راجعة مش شيفت ١٢ ساعة، جسمي كله واجعني، حرارتي عالية؛ زوري فاشخني ، أوفرويلميد بكل حاجه بدمع في نهاية كل جملة هقضي العيد في المستشفى واروح أبات لوحدي في السكن وزياد عنده شيفت ٢٤ و حاسه بوحدة وحزن قاتلين.
فيه كذا واحد في حياتي كنت بعتبرهم جولز وبتمنى أبقى زيهم وكده، وبعدين يشاء القدر إني أقرب منهم أكتر في الفترة اللي فاتت واخد peek سريع كده على حياتهم من قريب شوية، وحرفياً بعد ما كنت بقول اوعدنا يارب بقيت بقول يارب عافينا.
سمعت Dr. phil من كام يوم بيتكلم عن إن كل واحد عنده personal truth و social mask، البيرسونال تروث هي الحاجات اللي تعرفها عن نفسك، والسوشيال ماسك هي الحاجات اللي الناس تعرفها عنك.
فلما بتيجي تقارن نفسك بحد، بدل ما تحس إنك ولا حاجة، المفروض المقارنة تكون بين حاجتين شبه بعض، مينفعش تقارن بين نخلة وعربية مثلا، مع إن ده بالظبط اللي بيحصل لما بتدخل في موال المقارنات.
بتاخد الpersonal truth بتاعتك، الحاجات اللي تعرفها عن نفسك، واللي هي كل حاجة تقريبًا، وبتقارنها بالsocial mask بتاع حد تاني، الحاجات اللي تعرفها عنه، واللي هي ولا حاجة تقريباً .. فلازم لازم المقارنة تظلمك.
وحرفياً كل يوم الحياة بتثبتلي إن الواحد المفروض يبطل مقارنة خاالص ويتخلى عن اوهام الإنجاز دي، وعشان يرتاح لازم يبص في ورقته وبس.