit fortgschritteni gsellschaft i verschidnige bereich - mer chund nümm usem stuune use. Drum ischs au so schnell verbii gange. Jetzt hocki scho wieder im gliche hostel und wünsch mi zrugg uf machu picchu.
1 note
·
View note