dalyana

[dalyana]

على احدى وسائل التواصل الاجتماعي المراسل كان بيتحاور مع طفل من حد ما وعي على الدنيا وهو في نكبات سياسية وحروب فترات شد ورخي والحياة بالمجمل شادة والرخاء لا يصنع الا بايديهم لما يقرروا انه حتى لو بحبة شكولاتة انا راح افرح وانبسط واعبي الدنيا الوان حلوة ومزهرة بدي انبسط

قله لما تكبر الطفل رد عليه وقله احنا بنكبرش (بتورية عميقة من قلب طفل عجوز بينتظر الموت) قله المراسل انتوا بتنولدوا كبار(بتورية ايضا ليدل على العزة والجبروت والشجاعة ) ولو نطلع من تورية الطفل والمراسل ونشوف الكلمة بتجرد بنلاقيها صعبة كتير متخيلين الظروف الي انخلق فيها هادا الطفل وحرمته من هاللقب لما يفكر بالموت بدل ما يفكر بالالعاب لما هوايته تبقى الركض اجباري عشان ازا صار اي اشي يقدر يهرب طيب وقدر يهرب وهو طفل جسدا عجوز روحا كيف بدو يهلي الي بحبهم يهربوا بيضطر يتخلى عن الركض ويمشي مع الركب عشان نعيش احنا الكل يا نموت احنا الكل وما حدا يتحسر على حدا

متخيلين العبء الموجود على كاهل ما يسموا اطفال كمية التفكير الي لازم يفكروا وقدرة عقلهم على استيعاب هاي المعلومات

طيب بما تمشي فيه الاسام ويكير زمنا وتعدي الايام وعقله بنفس الدوامة وبتزداد حدة مع كل يوم بعدي شو متوقعين منه يطلع او يصير

بصير عقله كهل في جسد عشريني يانع وملامحه ابدا ما بتقول انه يانع لانه كهولة عقله بتطغى على جسمه كمان

جيل انحرم الطفولة وانحرم الشباب وعايش بدون حياة

#ثقافة #علم اجتماع #فلسفة #فلسفة الحياة #رضا #فلسفتي #مجتمع واعي #ثقة #علم نفس #راحة البال

[dalyana]

زمان كنت مع مبدأ الفرصة والتانية والتالتة وانه مش لازم نكون حادين زيادة عن اللزوم كونه الي بزرع خير بيحصد خير

بس حديثاً اكتشفت انه الناس بطلت قلوبها بيضاء ونواياها سليمة (بدون تعميم طبعاً) ومش كل الناس بتستاهل تاخد اكتر من فرصة وهون عممت انه انت الك معي فرصة وحدة بس سواء بذلت جهد لتخسرها او خسرتها بغير علم مش مشكلتي بذلت جهد يعني مش معني بوجودي وبغير علم يعني مش مهتم تعرف تفاصيل تخليك مكترث لشو المناسب وشو الي مزعج بالحالتين انت خسرتني ولن اعود

انت خسرت وبشكل قاطع جازم فش تراجع فش تردد فش تفكير تاني تم وضع حد ونهاية لكل شيء وراح اعدي عنك وكأنك سراب كائن لم يكن ولم يوجد

ممكن تجمعنا الحياة او الصدف او الطريق وراح توقف قدامي وعيني بعينك ومش راح اكون شايفتك او معتبرتك لانك بايدك قررت تخسرني

#ثقافة #علم اجتماع #فلسفة #فلسفة الحياة #رضا #فلسفتي #مجتمع واعي #ثقة #علم نفس #راحة البال

[dalyana]

بتعرفوا بس تاخدوا قرار عقلاني ١٠٠٪؜ وانت متأكد انه بصب بمصلحتك بس انت كنت متعشم يكون الترتيب مختلف كنت حابب يكون زي ما تخيلته تماما وتقول واخيرا في شغلة زبطت زي ما بدي كم مرة لازم الواحد ياخد الضربة على راسه عشان يتعلم انه مش دائما الامور بتزبط زي ما بدك وانما زي ما هو خير الك

بتحس حالك زي المزروع بغير ارضه بس بتُزهر رغم ذلك و ردة في بستان شوك او شوكة في بستان ورد مش مهم بس هيك ببقى وصف الي بدك اياه شيء مختلف وغير متجانس

بقول الواحد بدوش يتعشم عشان ما يزعل وعشان ما يحبط بس بدون العشم كيف بنعيش بدون الامل والتخيلات وشوية توقعات كيف بدنا نكمل

الحياة مش ماشية تطبطب علينا عشان هيك بنحاول نلاقي ناس وشغلات تطبطب علينا واضح انهم تعلموا من الحياة القسوة والتلاعب بطل حد يآمن بالطبطبة والحنية كله بياكل كله وكل معتمد الخبث حليفه وكله بدور مصلحته بطلت حياة هاي غابة

