yahoogossips

[yahoogossips]

好人好事 熱心港男6個步驟解救攝腳男童

好人好事值得多啲人知!一名港男於個人FB專頁講述一次長途機上，點樣運用專業知識解救一名小朋友嘅經歷，仲獲航空公司出信表揚!

呢名熱心港男係FB專頁「肌本野 Spartant」版主，日前以「飛機上的街頭智慧」為題出post，指搭飛機由香港往芝加哥期間，突然有名男童尖叫，原來佢隻右腳攝喺座椅動彈不得，家人同其他乘客都試過幫手，夾硬抽隻腳出來都唔得，反而令小朋友更加驚。事情擾攘近20分鐘，連機艙服務員、機長都上前了解，拆埋張凳都係搞唔掂。

港男即上前表明自己係運動科學專家，與另一名外國物理治療師及內地醫生希望可以幫到男童，並用以下6招成功解救攝腳男孩:

1.與小孩建立互信關係

港男指當時見男童受到一輪「粗暴對待」而受驚，決定首先同小朋友建立關係，幾番努力後彼此終有互信。

2.觀察攝腳原因

港男探頭睇睇男童小腿攝喺邊個位置，並摸清楚座椅結構。

3.妙用隨身物

港男從handcarry背囊拎出凡事林，再去廁所溝番梘水，搽落男童隻小腿。

4.鼓勵男童移動

港男知男童怕痛，鼓勵男童跟佢慢慢做臀部內外旋轉、踝關節上下郁動等小動作，方便檢查有冇足球虛位。

5.確保男童肯跟隨指示

港男到呢一步其實已經有把握，溫柔問男童「兩個選擇，我幫你或你自己處理」，結果如佢所料，男童叫港男幫手。

6.成功解圍

一次膝及髖關節屈曲下，最終無痛抽出男童小腿，港男開心到攬住男童同埋媽咪，仲話「第一次覺得自己讀教育，同埋Movement嘅知識可以危急下派上用場」。

#話時話 #column #lifestyle

[yahoogossips]

奶奶vs工人湊B 港媽分析3大優劣

兼顧家庭與事業，係在職媽媽嘅難題。有港媽於「香港討論區-女性頻道」發帖，問「如果俾你揀，會揀將仔女俾工人姐姐定奶奶湊？」立即引起一堆港媽瘋狂回覆!

第一二個留言已經突破盲腸:「各有各衰，自己湊」、「自己生，自己湊」，港媽表示認同，但就解釋「總要有休息時間，想有個人幫下手」，其實港媽喺帖文都有分析由奶奶或工人照顧BB嘅3個分別:

1.家用 VS 出糧

港媽表示:「工人要出糧，奶奶都要俾家用。」有網民引用「經濟學原理」，認為反正一定要俾奶奶家用，當然要物盡其用，支持奶奶湊。

2.做錯事可唔可以鬧?

「工人做錯事，我哋可以鬧；但奶奶做錯嘢唔可以鬧，只能忍耐，因為佢係長輩；有時候仲會俾佢鬧返轉頭，條氣好唔順。」港媽坦白說。有網民即刻反駁:「工人係鬧得，不過你鬧完唔驚嗎?」擔心工人會虐待BB。

3.上心定寵壞

港媽認為「工人對湊小朋友未必會咁上心，而奶奶湊孫會上心啲」，但隨後有網民回應指「奶奶會以為個b係自己嘅，煩又趕唔走，中伏架，小心」，港媽認同指「我都有呢個感覺，當正係自己生咁，我都驚個B會當左奶奶係阿媽。」有媽媽直接留言「慈母多敗兒」，認為奶奶會寵壞孫仔，唔係好事。

奶奶、工人湊B各有支持者，亦有過來人表示 why not both?「唔可以工人做錯慢慢教，奶奶就客串形式照顧嗎?工人做，再由嫲嫲做監督。咁工人又無得出古惑，嫲嫲又唔需要太辛苦」。有港媽媽表示最好由婆婆湊，既係自己人，又唔駛好似奶奶咁就住唔敢鬧，對住自己阿媽有咩唔滿意都可以照直講!

