mydairys-blog

[mydairys-blog]

صباح الخير، كل ما تبتغي يكمن في الجانب الاخر من الخوف :)

[mydairys-blog]

١٢ سبتمبر

الجو كان حلو اوي بارد وكانت السما بتمطر، بداية يومي كانت برسالة من صديقي المقرب وهو بيقولي يلا نتقابل عشان بقلنا فترة ماشوفناش بعض واتكلمنا، وصلت الشغل وخلصت كام حاجه وبعدين استاذنت ومشيت عشان اقابله، اكلنا وبعدها قعدنا في مكان لطيف وشربنا قهوة واحنا بندردش شوية عن العلاقات الإنسانية و واجبنا إتجاه الناس اللي في حياتنا، بحب جدا اتكلم معاه وبستفيد منه وحديثنا بيبقي مثمر جدًا، خلصت اليوم و وانا مروحة طول الطريق بقول في دماغي قد ايه مقابلة الصديق بتبقي احتياج مش مجرد رفاهية ف ربنا يخلي لاي حد في حياته صديق بيكون ليه ملجأ من هموم الدنيا وغلستها :)

[mydairys-blog]

صباح الخير، كُل نفسك قبل ما حد ياكلك :)

[mydairys-blog]

١١ سبتمبر

يومي بدأ عادي روحت الشغل ولحقت البصمة من غير ما اقع على السلم زي امبارح، اليوم كان عادي لحد لما صديق ليا كلمني وقالي يلا نتقابل ونتغدى سوا، قولتله يلا بينا، روحت البيت غيرت ونزلت تاني، قابلته وهو من الناس اللى وجودهم خفيف وابتسامته جميلة جدا، اكلنا فطيرة وكانت جامدة، بعدها طلعنا روف توب وفضلت مستغربة من ستايل الجيل الجديد وطريقتهم فى الاحتفال والانبساط، بس الحلو فى الموضوع ان السما كانت صافية وشكلها حلو و يفتن، خلصنا العقدة على صوت ام كلثوم وهى بتقول يلا نعيش فى عيون الليل :)

[mydairys-blog]

صباح الخير، اللي علمك السهر سابك ونام :)

[mydairys-blog]

صباح الخير، كانت ضحكتها حلوه عكس الظروف :)

[mydairys-blog]

٩ سبتمبر

الأسبوع اللي فات كان مليان أحداث وناس كتيرة قبلتها ، بس بالرغم من احداث حياتهم وتفاصيلها اكتشف حاجه مشتركة بينهم وهو احساس الفقد والحاجة لشريك سواء بقي كان صاحب او شريك حياة، النهاردة كعادة كل اسبوع قضيت النهار فى مطبخ البيت فى المنصورة واللى بحب فيه انه بيدخل ليه الشمس من الشباك ودا بيديني احساس بالدفا، خلصت تحضيرات الاسبوع واتغديت ونزلت اركب عشان ارجع القاهرة، وصلت واخذت شاور هادي وبعدها حضرت العشا واتفرجت على السبت الممتاز وكلمني احد الاصدقاء وكان بيتكلم عن الانتحار وقد ايه هو شايف انهم ناس ضعيفة من وجهة نظره، اديته اللى فيه النصيب من الكلام وقفلت معاه، يومي خلص وكنت فعلًا مرهقة جدًا :)

[mydairys-blog]

صباح الخير، عندي كمية أحداث عايزة ادونها :)

[mydairys-blog]

هناك فتاة تشبهك على istagram ، تعيش في لندن.

جئت إلى مصر وكنت في القاهرة ، إنها مدينة جميلة جدا

القاهرة جميلة فعلاً، نورتنا يا أنون 🤍

[mydairys-blog]

صباح الخير والله انا نفسي اتفسح معاكي دايما وعلى طول ومش عارف ازاي اكسب درجة الثقه دي

طب بذمتك عايزيني أثق في أنون، دا كلام 🤷🏻‍♀️

[mydairys-blog]

مرحبا، أتمنى لكم يوما لطيفا

هل تعيش في لندن

؟

أهلا يا أنون،

لا عايشة في مصر، بس نفسي اعيش في لندن :)

[mydairys-blog]

صباح الخير، عايزة أخد نفسي وأتفسح :)

[mydairys-blog]

٣ سبتمبر

يومي النهارده بدا بالشغل والحمد لله لحقت البصمة من غير ما اكون بجري، خلصت حاجات في الشغل واستاذنت ساعة بدري عشان اشوف صديق غالي عليا جدا في وسط البلد، اتغدينا وبعدها شربنا قهوة وكان بيحكيلي موقف مر بيه من فترة قصيرة انا فضلت اسمع ليه طول ما كان بيتكلم بس حقيقي انا كنت مصدومة جدا من اللي بيقولوه ونظرة الحيرة واللوم في عينه مقدرش اعمل معاهم حاجه وقفت عاجزه ومصدومة، خصلنا كلام وحاولت علي قد ما اقدر اخفف عنه حتى لو بضحكة بعدها روحنا زاوية نشوف فيلم نزوح، الفيلم جميل اوي ويستحق المشاهدة، خلصنا الفيلم وقررنا بعدها نروح جاليري بس توهنا وجوجل حرفيا دخلنا في حيطة، روحت اشتري حاجه خاصة بديكور اوضتي عشان عايزه اجدده، وطول الطريق وانا في المترو كان في دماغي سوال ازاي نتجاوز الفقد بعد الفقد؟!

[mydairys-blog]

صباح الخير، وعملت ايه فينا السنين؟

[mydairys-blog]

٢ سبتمير

اليوم النهاردة كان خفيف ولطيف صحيت من النوم رتبت اوضتي وحضرت الفطار، فطرت مع ماما وفريدة، شاركتني فريدة تطلعتها للسنة الدراسية الجديدة وقد ايه متحمسة ليها، خلصت فطار وبدات ارتب الشقة واحضر الغدا، عملت صنية بطاطس عشان بابا بيبحبها من ايدي، بعد ايد ماما طبعًا، اتغديت ونزلت روحت الموقف عشان اركب وارجع القاهرة، وصلت وبدات ارتب اوضتي وكان فيه شوية حاجات في مطبخ عملتها، بعدها اخد دش دافي وهادي وحضرت العشا وكنت باكل وانا بتفرج علي السبت الممتاز، بس بقاله حلقتين بايخ شويه، خلصت يومي وفي دماغي سؤال فريدة هتعمل ايه لو رجعت المدرسة وملقتش صحبتها اللي بتحبها موجودة ، :)

[mydairys-blog]

صباح الخير، كلهم ملايكة :)

[mydairys-blog]

شكرا.

ما هو اسم حساب الانستغرام الخاص بك

على الرحب والسعة يا أنون✨

عذرًا لا يمكنني مشاركة اسم حسابي على الانستغرام فى العلن، فهو مخصص لبعض الاصدقاء المقربين لي🤍