#ثقافة #علم اجتماع #فلسفة #فلسفة الحياة #رضا #فلسفتي #مجتمع واعي #ثقة #علم نفس #راحة البال

[dalyana]

اليوم كل الي بيدور بعقلي قديش نفسياتنا هشة وضعيفة وشخصياتنا تباعاً لذلك الا من رحم ربي بتكون ضعيفة

بنخاف من المواجهة وبنهرب

بنخاف نواجه الي رفضنا وبنتجنبه

بنخاف نواجه الي بنحبه وبنبعد

بنخاف من حقيقتنا وينعيش بين البينين لا عاملين الي بريحنا ولا مرتاحين بالي صار واقعنا

ليش ما نرضى بالامر الواقع ونواجه شو بده يصير يعني

نندم نزعل نتوجع مش على قد ما راح نندم ونزعل ونتوجع من الهروب

#ثقافة #علم اجتماع #فلسفة #فلسفة الحياة #رضا #مجتمع واعي #فلسفتي #علم نفس #راحة البال #ثقة

[dalyana]

كتير بقلك انه من الطبيعة البشرية بتحب تحس بوجود الجماعة حواليها الدعم والحب والسند والطبطبة بتحب تحس انه في شخص مستعد يبذل مجهود على شان تكون سعيدة ومرتاحة ومشرقة وبطبيعة الحال انت لازم تبذل مجهود مكافئ للي بيعطيك

بس كتير برضو الناس بتستغل هاي الطبيعة البشرية وبتصير تعمل عطاء وانقطاع حضور وغياب وفرة وتصحر لمجرد تطمئن انه انت موجود وثابت في قائمة ناسها الي ممكن تلجأ لك وقت حاجتها

صح انه طبيعة العلاقات البشرية مبنية على تلبية الحاجات بس هادا اشي مختلف تماما

بشع شعور تحس انك خيار في قائمة طويلة عريضة لوقت الحاجة وبشع تبقى مش اولوية من ناس انت متعشم فيهم خير ومتوقع معاملة لطيفة دائمة حتى ولو ما كانت طويلة بالنقاشات والحوارات وانما بالوجود اثبت انك على البال انك موجود مش انك شفاف وغير مرئي

بشع يتم اغراقكك بكمية مشاعر واهتمام واحتواء لفترة قصيرة بعدين انقطاع طويل جاف وتصحر ممتد لمجرد انك دعم احتياط هون قد ما كانت كمية الاهتمام الي ممكن تاخدها راح تحسسك انه انت مش شخص محبوب انت خيار احتياطي عند اللزوم تكملة عدد زي العجل الاحتياط الي بالسيارة اخرك مشوار تقضية غرض وبترجع لمكانك مخفي ومتداري

كونوا واضحين وصريحين وعفويين بكل شي

بتهتم بالشخص اظهرله ما بتهتم تكلفش خاطرك تعبره بسيط الموضوع

بتحبه عبرله ما بتحبه خليك رسمي

زهقان تعلم هواية تتسلاش بالناس ومشاعرهم

مفروض خلص كبرنا على انه نعتبر الناس العابنا الشخصية فهمنا ووعينا انه انت هيك بتضره

أسوأ اشي تحس حالك خيال لشخص تاني او تعبئة وقت فراغ وهادا الاشي عصرنا سمح فيه بشكل كبير

على مستوى العلاقات عصرنا بعلمنا البدل ما بعلمنا الرضا بروح واحد بحي بداله عشرة وهادا الاستهتار بمشاعر الناس غلط ومش حلو وبخلي الناس تنفر وتفضل العزلة على الرغم من انها موحشة بس بتضل ارحم من الشد والرخي والسخن والبارد الي علاقات هادا الوقت بتعتبره قانونها

احتووا بعض ادعموا بعض واهتموا ببعض وابذلوا مجهود عشان بعض بس ابدا ما تستهتروا او تستهينوا او تستخفوا بمشاعر بعض خليكوا صريحين وواضحين اهم اشي ما تعامل الناس وكانهم عجل احتياط او تعبئة فراغ تخليش التفكير ياكلهم ليحللوا شو القصد من وراء التصرف

مع انه الجواب واضح وبسيط ازا تسائلت عن وجود مشاعر فهي مش موجودة بس احنا بنحب نتمسك بالعلامات الصغيرة الي بتعطي امل انه ممكن يكون الاشارات هاي غلط وانه ممكن يكون في اشي حلو ورا كل شي

بس ازا كنت محتار اعرف انه الجواب لا وصدق الاشارات المواربة

#ثقافة #علم اجتماع #فلسفة #فلسفة الحياة #رضا #فلسفتي #مجتمع واعي #ثقة #علم نفس #راحة البال #مجرد فضفضة #فضفضة

[dalyana]