圖片來源：BB來了

#話時話 #column #lifestyle

[yahoogossips]

見到呢個狐狸Logo 就知係瑞典品牌Fjällräven出品！

品牌旗下最為人熟識嘅產品，必數周街都有少女揹住嘅Kånken背囊系列，被譽為瑞典國民包，除了最多人用嘅Classic尺寸，另有No.2、Lapton 13"、Lapton 15"、Lapton 17"、Big、Maxi同埋Mini多款唔同size，近日品牌推出全新成員-Kånken Sling系列，尺寸比Mini仲要得骰，而且唔係背囊斜揹袋款，立即引來勁大回響!

Kånken Sling系列斜揹袋長20cm、闊15cm、深11cm，比起Mini長29cm、闊20cm、深13cm仲要細，連iPad都擺唔落呀！雖然size細咗，但依然夠實用，除咗前方有拉鏈間格，側面及內層也與其他狐狸背囊有夾層及收納位，是次斜揹袋後方亦新層夾層，超方便。

系列首先推出8種素色款，包括霧灰、石墨、黃褐、粉紅、酒紅、海軍藍、軍綠及霜綠色，除咗粉紅同黃褐sharp色啲，其他都比較中性平實，不過預料品牌好快會陸續加推唔同配色，未有你心水色都唔駛唔開心住。

售價方面，專門店賣緊$700，同Mini同價，抵唔抵買就見仁見智喇，計我話，最好就係出款背囊、斜揹、手挽3用袋，咁就皆大歡喜啦!

圖片來源: Fjällräven

#話時話

[yahoogossips]

甜品控留意 Lady M千層蛋糕含反式脂肪可致冠心病!?

Lady M千層蛋糕向來係港女至愛，不過如果同你講食多幾件會增加患冠心病風險，你哋仲敢唔敢食?

最近消委會與食物安全中心合作，抽取市面上8款蛋糕樣本作反式脂肪測試，結果顯示平均反式脂肪含量為每100克0.41克，當中以「超群」牛油切餅最高，每100克含1.1克，其次係「聖羅蘭餅屋」牛油蛋糕及「Lady M」千層蛋糕，每100克分別含0.62克及0.56克。

以世衞和聯合國糧食及農業組織建議，以每日攝取2,000卡路里嘅成年人為例，其反式脂肪攝取上限為2.2g，換言之，淨係食兩件聖羅蘭牛油蛋糕，已超過上限!Lady M呢?食4件就超標喇...睇返麥當勞薯條都係含0.17克反式脂肪，一件千層蛋糕就有0.56克，係薯條嘅4倍!如果每日反式脂肪攝取量都超標，患冠心病而死亡嘅風險，就會增加28%!

至於飽和脂肪數據方面，Lady M更加係榜首，含量最高，每100克有12克!其次係聖羅蘭餅屋牛油蛋糕及超群牛油切餅，每100克分別含11克及10克。飽和脂肪會增加血液內嘅「壞膽固醇」，提高患上各類心臟疾病風險。狂食Lady M嘅港女們，都係適可而止啦!

圖片來源: Lady M

#話時話 #lifestyle

[yahoogossips]

