hkgirlinjp

[hkgirlinjp]

香水x指甲油！日牌推9色夢幻「輕香水指甲油」

平時搽指甲油，最怕聞到一陣刺鼻味道，發現最近日本有個品出咗款「輕香水指甲油」，唔只唔臭，仲傳來陣陣花香香水味!

呢款指甲油係日牌OHANA MAHAALO出品，呢個品牌出名CP值高、香水又平又好用，深受一眾小資女歡迎。是次將招牌香水融入指甲油，搽指上甲面後會留有淡淡香味，絕對唔會令人覺得難聞俗氣。

系列共推出9隻顏色，以柔和色調為主，每款指甲油唔係用顏色來命名，而係用香氣來取名，9款專屬香氣包括氣質粉色「愛戀茉莉 Pikake aulii」、顯白莓果「幸福花語 Laule'a puae」、優雅紫灰「春日舞蝶 Liko pulelehua」、裸色「奇幻夢境(Halia nohea)」、純白「鈴蘭天鵝 Leia makalapua」、海洋藍「繽紛海洋(Lanikai pupu)」、橙色「初夏牡丹 Momona kau wela」、鮮紅「椰風漫舞 Fula ku’ulei」及藕粉灰色「熱帶雨林 Pama wela」。

甲油質地偏半透明嘅凝膠，輕透感覺同夏天好match，搽多幾層顏色就會變得飽和有光澤感，好靚!除咗香味、顏色吸引，樽身設計同樣精緻，每支都掛kb2相應主題金色小吊牌，好似藍色就掛上海星吊牌、橙色則掛上菠蘿吊牌，設計超有少女心，難怪令日本妹瘋狂掃貨!價錢1500日圓(約港幣$109.6)，有興趣可以上官網睇睇!

圖片來源：OHANA MAHAALO

#港女講日 #column #lifestyle

[hkgirlinjp]

預訂北海道民宿No Show惹公審...涉事港人：一早已電郵取消

跟車太貼易生意外!早兩日FB專頁開公審post，內容關於有港人預約咗一間北海道民宿，但於原定日子no show，民宿一早準備好滿檯料理，最後唯有倒哂啲食物，即刻被全城鬧爆，不過事後發現原來係一場誤會，一眾傳媒同網民都炒晒車!

日本旅遊資訊FB專頁「温泉谷 - 日本旅遊資訊及温泉愛好者」日前發長文，狠批一個4人香港家庭預訂咗北海道著名民宿「船長之家」嘅房間及晚膳，點知玩失蹤冇出現，有其他住客向民宿了解事件，民宿指4人冇取消預約，最後無奈將擺滿餐檯嘅4人份精緻料理包括長腳蟹、刺身、鍋物等食物全部倒掉，非常浪費!

專頁批評港人不負責任，認為現今科技發達，「要通知旅館不能前往很艱難?你等同打劫沒有分別」，而一枱人「No Show」會影響民宿收入、浪費食物及旅館嘅心血、剝奪其他人入住嘅權利、影響旅館對外國人嘅信任...最後勸事主「自行聯絡旅館致歉，賠償旅館損失，做返一個有承擔的香港人」。

唔少網民紛紛批評事主「映衰香港人」、「失格兼冇品」，不過事件發酵一日後，劇情竟180度逆轉，原來「船長之家」早於5月已收到事主取消預約嘅電郵，民宿疑似睇漏眼先發生誤會，而專頁亦立即分享電郵截圖澄清，並就事件致歉。

一眾網民知道炒哂車好嬲，鬧專頁「公審時唔fact check就公開全名，搞到全世界車已炒」，而且對道歉聲明唔收貨：「原本個post就寫得咁mean，累完人就兩粒字『致歉』、「呢個道歉果然同特首嘅差唔多，真係好有誠意」，亦有人分享自己遊日經驗，認為近幾年日本服務大不如前，所以唔好跟車太貼。

圖片來源：FB專頁「温泉谷 - 日本旅遊資訊及温泉愛好者」

#港女講日 #column #lifestyle

[hkgirlinjp]

日本酒店員工卑微請求：唔要嘅嘢請掉入垃圾筒!

日本酒店基於法律規定，會幫客人保管失物3個月以上，但係呢種服務就令唔少酒店叫苦連天，究竟點解呢?