تخلي تجاوز هروب

كتير مرات بتذهلني وبترعبني قدرتي على تخطي الامور الاشخاص المواقف والاحداث كوني شخص مفرط التفكير وقدرتي على الترك مش كبيرة ولا سهلة علي

الا انه وامام اشخاص ممكن يحسسوني بالعدم واللامبالاة والشفافية بحرق مركب ويمشي لقدام وكإنه شيئا لم يكن

مش عارفة هو فعليا تخطي ولا تجاوز ولا هروب ولا تخلي ولا حتى بشتري راحة بالي اكيد مش راحة بالي لانه بفكر كتير بالموضوع بعد اتخاذ قرار التجاوز بفكر بكل شي ايجابيات وسلبيات وسيناريوهات محتملة وبفكر بخطوة التجاوز او حتى الاستمرار

وعلى ارض الواقع الجانبين مؤذيين نفسيا الي سواء كان التخطي او الاستمرار الاثنين بيتركوا علامة في داخليا وكمان باخد وقت للتعافي وبرجع لنفس الدوامة مع اشخاص جداد ومواقف جديدة حتى قراري بالاستمرار بس بيطول فترة الاذى النفسي بعديها بقرر رغم طول الالم انه لا مناص من التخلي

بعديها بفكر انه ليش طولت الامد طالما راح اوصل لهاي النتيجة وبرجع افكر انه ليش برجع لنفس الدوامة طالما انا بالاخر راح اهرب سواء خوف او سواء لاني تألمت او لاني بديش اتنازل ولا اتخلى عن اي اشي بحياتي

بحب فكرة انه الواحد يكون حر زيه زي الطير وحلو يكون كامل متكامل بذاته حلو يلاقي مين يشاركه بس مش حلو يكسروا هاي الدائرة او يربطوها بسلاسل من طرفين ويحشروها بالمنتصف ممكن هادا سبب رئيسي للهروب الي ممكن اعطي مرات مصطلح تجاوز او تخلي او تخطي تجميل وتحسين للمصطلح مش اكتر عشان صورتي قدام نفسي تضل متماسكة وقوية

بقدرش اقول اني ندمانة على هروبي لانه بيعطيني حريتي حتى ولو كانت صغيرة ومقيدة متخيلين كيف تكون الحرية مقيدة تعبير معقد كتابة وفهما بس قيودها بتكون قابلة للتجاوز بس بدها نفس طويل وحرب باردة لتعرف مين اقوى انت ولا القيود الاحتماعية بس بضل اسمها حرية بنطاقك

حتى لو كانت مقيدة بقيد واحد بهروبك بتمنع من تراكمهم واحد ورا التاني الي بخلي حتى الروح تكون تقيلة

مرات الهروب مش سيء السيء انك ما تقدرش تهرب من حالك افكارك وعقلك او ضميرك

الصوت الي جوة راسك وقلبك دائما بيضل يرفع من طموحاتك ويعليها ويخليك تركز على حالك وتقويها وهو السبب الرئيسي الي بخليك تهرب اول ما تحس بخطر التقيد

بتعتقدوا مين احسن الهرب ولا المواجهة

طيب الموقف الي بنهرب منه بنتخلص منه بس الشخص الي بنهرب منه خياله وفكرة وجوده بتضل ملاحقتنا ممكن فعليا تخرب علينا شغلات حلوة لقدام لمجرد وهم وجود او اعادة وجود

كل موقف وشخص وحدث كتير مؤثرات بتأثر بمصيره في خياتنا في مرات بناخد قرار مصيري وحتمي وسريع وبنعدي ولا كانه موجود ومرات القرار بكون بطيء وحاد ومؤلم وتردد كتير في ذهاب الى اللاعودة واياب من الواقع وبرضو مع اتخاذك لهيك قرار بتضلك تقول ماذا لو

لازم هاي الجملة تنعدم من القاموس "ماذا لو " كتير مؤذية

لو الحياة ابيض واسود وخط مستقيم كان حسينا بالملل بس كتر الالوان والتعرجات مرهقة كمان

طب والحل

ابداً ان تستمر بالحياة ما استطعت بس تطلع فوق انبسط واعطيها حقها وبس تنزل للقاع حارب لترجع فوق

#ثقافة #علم اجتماع #فلسفة #فلسفة الحياة #رضا #فلسفتي #مجتمع واعي #ثقة #علم نفس #راحة البال #فضفضة

[dalyana]

خيبات التوقعات

بعد التفكير مليا في مجريات بعض الأمور لقيت انه فعليا احنا الي بنتسبب لانفسنا بالخيبات والآلام والاحباطات

لانه بنسعى وبنعمل وبنتوقع النتيجة وبنتخيلها وبنعيشها وكانها امر واقع ومفروغ منه الي بخيالنا هو الي راح يصير