DoDo姐鄭裕玲哽咽關心年輕人 那些年「表姐」原來仲喺度

DoDo姐日前喺電台節目《口花多過浪花》入面，講述自己啱啱去咗外國拍咗兩星期電視節目，啱啱先回港，對近日發生香港嘅大事甚有感受，原文如下：「過去兩個星期我去咗第二個地方拍節目，當時收到好多關於香港消息，我睇到好多心痛場面，尤其是我們香港學生及年輕人，呢兩個星期其實我們去好多地方，坐好多車及飛機，但最後一程，亦是我們最盼望一程，因為這一程就是飛回香港，香港係我哋屋企，發生好多好多事，屋企最緊要，我哋...Sorry，I'm getting old，好emotional，我們要珍惜呢個屋企，尤其係學生和年輕人，我好希望香港可以好快回復平靜，我們和平相處嘅狀態。我記得當中我同迪偉傾過偈，我同佢講，其實我覺得我是一個娛樂人，我係一個entertainer，喺一個繃緊嘅情況下，我應該做回我嘅責任，《口水多過浪花》係娛樂開心嘅節目，喺咁樣嘅氣氛下，其實應該發揮我哋作用，我相信好多人都有情緒，even我們去咗兩星期，但都好多情緒牽動，希望我講完呢番說話後，令大家有個半小時鬆少少，開心少少，我覺得已盡咗自己少少責任。」全程哽咽，令人動容。

其實DoDo姐於1990年同張堅庭拍攝一部電影《表姐，你好嘢！》內容講及飾演大陸來港執行任務嘅公安人員DoDo姐、張堅庭，同香港警察梁家輝一同查案嘅故事，內容雖然係喜劇，但當中眾多橋段都係諷刺大陸，當中好多誇張情節，估唔到有唔少已經變成事實，而當中大家由搞笑已變成恐懼。當年呢套戲之所以出現，原來係因為64事件後，大家都想對呢件事有感想，於是透過喜劇去影射，估唔到因而大賣，當年驚人大賣2千萬票房，相當厲害。之後系列續作���一直拍至1994年時第四集，可謂相當吸引嘅系列呢！

相關文章：

專訪張堅庭與歐文傑：從《表姐，你好嘢》到《十年》，同樣的恐懼，不同的審查環境

「地道」星期五影院: 《表姐，你好嘢！》

《表姐，你好嘢》重播 中港反應不同

#話時話 #column #lifestyle

[yahoogossips]

忍無可忍!食飯之外5大乞人憎巴士惡行

巴士車廂貼有告示，要求乘客請勿在車廂內飲食，但仍然有唔少人違反規定。日前，有網民搭九巴時發現附近一名男乘客準備打開飯盒開餐，覺得飯盒氣味影響自己，於是影低擺上網「網絡公審」，並加有「文明乘客」、「車廂飲食」等hashtag，暗指對方唔遵守乘客守則。

仲以為巴士食飯盒會令人神憎鬼厭，點知網民意見兩極，有人同情對方或有難言之穩指「有頭髮邊個想做癩痢」、「睇開啲啦，邊個唔想喺餐廳、酒樓坐低食餐飯啦」、「又唔係影響太多人」等等。

不過亦有網民認為，乘客應該遵守九巴公司訂下嘅乘客守則，其實樓主都講「我明有時真係無時間食飯，但可唔可以搵啲無味嘢呢?」有網民指理解樓主感受:「我易暈車，聞到食物味會更想嘔，食個包我覺得可以接受，一盒飯就有啲過火!」可惜係乘客已經由魚旦燒賣、麵包蛋糕進化到燒味飯、鳯瓜排骨飯、炒麵...陣味有時真係好難頂!

除咗食飯，以下幾樣行為一樣令人討厭，唔知身在巴士嘅你有冇同感?又或者你都曾經做過?

1.1個人霸2個位

明明畀1個人車費，偏偏就霸2個位，自己坐1個，手袋行李坐1個，開口要求讓位都可以無動於衷!

2.親暱舉動

情侶們情到濃時，蜻蜓點水kiss係OK，但進一步仲脷、摸身摸勢嘅親熱動作，都係落車返屋企先玩啦。

3.飛「腳」過河

見到對面位無人坐，就好自然伸對腳上去，識除鞋算好，有時會連鞋放上櫈，伸直個人瞓!

4.煲電話粥

搭長途巴士冇帶earphone就慘喇，遇著隔離位由上車傾到落車，打工仔都係想趁放工時間眠一眠，小姐點解你要咁多口水呀?