朝日電視台綜藝節目「ザワつく！金曜日」近日就呢個專題做深入報導，走訪大阪Hotel The Flag Shinsaibashi，因酒店交通便利大受觀光客歡迎，高達9成客人都係外國人，同時令酒店非常困擾，負責人帶節目組去一間房度睇，發覺堆滿呢幾個月以來嘅失物!

按規定，無論旅客有意或無意將物品留喺日本酒店房間內，酒店須代為保管至少3個月，但係失物定義模糊，睇睇間房入面，有毛巾、鉛筆、其他酒店嘅沐浴乳及洗頭水、紙杯、挖耳棒、牙膏、化妝品、平板電腦等，除咗平板電腦叫做比較貴重，其他嘢擺明係唔要，都唔會有遊客想要特登返去拎吧?

但酒店為以防萬一，依舊會細心保管每一樣唔係房內原有嘅物品。近年最令酒店頭痛嘅失物係行李箱，原來好多遊客喺日本狂shopping逼爆篋，直接再買新篋，但係呢種大型垃圾又唔方便周圍掉，於索性擺喺房等酒店處理!可惜客人冇同酒店明示「我唔要」，酒店唯有當失物保管，勁阻掟!

想做個有責任心嘅遊客，大家記住將唔要嘅嘢放入垃圾桶，或寫張紙仔貼喺行李箱上講明「唔要」，咁就唔駛執房員工逐樣mark低，令工作百上加斤，同埋逼爆酒店儲物房啦。

圖片來源

ザワつく！金曜日

[hkgirlinjp]

巨乳女生先玩得!?日本妹最新挑戰「放手飲珍奶」

潮流瞬息幻變，上星期先講完日本妹呢排興單手拎珍奶行街，話口未完，已經進化到唔用手，用胸托!

近日《星期一的豐滿》(月曜日のたわわ)漫畫家，將熱爆日本嘅台式珍珠奶茶加入漫畫，見到漫畫入面女生一邊低頭玩手機，一邊用堅挺胸部夾穩杯珍奶慢慢啜，意外開創#手放しタピオカ(放手飲珍珠)呢個熱潮!

好多日本妹為證明自己有呢個「能力」，相繼模仿漫畫「放手飲珍珠」呢個飲法，並打於放上網，明示自己係巨乳一族！一班男網民對於Twitter暴增巨乳照表示歡迎，仲話「好想成為珍珠奶茶」咁話!亦有網民心水清:「明明係咬住飲管先唔會跌落嚟...」

雖然呢個動作睇落簡單，但對於平胸貧乳女生來講...勸你都係唔試好過試!一唔小心，成杯珍奶倒濕自己，出醜於人前就唔好啦，都係乖乖哋雙手捧住慢慢飲算！

圖片來源：twitter@mizuki___momoko

#港女講日 #column #lifestyle

[hkgirlinjp]

恐怖定可愛...日本超創意小物你敢唔敢用?

日本人創意無極限，近日呢兩款集玩味、恐怖於一身嘅出品，唔知大家又buy唔buy?

1.恐怖「人肉散紙包」

太逼真!最近網上瘋傳呢款由日本CreativeDrugStore嘅DJ加Producer設計嘅人面散子包，仿照人面下半部製作，打開口可以放啲錢入去，像真度高到有啲得人驚，如果拎出嚟俾錢應該會嚇親店員!除咗散子包，仲有手指印章、人肉電話殼、電話差電插座及人肉音樂控制面板等，隻「斷指」連指紋都有，好似真得滯有啲核突...不過亦吸引唔少重口味人士留言話想買，可惜暫時唔會量產，如果唔係聖誕或party買來做惡搞禮物都唔錯!

2.飯糰求婚戒指盒

睇完嘔心人肉小物，睇吓啲冧女可愛扭蛋!日本玩具公司KITANCLUB過往曾推出好多創意扭蛋俘虜女生心，繼早前推出一系列貓咪頭套，今次搞搞新意思，主攻有意結婚嘅鬼馬情侶，9 月將推出5款日式飯糰求婚戒指，包括燒三文魚、梅子、明太子、三文魚子及昆布，而戒指盒尺寸亦照足真飯糰設計，一打開「飯糰」就見到「餡料」戒指，超可愛，只係300日圓(約$21港元)，絕對係求婚「平靚正」之選!不過奉勸各位師兄有信心女友會鍾意先好出動呢件法寶呀，萬一弄巧反拙，激嬲你位港女女友就祝你好運啦!