غلط

علينا العمل وعلينا السعي والنتيجة مش شغلنا النتيجة شغل واحد احد هاي لربنا بيعطينا اياها بالطريقة الي بتناسب مجرى حياتنا ووين النفع الاعظم والخير الاكبر الي النا وكتير مرات هاي النتيجة تكون مش زي ما احنا متخيلين هون بجي دور الزعل والاحباط وخيبات الامل والبقاء في القاع مع العلم على ارض الواقع انت عملت الي عليك وبذلت اقصى جهودك المتبقي عليك تقبله وترضى وتسلم بانه خير حتى لو مش فاهم كيف ومش شايف وين

هون بجي تمام الايمان بالاستسلام

بس طبعا احنا كبشر طبيعتنا غير والبيئة الاستهلاكية السريعة الي عايشينها خلتنا بدنا كل شي هلا وزي ما احنا متوقعين لانه هيك بنشوفه عند غيرنا بادراكنا المنقوص لانه بنشوف تفاصيل صغيرة ومحددة ما بنشوف الصورة كاملة

بطبيعة الحال بالحياة بالمجمل ما بنقدر نشوف الصورة كاملة لانها عند ربنا ولكن بنشوف دلائل وامارات وعلامات واحيانا كتير ممكن تكون خيالات وارهاصات هدول الارهاصات شغل عقلنا الغير مدرك لحقائق الامور اما الامارات فهي من رحمة ربنا فينا بلاش نطق ونفقع من كتر التفكير الزايد

عاد والله الحل بسيط استسلم بكامل قواك لربنا فهو خير مدبر

المشكلة بتكون بكتر الخيارات والاحتمالات مهو عقل الانسان ملوش حل

لازم يحط سيناريوهات ويعمل قصص وحكايات باعتقاده لانه هيك ببقى جاهز لكل اشي ممكن يصير ومتوقع كل الاحداث بس ابدا دايما بصير اشي خارج نطاق تصوراته وسيناريوهاته

لنوصل لهاي القناعة بدنا كتير وقت وكتير تجارب وكتير جهد

وحتى الوصول الها اشي بيختلف تمام الاختلاف عن تطبيقها بشكل عملي

ليش لانه التطبيق اصعب بكتير من انك ترص كلام نظري وانك تسيطر على انفعالاتك وحركاتك وتفكيرك بعد عهد طويل من التصرف على اساس السيناريوهات المتوقعة والمحتملة

اشي مش سهل بس مش مستحيل

الله يقدرني على التطبيق ويقدركوا طالما وصلت لهاي القناعة يبقى وصلت لاول خطوة بالطريق الصح

ممكن قناعة الانسان انه وقته محدود على الارض بتخليه يكون طماع ونفسه يكوش على كل شي

بس الي بيعرفوش انه حتى لو كوش على كل شي وفش رضا ببقى ما حصل على ولا اشي بضل يلف بساقية بدو كمان ولازم اكتر لغاية ما يقود نفسه للتهلكة لهيك القناعة حلوة والرضا احلى

اللهم القدرة على التطبيق والسلام الداخلي والرضا بكافة الاقدار

#ثقافة #علم اجتماع #فلسفة #فلسفة الحياة #رضا #فلسفتي #مجتمع واعي #ثقة #علم نفس #راحة البال #سلام #حب #حكمة #فضفضة #افكار

[dalyana]

١٢ حزيران (صدمة صباحية )

بتعرفوا فكرة انه الواحد بتعلمش الا من كيسه

هادا ببقى درس وتعليمة بتحفر عميق جواتك بتحر وكانك بتدبح حالك بسكينة تلمة والاسوأ انك تتعلم ومن كيسك ولغلط مش انت سببه انت بتتحمل نتيجة عمل جماعي اشي بستفز جواتك كل سواد العالم يطلع للسطح

والانكى من هيك انه ما يطلعش بايدك اشي تعمله

بتعيط

طيب وبعدين

بتصدع

بتنقهر

بتتنرفز

بتحرق في دمك

بالاخر بتمرض

مع قناعتك التامة بأهمية التسليم

والاستسلام والي الك الك وال مش الك محرم عليك

بس في غصة بالقلب بتكون انه لو غلطي وانا اقترفته بكل ارادة تمام فش عندي مشكلة بس يبقى نتيجة تراكمية لشراكة اجبارية مش اختيارية

طب ليش ما انا شفت انه هاي الشراكة مش نافعة وسيئة وبتلزمنيش وطلبت الافتكاك وتم الرفض

ساعتها المنطق يقول من رفض الافتكاك بيتحمل مسؤولية قراره بنتائجه السلبية وما بيظلم غيره

شعور سيء جدا تحس حالك في خانة اليك فش خلاص فش حل فش تغيير والسبب تصرفات الاخر

ومع هيك رغم الغيز والاستفزاز والقهر الا انه راضية بشو ربنا كتب لانه في نعم سلب زي ما في نعم ايجاب

شعور الله يكفيكوا شره

#ثقافة #علم اجتماع #فلسفة #فلسفة الحياة #رضا #فلسفتي #مجتمع واعي #ثقة #علم نفس #راحة البال

[dalyana]

٨ ايار ( الحب )

قوة الحب بتصنع المعجزات !