5.剪指甲

終極討厭!最怕聽到剪指甲「噠噠噠」聲，總覺得指甲碎會彈落自己身上，周身唔自在!

圖片來源：Tai Po 大埔 FB 專頁

#話時話 #column #lifestyle

[yahoogossips]

港媽惡頂?怪獸港爸一樣咁麻煩!

鬧還鬧，至憎人問候或咒人父母!有網民目擊一名麻煩港爸，因不滿店員催促落單，開口埋口鬧人「死老豆咁嘅樣」，一啲文化都冇!

FB專頁「西客之道」刊登一篇網民投稿，指樓主早前到一連鎖快餐店打邊爐，前方一家三口落單要兩個牛肉鍋，因餐廳有兩款牛肉火鍋，店員追問時港爸唔耐煩講:「是但啦，牛肉鍋咪牛肉鍋，我理得你有邊款!」之後仲有湯底、粉麵等選擇，樣樣都要擾攘一輪先決定到，後面有客人忍唔住叫3人「諗好先買」!

港爸可能聽到唔憤氣，開始爆seed:「問問問，我要牛肉鍋你落個鍋咪得，問咩啫!」店員解釋揀埋飲品先完成下單，港爸爆粗發難，向收銀處旁經理投訴:「佢死老豆呀，X口X面」，經理保持禮貌，表示後面有好多客人等緊，要求佢先落單，港爸同老婆單單打打:「你睇下咩態度，點做經理，成間公司個個都死老豆咁嘅樣!」

經理面不改容，保持良好態度回應:「先生，我同我同事嘅爸爸仲在生，我哋唔知咩係死老豆咁嘅樣，唔知可以點幫你，麻煩你去後面等叫號碼。」港爸超激氣:「我要投訴你，我依家唔X食喇，食唔X落呀」，經理指可以退款，並稱「我姓黃嘅，多謝你嘅意見，拜拜!」

網民大讚經理EQ好高，唔同麻煩客人理論，亦無向客人野蠻行為跪低!另外網民亦批評「老豆阿媽教壞細路，我係佢個仔真係瘀到暈」、「好討厭啲人去到收銀先諗食乜，又多問題問!」

圖片來源：吉野家

#話時話 #column #lifestyle

[yahoogossips]

小心犯眾憎!睇戲時避免做呢5件滋擾事

迪士尼真人版《阿拉丁》近日在港上映，入得場預咗多小朋友會嘈啲，不過有網民喺FB專頁「生仔要考牌系列」投稿，指當日入場冇遇到扭計小朋友，反而遇到一位離譜家長!

呢位家長可能擔心小朋友聽唔明英文，又追唔上中文字幕，於是將戲中英文對白逐句用廣東話即時翻譯，「聲線仲要係有感情咁演繹個人物」!樓主指雖然家長把聲幾好聽，但呢種行為確實造成滋擾，不過樓主同該名家長座位有段距離，就算發出「sh」聲提醒都冇咩作用，持續到電影中後段先冇再出聲。

唔少網民批評家長行為自私，亦有人搞笑講「精靈，第一個願望幫我將個家長滅聲!」睇戲時安靜、關電話係常識吧，可惜香港實在有太多自私嘅人喇，一齊睇下仲有咩睇戲犯眾憎行為:

1.帶小朋友入場睇唔合適嘅戲

小朋友幾時扭計你唔會估到，如果戲中突然有情節嚇親小朋友爆喊，又或者好似上面例子咁，帶一個唔識聽英文睇中文嘅小朋友睇戲，就算冇即場翻譯咁極端，都好大可能會悶親小朋友，搞到佢坐唔定，騷擾到人又麻煩到自己，何必呢。