لما تحب ولا لما تنحب

طيب شو هو الحب انك تكون مقبول بالرغم من كل شي او انك تبقى راضي من جوة وقلبك بيضحك ومش مهم شو برة

انك تكون في سلام يخليك تتطور وتكبر وتزهر

انه عيونك تلمع الحب الخير الي بتعمله وبتقدمه بالرغم من مشاعرك

الحب انك تقاتل لتظهرلهم جوانبهم المنيحة حتى لو هم مش شايفين الخير بنفسهم

طيب افرض ما حبيت وما انحبيت معقول تضلك مطفي ولا حبك لذاتك ممكن يعوضك بس هاي الفردية والتمحور حول الذات ما بتشبع طاقات الحب حتى لو كانت صح وسليمة ومشبعة ذاتياً حلو تلاقي حد يفرحلك وحلو تلاقي حد يطبطب عليك

وكمان حلو حد يواسيك والاحلى انه لو كل هادا ما توفر تقدر تزهر وتضل عيونك بلمعتهامش دايماً الحب حلو مرات ببقى مر علقمي ومرات سكين تلمة بيدبح بس تبرمجنا ندور عليه ازا لقيناه خير بس ازا لا مش نهاية العالم

ما تخلوا بوصلتكوا تتوه ازا ما تفركشتوا بالحب

#ثقافة #علم اجتماع #فلسفة #فلسفة الحياة #رضا #فلسفتي #مجتمع واعي #ثقة #علم نفس #راحة البال #حب

[dalyana]

٧ ايار ( كسرة القلب )

الانسان ما بنكسر من العالم المحيط فيه ولا من بيئته الخارجية الكسرة بتكون من اقرب القريب ما بيكون في حوار ما في تفاهم ما في ارضية مشتركة بصير في شرخ فجوة شقاق مش مهم المصطلح قد مهو مهم الفعل بتصير علاقة تبادل مصالح بعطيك عشان تعطيني لما تقصر بشكل معين لانها اصلا طبيعة الانسان المجبول عليها بصير في نوع من الحرب الباردة الي اي فتاش ممكن يولعها لتتحول لحرب دامية لا تبقي ولا تذر اساس الدنيا بكون التفهم التقبل الحوار لما ما يكون موجود من دائرتك القريبة عليك السلام لا منك ولا من حياتك ريشة في بحر الهوا ضعيف مهزوم مكسور قد ما تحاول تبين قوي من برة بس انت هش وضعيف وهيكل من جوة اي ضربة بتحولك لرماد متخيل تعيش بهالحرب هاي يوم يوم بتصير انت العنقاء بس العنقاء بتصير قوية لانها بتتكون من رمادها وبتحلق لسابع سما بس انت ما بتقدر مسبب الهشاشة الاول بحياتك رابطك ومجذرك بالارض وممكن يدفنك تحت الارض بكلمة بحركة بتصرف بموقف وبعد كل هيك بقلك بدي مصلحتك

عفواً منك مصلحتي !!!!

كيف وليش ومن متى هي مصلحتك الي عازة عليك صورتك العامة قدام الخلق ابدا مش مصلحتي ما تدّعي انه بتحب الخير الي وتتجرأ تقول مصلحتي مصلحتي بتكون لما تسمحلي اكون ذاتي بدون تغيير وقولبة بدون انت منيح بس لو عارفين بس لو هاي بتعمل بني ادم تاني ببقى المنيح هو الي بعد بس لو مش انت بس هو مش قادر يصارحك انه كلك ع بعضك مش فارق المهم هو وبهاي الحالة انت برضو بمهب الريح لانك خسرت القبول طب والحل قاوم يا بتثبت ذاتك وبخسروك يا بتخسر ذاتك وبتحملوك وبالحالتين قلبك راح يبقى مش لاقي نكشة ونفسيتك راح تتحطم وبدها وقت لترحع بس بترجع عنقاء والمرة هاي التقل الي مثبتك بالارض ببقى راح وبتصير خفيف وبتحقق ذاتك الصح بعيدا عن الاشرار القريب الي بدو يكسرك اعزل حالك عنه مش راح تخسر اكتر من كل شي خسرته وانت قريب منه المهم ما تخسر روحك وشخصيتك وحالك

#ثقافة #علم اجتماع #فلسفة #فلسفة الحياة #رضا #فلسفتي #مجتمع واعي #ثقة #علم نفس #راحة البال

[dalyana]