2.不停開手機

睇戲前溫馨提示「唔該熄咗部電話喇」，電話響時好應聲，加上場內燈光昏暗，打開電話螢幕發光嘅話，都係會影響到身邊人。

3.踢凳

睇一場戲至少要坐一至兩粒鐘，轉換坐姿在所難免，但都唔好不停踢到前方椅背。

4. 討論劇情

睇戲見到劇情愈來愈緊湊，點知聽到身後有人不停討論劇情，或發問一連串冇必要問題，同樣令人好困擾，我一定會忍唔住同佢講:「睇完戲先講得唔得?」

5.進食聲浪過大

未必套套戲都係音樂界澎湃，如果現場係睇緊套悲情文藝片，食嘢太大聲實在令人難以投入感情。

圖片來源：《阿拉丁》

#話時話 #column #lfiestyle #movie

[yahoogossips]

超崩潰！港男港女誤入salon中大伏

理想與現實，總係有點距離...好多人去salon剪髮電髮都會搵定參考圖畀髮型師睇，但成果往往不似預期，令人無奈!

近日有網民相繼分享亂入髮型屋嘅「慘痛經歷」，一名港男於FB群組「巴打絲打Facebook Club」發文，指早前趁放假去電髮，但因平時幫襯開間髮型屋大排長龍，於是搵間「人少少」、位於柴灣嘅街坊髮型屋，心諗「都係比張相跟住做，應該唔會相差好遠啩」，點知「事實證明錯了」。

明明想電韓仔頭，點知電完攣到似「手指插入插蘇觸電」，港男忍唔住質問師傅「個頭同張相邊忽似」，對方聲稱「未剪啫，剪完就似」，可惜奇跡冇發生，師傅只係剪走部分啱啱電完嘅曲髮，完全對整體造型冇幫助!港男於帖文最後作出溫馨提示:「要搵相熟髮型師整頭!」

男人都仲可以剷青重新出「髮」，女仔剪衰咗真心崩潰!一名港女於FB群組「Tai Po大埔」發文，稱因相熟髮型師退休，近日試下去另一間髮型屋，髮型師係一名後生女仔，港女要求「跟原有髮型收短即可」，點知對方表示因頭髮長咗難以判定原型，「傾完一輪佢都唔知我要乜」，港女唯有網上搵張近似圖片畀佢參考。

港女形容女師傅「毫無章法」，一時剪前面一時剪後面，一邊剪一邊吹，同行媽咪見後尾枕越剪越短感不妥，即時制止對方，港女對師傅「完全失去信心」，即時埋單走人。

返到屋企港女先發現「金翅大鑊鳥」，頭頂被師傅「偷薄」到有幾撮頭髮短至1至2cm，差啲變剷青!認為呢名「師傅」完全唔識剪髮，並以佢本人頭髮做實驗。呼籲大家要小心!

圖片來源：FB群組「巴打絲打Facebook Club」、「Tai Po大埔」

#話時話 #column #lifestyle

[yahoogossips]

朋友電話自動連外母家喇叭播AV  伍家謙:叫外父頂咗佢!

係男人都睇AV架啦，冇咩出奇?不過如果喺外父外母屋企，當住成家人面前睇，就真係過份咗...

早前傳媒人伍家謙於FB個人專頁分享一單「麻甩佬難題」，指自己收到朋友喺麻甩佬群組嘅求救，笑咗半個鐘!

從WhatsApp對話截圖睇，朋友表示自己之前睇完AV直接將手機熒幕鎖上，冇閂瀏覽器，之後同老婆去外母屋企食飯，手機可能因為之前連結過外母屋企個藍芽喇叭，所以手機自動同喇叭sync咗，搞到「一開電話，呻吟聲充斥晒成個廳!」

之後成餐飯氣氛變得好老尷，朋��老婆黑晒面，急問點拆好，同時提到「外父忍笑忍到面都紅晒」。伍家謙認為其實都無咩方法可以拆解，淨係諗到「叫外父捱義氣幫手頂咗佢」，最後希望網民集思廣益救兄弟。

即睇網民有咩爆笑解圍妙計:「打電話畀老死，然後鬧佢唔好成日share埋啲無聊片，會影響人!」又或者推個波畀鄰居:「冷靜咁講唔知邊個連左我個喇叭播埋啲奇怪嘢，上個禮拜播鬼片，呢個禮拜播鹹片，下個禮拜唔知播咩...」亦有網民質疑伍家謙:「通常講得係朋友，都係自己...」

圖片來源：ig@asukakiraran

#話時話 #column #lifestyle

[yahoogossips]

卡路里3色分級 本地營養師自創AI手機App查熱量

提起減肥，好多人會瘋狂做運動，但其實想減肥成功，7成努力靠飲食習慣!