٧ آذار

كيف اصبحنا بهاي الهشاشة وليش ضعاف لهاي الدرجة مين المسؤول غيرنا عن حالنا وبهاي الحالة ليش سمحنا لانفسنا نكون قابلين للكسر السهل كل ما يكسر فهو قاسي معقول احنا قساة على انفسنا لدرجة انه كسرناها بدون ما نعرف وبنحول المشكلة من سوء تعاطينا مع انفسنا لحجج واهية زي الظروف والبيئة والفرص طيب الطبيعي انه نضعف ولازم يكون في شوية لين فينا كبشر ليش اللين والضعف صار تهمة لدرجة انه حولنا انفسنا لقوالب من قسوتها اصبح من السهل كسرها ليش كلمة بتودينا وكلمة بتجيبنا وامل بيرسم خيالات طويلة براسنا وانعدام هالامل بيحبطنا وكانه خسرنا كل شي مع انه فش حد بخسر كل شي زي ما فش حد بكسب كل شي معقول احنا حابين خيالاتنا وحياتنا الي اخترعناها بعقولنا اكتر من واقعنا طيب ليش ما نحاول نصنع واقع يناسبنا ونحبه ونتقبل فكرة انه التغيير حلو ومفيد وضروري عشان يصير الاحلى ليش بنقبلش نضعف بس بالمقابل كل كسرة بدنا عمر بحاله لنرمم روحنا من بعدها طيب والعمر فيه كم عمر والحياة ما بتطبطب علينا زي اهالينا الحياة بدها تعلمنا وازا ما تعلمنا نلين وصلينا بقسوتنا معناها احنا راح نعيش ونموت مكسورين او قيد الترميم وحتى لما نرمم روحنا ونتأقلم على الوضع الجديد الي هو اصلا مش عاجبنا ومش متقبلينه بس متحملينه هادا الموجود عيش فيه او ارجع لحالة من الانكسار الاخر بس بشكل سوداوي ومؤلم اكتر مين شوهنا كنا اطفال حلوين بنقبل الضعف والخطأ والهزيمة وبنرجع للمحاولة من جديد حتى لو مليون مرة مين سمحلنا نتخلى عن هالجانب

احنا !!!!

طيب هادا اللاتسامح مع هشاشتك كيف تعلمته وكيف تلغي وكيف تخليه ما يكون سبب لرفضك من الحياة احتضن هشاشتك اقبل ضعفك حب حالك بأخطائها عشان تقدر ترمم روحك اسرع وتقدر تكمل حياتك

#ثقافة #علم اجتماع #فلسفة #فلسفة الحياة #رضا #فلسفتي #مجتمع واعي #ثقة #علم نفس #راحة البال #تنمية بشرية #فلسفة الوجود #مجتمع #حب #فضفضة

[dalyana]

( لما تاخد اشي احسب حساب لسداده )

كل شي في الدنيا سداد ودين

اوعى تفكر انك راح تملص بمرة من المرات من انك تسد اشي اخدته حتى لو انها بسمة متخيل انت لوين الموضوع مستفحل حتى مع اقرب المقربين بجي يوم من الايام وبزكرك باسلوب او باخر انه قدملك واذا قدرت تردله معروفه وتزود عليه هي انت طلعت وحافظ مية وجهك اذا لا بدك تتحمل جمايل ومعايرة من تم ساكت لانه ايدك قصيرة ولا حول ولا الك بدك تستنى تصير صاحب اليد العليا كونه الزمن دوار وفش حد بتدومله او بضل على حاله قديش هالفكرة غبية ومتعبة ودمها تقيل قديش انت لازم تكون الك افضال ع غيرك خلينا نقول عشان تحس حالك حُر من الناس والمواقف ومن الجمايل والمعايرة والقال والقيل الحرية الحقيقية بالبعد عن الناس بانك تصير منسي بس قديش بتقدر على هادا الوضع وقديش مرونتك التفسية بتتحمله كونك انسان مهلوق للأُنس والاجتماعيات والتواصل هادا بدربك عليه قديش بتاخد صدمات وضربات لتخليك مفرط الاستقلالية وانه اذا العيشة بينكوا هيك خلص انا مكتفي بحالي وبس وما بدي منموا اشي بس اتركوني بحالي اخد قراراتي واعيش حياتي واتصرف بالاسلوب الي بريحني بالكوا بنخلص هيك طبعا لا لازم الانتقادات تلاحقك وتضلها وراك لتصير زيك زي باقي القطيع تقصص جناحاتك وتخلي تميزك عادي واقل عشان تكون مرضي وتابع ومطاطي هييييييييك لغاية ما ربنا ياخد امانته وترتاح وساعتها بتصير حر بحق وحقيقي

#ثقافة #علم اجتماع #فلسفة #فلسفة الحياة #رضا #فلسفتي #مجتمع واعي #ثقة #علم نفس #راحة البال #تنمية بشرية #فلسفة الوجود #مجتمع #حب #فضفضة

[dalyana]

١٥ ديسمبر ( غوستينج ghosting )