唔少人會搵營養師幫手，教你點樣食得精明，同埋幫你設計 Keep Fit 餐單等。不過唔想下下用幾千蚊減肥，可以download呢個手機App，好似多咗個隨身營養師咁!

近日有本地營養師研發一個名為「Eat Rite by ReHealthier 隨身營養顧問」嘅手機應用程式，用戶要先輸入身高、體重、腰圍、運動習慣等資料，應用程式會幫用家計算每日需要幾多卡路里，仲會分析健康狀況，包括患上慢性疾病嘅風險等。

呢個App最屈機係，只要將手機鏡頭對準餐牌或外賣紙，透過文字辨識技術，可即時顯示餐牌上各種食物及飲品嘅卡路里數值，仲會以唔同顏色分級，食物熱量低於700大卡以綠色顯示，700至1000大卡用橙色顯示，超過1000大卡就會用紅色警告你!

應用程式亦適用於飲品，會以綠、橙和紅色分類熱量低於50大卡、50-100大卡及高於100大卡嘅飲品。近來興起一片珍奶熱，其實熱量同糖分超高，各位飲前不妨check一check!

雖然市面上都有其他手機App提供食物同飲品卡路里數值，但絕大部分都係靠人手逐一輸入食物或飲品名稱，相當費時不便，香港人咁懶，唔係，咁忙，呢個App直接用相機掃描餐牌就得，真係超方便呢!

圖片來源：Eat Rite by ReHealthier

#話時話 #column #lifestyle

[yahoogossips]

女童大意失3千蚊校車費...港媽撰文感謝路不拾遺地盤工人

有港媽於fb群組「Tai Po 大埔」發文，指女兒返學時大頭蝦唔見咗放有$3000幾蚊嘅車費袋，嚇到「喊住打返屋企」，港媽即刻落街地氈式搜索，連垃圾桶坑渠都唔放過都冇發現，絕望返家之際收到學校來電，原來有好心人拾獲車費袋，仲留低聯絡資料以便物歸原主。

港媽形容「嗰一刻真係喊咗出嚟」，立即聯絡對方交收，之後為表揚及答謝好心人，將經po上網，並於文中加入「三千幾蚊慳慳地夠我一家四口買一個月餸」、「邊個話做地盤係粗人」及「香港好在仲有你」等hashtag。

網民紛紛留言大讚呢位路不拾遺嘅好心地盤佬，「仗義每多屠狗輩」、「論人品地盤佬真係好過西裝友」...亦有網民提醒港媽唔應該畀小朋友保管大額金錢，港媽回覆表示指日後都會親自將車費袋交到校車姨姨手。

此外，亦有網民分享自己遇過嘅好人好事，希望傳播更多正能量。講真，其實路不拾遺，細細個老師都有教，將心比己，自己唔見嘢都想有好心人還返畀你，如果你曾經起貪念拾遺不報，唔該你反省下，我深信呢個世界有因果報應呢。

圖片來源：激戰截圖

#話時話 #column #lifestyle

[yahoogossips]

自攜污糟杯買飲品 港女鬧店員「你唔識幫我洗?」

環保議題越來越多人討論，好多餐廳都鼓勵客人少用外賣即棄餐盒餐杯，不過如果自備嘅餐具有污漬，又係咪老奉要店員幫你洗?