هادا المصطلح طلع مع جيل الميلينيومز ما كانش زمان في الزمن الجميل كان لسة في اتكاء على الاخلاص والوفاء والقيم والعشرة والتواصل تخيلوا الناس كانت فعليا تتواصل مع بعضها كانت تحكي بوجه بعض ويشوفوا بعض ويشوفوا تعبيرات وجههم ويفهموهم كان يوضحوا اسباب فرحهم وزعلهم واخد خاطرهم كانوا يهتموا يحافظوا على الجماعة المقربة الي الهم ويضلهم يعاملوهم وكانها اثر عظيم وكنز اما الفترة هاي بقرننا المتطور زمن التواصل الاجتماعي الافتراضي المزيف الناس بتختفي ببساطة

اليوم معك بتبدا تبعد تدريجيا وبعد بكرة بتلاقي انه ما الكش وجود بحياتها ولا الها اثر بوجودك وكل ما تم التواصل فيه سابقا تم تقييده ضد مجهول ما بتعرف ليش ولا كيف ولا شو الاسباب بتعرف انه هالشخص قرر يبعد عنك بدون اعطاء اي مبرر لهادا الاختفاء

قديش الشعور بشع وبوجع انه انا كانسان من حقي اعرف ليش صح هادا بيتعلق فيه وانعكاس اله بس انا انسان الي روح ومشاعر مش الك ولا بشتغل على الزر اليوم دخل بكرة طلع وتأقلم هادا الموجود حتى لو انعكاس لعقدك النفسية من حقي افهم ليش دخلتني بهاي الدوامة وقررت تطلعني منها وكاني لعبة مش انسان

بس بالنهاية انت الي مش انسان انت الة او مدمن الة لانه اسلوبك هيك بقول ولو كنت راح اعذر عقدك وظروفك وكل ما يعتمل جواتك اذا كنت اعطيت مبرر بس تعمل غوستينج انا مش راح ابرر الك اي تصرف راح اعتبرك في عدا الموتى ادفنك واكمل طريقي لناس بتقدر قيمة المشاعر الانسانية الحقيقية الي بتقدر معنى التواصل

لناس بتستحق هادا التواصل وهاي الحقيقية الي قاعدة بتختفي

كل عزيز وغالي قاعد بنزل من الغربال بهزة التواصل الافتراضي الي ضيع كل شي حلو بالتواصل

#ثقافة #علم اجتماع #فلسفة #فلسفة الحياة #رضا #فلسفتي #مجتمع واعي #ثقة #علم نفس #راحة البال #تنمية بشرية #فلسفة الوجود #مجتمع #حب #فضفضة

[dalyana]

#ثقافة #علم اجتماع #فلسفة #فلسفة الحياة #رضا #فلسفتي #مجتمع واعي #ثقة #علم نفس #راحة البال #تنمية بشرية #فلسفة الوجود #مجتمع #حب #فضفضة

[dalyana]

( الى من تمثله )

الى احدهم اتمنى ان تختفي بشكل كلي ونهائي الى الابدية وما بعدها فنصف الحضور لم يعد مقبولا ولم يكن مغريا من الاساس نتمسك بالاشخاص والصداقات والعلاقات من باب الاستثمار في علاقة قد تدوم لتكون المتكأ من الزمان ولتكون الرفيق في المكان ولتكون المؤنس ولكن البعض يستغلها بشكل منفر استغلال وقضاء مصالح وتنغيص على الاخر الا يستحق الامر مقابلة الاحسان بالاحسان الا يستحق ان تكون فعلا ذلك السند والرفيق والمؤنس من وحشة الايام اذا لم ترغب بذلك من الاساس فانصرف الى اشغالك واعمالك ولا تحضر لمجرد الايهام بوجودك ولتسد مجرى الدخول امام من يستحق لا تمارس لا ارغب بوجودي وايضا وجود غيري ممنوع كم انت اناني

يتم تخطي نصف الوجود والحضور والاهتمام بعدم الاكتراث نفسيا ومعنويا ولكن ما بعد ذلك هو نفور وتقزز وبغض لهذه الطبيعة الاستغلالية

#ثقافة #علم اجتماع #فلسفة #فلسفة الحياة #رضا #فلسفتي #مجتمع واعي #ثقة #علم نفس #راحة البال #تنمية بشرية #فلسفة الوجود #مجتمع #حب #فضفضة

[dalyana]

بتعرفوا حالة النفور العام الي ممكن تصيب الانسان من شخص مقرب او موقف او مبدأ كله بتقدر تتفاداه إلّا نفورك من شخص قريب من الدرجة الأولى والأسوأ من هيك انك بتقدرش تلومه كمان لأنه بمفهوم أكثر اتساعاً بتلاقي انه هو ضحية بيئة ومجتمع وظروف وطريقة تنشئة غالبة على المجتمعات الشرقية