近日有餐廳店員向FB群組「西客之道 Hispitality Secret」投稿，任職餐廳歡迎顧客用自攜杯，早前一名食客帶同自攜杯買外賣凍飲時，樓主發現杯內有小量咖啡漬，並指「擺明係飲完冇洗直接畀我哋」，於是建議食客改用紙杯或自行清潔摺杯。

點知對方聽完即變臉發爛，大聲鬧樓主「唔識幫我洗架咩?又話支持環保又唔肯做多幾步?」樓主為免麻煩只好屈服，幫對方洗乾淨隻杯再裝凍飲入去。事後樓主坦言：「係有心環保嘅就唔該唔好攞個勁污糟嘅杯買外賣，食落肚嘅有咩事我哋都要負責!」

唔少網民批評食客：「同環保無關，同人品有關」、「自備杯唔洗就唔應該要人裝落去，肚痛又賴人」，同時亦認為樓主「千祈唔可以屈服」、「屈服=縱容！開頭你又話怕麻煩，最後又叫人擺上網，想點」、「西客堅持咪就咁入落去，我理得你隻杯污糟！」

圖片來源：Starbucks

#話時話 #column #lifestyle

[yahoogossips]

打邊爐無拎籌入座賴死唔走 霸氣經理一句逼走成枱乞客

酒樓打邊爐經常爆滿，食客先拎籌等叫號碼入座是常識吧!有網民早前於FB專頁「西客之道 Hispitality Secret」投稿，指打邊爐時見到隔離有班客人自行入座坐低，若無其事問侍應拎點餐紙。侍應解釋客人入座時會收到一套點餐紙，並反問「你入座號碼飛喺邊?」食客辯稱「張飛一早比你哋收咗，唔畀單我仲要咁多嘢問?」

侍應堅持唔會收走籌號，並向樓面確認，其後表示指門口冇人帶過佢哋入嚟，仲問佢哋有冇聽錯號碼，都算俾足下台階。點知佢哋發難出動西客金句:「叫你經理嚟!」

經理向有關員工查問，確定呢班乞客係自行入坐後，都好客氣咁請佢哋離坐，但佢哋賴死唔走，揚言「我要投訴你，投訴到你總公司，投訴到你哋全部無得撈!」

當網民都以為經理會屈服於呢班無賴乞客時，點知經理大聲回敬:「全部樓面嘅人同我聽住，無我吩咐，無人可以幫呢枱客落單，斟茶都唔可以。唔識守規矩既人無資格係度食飯。」成枱乞客心聽到呆咗，最後「呆坐喺度幾個字就走。」

面就人哋俾，架係自己丟!霸氣經理一句收伏無品客，簡直大快人心!至於經理同樓面員工，樓主表示日前再幫襯時仲見到佢哋，唔駛擔心!

圖片來源：J Pot

#話時話 #column #lifestyle

[yahoogossips]

小王子Archie出世 港媽終於唔使再用Jayden、Kayden喇！

英國皇室又添喜喇，哈里王子同Meghan誕下小寶貝，並取名Archie Harrison；全名則為Archie Harrison Mountbatten-Windsor。Archies呢個名對於香港人嚟講係幾陌生，唔常見，不過原來近幾年係英國都好受父母歡迎，用呢個名嘅BB愈嚟愈多。呢個起源自美國漫畫，講一名叫Archie嘅高中生學校生活。對於港媽嚟講呢，以後肯定除咗Jayden、Hayden、Kayden之外，又多一個選擇啦。

不過咁，睇返英國方面嘅報道，雖則Archie係好受英國人歡迎，2015年嘅改名統計中，Archie係排第80位，但對於小王子改呢個名就唔係咁睇好。本身Archie原來係比較年輕嘅名，代表住可能係一啲年少嘅學生、偷玩嘅青年、學校入面嘅壞學生；Archie呢個名對比起其他小王子George及Louis嚟講，原來係叫「唔得體」，唔夠「Royal」。另外原來有一個名Archibald係比較端莊及「Royal」啲，好多叫Archibald嘅人都會簡稱自Archie，但小王子並非如此，而係直接叫Archie，更加令唔少老一派嘅人大感不以為然。