بس بتضل عندك نفور عام من ازدواجية المعايير الي عنده ومن سوء التصرف الي انت عارف وهو عارف انه غلط ومع ذلك هو مش موقفه وانت مش شغلتك تواجهه وتوقفه عند حده بضل انت مجبور تحترمه بس مش قادر تحترم تصرفاته انت نزعت عنه التقديس وقمت كل ما يبجله وشايف سيئاته واستغلاله ومرات رعونته وعدم مراعاته لمشاعر غيره وبترجع تمنطق الافكار براسك وتقول من منظور تاني هو ضحية بس بتصرفاته هاي بيخلق ضحايا كتير بعده

طيب شو المفروض اهرب اسكت ابعد اواجه مش عارفة احدد بس الي بعرفه انه شعور جدا مؤذي ومتعب شعور بخليك تنفر من كل الجنس البشري التابع لهادا الفصيل بتبطل قادر تأمن لحد ومش قادر تشوف حد منيح مش قادر توثق ثقة تامة والشك عمروش عمّر اشي لحد حتى لو بنفعش الثقة التامة بس برضو ممنوعة فكرة الشك

ممكن تندم ع نفورك وممكن تخسر بسببه بس المش معقول تبقى عارف الصفة وشايفها وتقبلها تكون جزء من حياتك المستقبلية كمان الا ازا اخدت قرار حازم وصارم انه لا ما بدي تكون جزء وراح احطلها حد عندي ومش راح اقبل شخص عنده هاي الصفة ولا راح اتقبلها

ازدواجية العقلية الشرقية واسلوب تربيته وتنشئته بتشجع على الخيانة وهي مش دايما بتكون جسدية مرات روحية مرات عاطفية ومرات معنوية ومرات فكرية واقلها ضررا الجسدية ضلكوا صامدين على بال ما تلاقوا هادا الشخص الوفي المخلص الملتزم بشخص واحد عقلا وقلبا وروحا وفكرا وجسدا

الله يجيرنا من ما هو قادم ويبعد عنا الخاين بكل صفاته وانواعه

#ثقافة #علم اجتماع #فلسفة #فلسفة الحياة #رضا #فلسفتي #مجتمع واعي #ثقة #علم نفس #راحة البال #تنمية بشرية #فلسفة الوجود #مجتمع #حب #فضفضة

[dalyana]

أصعب شعور ممكن الواحد يعيشه هو الحيرة انت شخص محتار ومش عارف موقعك بالنسبة للي قبالك ايش انت قريب ولا بعيد انت صديق مفضل ولا صديق مرحلة انت معرفة ولا شخص عابر انت حبيب ولا غريب مجرد ما وقعت بفخ الحيرة اعرف انه انت شخص غير مرغوب فيه للشخص الي محيرك لانه لو فعلاً معني بوجودك بحياته كان اعطاك المسمى الحقيقي وعبّر عنه لمجرد شعورك بالشك يعني انت ضمن الاحتمالات والاحتمالات صعبة جدا بتنهش فيك من جوة وبتخليك سهل الكسر ونفسيتك تعبانة وبتستنفذ كل طاقاتك الروحية والعقلية والجسدية

الي متردد ومحيرك اعتبر الاجابة لا و بروح معنوية عالية كمل حياتك وزي ما انت ما الك مسمى واضح في حياته خليه شخص عابر وبدون مسمى واضح كونك موقف حياتك على احتمالية اه او لا هادا بحد ذاته موت بطيء كمل حياتك واعلى لفوق والي معني فيك اكيد راح يوضح رغبته الشديدة بوجودك في حياته ويصرح فيها على الملأ

عارف فكرة انك قاعد على دكة الاحتياط واحد من قائمة طويلة وبتستنى دورك بس كل شوي في حد بيجي بياخد الدور منك كمية الاحباط والتعب والزهق الي انت فيها بالاخر لازم ترجع تعيد حساباتك هل فعلاً هادا الشخص بيستاهل كل هالانتظار هل انت راح تكون سعيد وحاسس اني نفسي عشان هيك بستحمل صعوبة الوصول اذا كان الجواب لا ترفّع عن كل ما هو دونك اترك الدور وافتح صف جديد بمكان جديد وكون الوحيد والاول والاخير وابداً ما تقبل تكون خيار وتستحمل فوق طاقتك لتستنى قبول من حد او انه يسعدك لثواني محددة ويهز داخلك عمر

حالة سخن بارد بالعلاقات صعبة ومستنزفة ودايما انت بتستحق اكتر من هيك بتستحق الاخلاص والالتزام والوفاء والأمان

#ثقافة #علم اجتماع #فلسفة #فلسفة الحياة #رضا #فلسفتي #مجتمع واعي #ثقة #علم نفس #راحة البال #تنمية بشرية #فلسفة الوجود #مجتمع #حب #فضفضة