Meghan原本就被視為比較唔「Royal」嘅王妃，今次幫小王子改名都係用一個親民、甚至話係「通俗」嘅名，其實都幾合乎佢嘅Style。大家又可以準備留名，睇下幾年後喺香港幼稚園叫一聲Archie，睇下有幾多小朋友會認呢。

#話時話 #column #lifestyle

[yahoogossips]

職業無分貴賤？網民話香港做侍應慘過擔泥

細細個阿媽、老師都有教，職業無分貴賤，唔好去以職業論成功「行行出狀元」。近日討論區就有一個好熱烈嘅話題，有網民提出，喺香港做全職侍應根本係無前途，原因在於工時長、人工低、被取代性高等。好多人就話做侍應嘅晉升階梯可以變成經理，甚至有啲過來人分享話自己去咗做酒店F&B，都叫事業有成，更誇張係有啲話自己得到老闆賞識，分埋餐廳股份咁話。但其實呢啲例子都係萬中無一，實際上嘅侍應又係點？不如睇下一位自稱做咗幾十年餐飲嘅巴打講下。

「落場」最無良

香港發明咗一個獨特嘅Term叫「落場」，專門就係用於餐飲業中，亦係最無理最無良嘅情況，無薪嘅情況迫員工離開4個鐘；真係白白浪費時間，令飲食業員工嘅工時隨時超過12個鐘（但當中可能得8、9個鐘係受薪），根本無時間去進修。

人工偏低

唔講普通侍應啦，就算去到上面講嘅經理級，就算做到酒店，原來人工都係3萬左右；你要記住已經係有十幾年經驗，去到呢個行業接近最頂部，都不過3萬多，萬中無一嘅人去到呢個位，人工卻未係十分出色，令人氣餒。

容易被栽

有巴打就話，作為侍應本身已經係被當成「低技術」勞動力，即係好易被人取替，就算係長工任職酒店嘅餐飲部，當集團一有咩風吹草動，最容易被炒嘅一定係餐飲部，因為要請返真係唔難，可以話係完全無保障。

#話時話 #column #lifestyle

[yahoogossips]

Mini Me裝扮教學 母親節潮襯母女裝

天下間所有媽咪睇住自己個囡囡，就好似望住縮小版嘅自己，總有一份莫名喜悅感。現今好多媽媽又後生又貪靚，一於趁母親節呢個大日子，同囡囡襯番個低調又時尚嘅母女裝應下節啦!

1.服裝篇

想話畀人知你有悉心襯過母女裝，首選當然係從服裝入手啦。H&M近日推出好有度假feel嘅親子系列，搭配異國風情棕櫚樹印花、雙色條紋及亞麻等輕盈布料，主打多款連身裙、上衣、短褲、鬆身剪裁套裝同埋連身褲。

2.手袋篇

卡通人物唔係得細路先可以鍾意，好似Hello Kitty同埋My Melody咁，粉絲年齡層由小女孩到做咗人阿媽嘅都有，FURLA最近就同SANRIO合作推出Furla Hello Kitty系列，標誌性鏈袋款Metropolis上印有以星宿、木星及火箭主題印花，另有大頭Kitty同埋Melody款，媽媽揹mini crossbody時，囡囡就用mini cosmetic case，夠哂可愛。

3.首飾篇

做咗人媽咪，同囡囡着親子裝之餘都唔好唔記得湊大自己個媽咪，怕阿媽唔肯同自己襯母女裝嘅話，可以低調從首飾入手，SWAROVSKI全新母親節系列""You are my Sunshine"以簡潔線條及取材自太陽嘅造型，推出可疊戴戒指組合、耳環及可調較長度嘅鏈墜，同系列款式一個戴頸鏈一個戴耳環，再夾埋衫嘅色tone，就算媽媽上咗年紀都唔會say no啦。

圖片來源：H&M、FURLA、SWAROVSKI、Emporio Armani

#話時話 #column #lifestyle