圖片來源：twitter@44doooo、KITANCLUB

#港女講日 #column #lifestyle

[hkgirlinjp]

日本年輕人新潮流 單手拎珍奶!連個杯都要儲!

日本近年掀起嘅珍珠奶茶熱潮未有減退跡象，最近仲不知不覺從飲品進化成流行配件!

隨住珍珠茶飲店喺日本越開越多間，各式奇妙現象逐漸浮現，日本富士電視台晨間情報節目「めざましテレビ」就深入調查東京年輕人點解咁鐘意用單手拎珍奶行街，甚至飲完連空杯都唔捨得掉!?

節目街訪136位拎住飲品行街嘅人，發現佢哋一星期平均有3.2日會單手拎飲品行街，清一色拎住都係珍奶!路人拎住珍奶行街嘅原因主要有兩個，第一個比較正路，原來原宿與表參道附近嘅38間珍奶店有15間係外帶店，冇地方坐得飲咪唯有邊行邊飲囉，冇咩特別。

第2個原因先O咀，係出於仰慕及崇拜及心態...原來好多後生女見到模特兒或者網紅單手拎飲品個樣覺得好型就有樣學樣!「外國model戴住黑超再拎住杯飲品行街超型啊」、「我覺得自己拎住飲品都會好可愛」、「飲品就好似一種穿搭吧」。

邊行邊飲都算，但喺街度見到好多人明明飲完都繼續拎住個空杯唔掉呢?唔通唔夠垃圾桶?於是節目做咗個實驗，工作人員攬住垃圾桶問路人駛唔駛掉垃圾，但個個都寧願拎住唔掉...

原來對於好多日本年輕人來講，珍奶吸引之處並唔係珍奶，而係用來裝珍奶個嘅容器!好多妹妹仔講:「我想帶返屋企做裝飾」、「拎返學校炫耀自己飲過」、「一陣拎去影貼紙相做紀念」...節目仲介紹有對從北海道來到東京嘅姊妹，竟然特登將喺東京飲完嘅空杯pack好帶返去北海道呀!

究竟珍奶同珍奶個杯有咩吸引力...我睇唔透呀...

圖片來源: [email protected]

#港女講日 #column #lifestyle

[hkgirlinjp]

又平又好食 日本兩大連鎖店推出注目丼飯新品

有冇人係丼飯控?去開日本必試以下兩款由肯德基及吉野家推出嘅注目新品!

1.肯德基丼

除咗期間限定味道炸雞，日本KFC原來仲有限定「ケンタ丼(肯德基丼)」!不過全日本得7間分店，東日本就有3間有得食咋，唔同分店嘅價位亦有啲差異，大約700-800日圓(約港幣$50.7-$58)。

丼飯唔只得幾舊招牌炸雞同白飯，仲有番薯、四季豆、香菇等炸物，麵衣唔係一般天丼嘅天婦羅口感，而係同KFC炸雞一樣帶有甜辣醬汁，唔少網友認為飯量太少、而且價錢算貴，不過亦因為夠稀有，依然吸引到大家去幫襯!

2.丼飯罐頭

日本人防災意識高，亦促使了防災食品不斷進化，估唔到連吉野家都首次加入防災食品市場，推出一系列丼飯罐頭「缶飯(罐飯)」，共6種口味，包括招牌牛丼、豚丼、牛燒肉丼、豬生薑燒丼、鹽烤鯖魚丼及燒雞丼。

雖然係罐頭但食材同店內一樣，上個月尾正式開賣，吸引一眾網友去買:「防災食品來講算好食，不過都係想食熱嘅...而且飯係金芽米。」當然，可以熱食邊個會想食常溫?不過至少遇到緊急時刻，都仲可以隨時開罐牛肉飯來食，都算係一種奢侈享受吧。

圖片來源：travel.mdpr.jp、e-shop.yoshinoya.com

#港女講日 #column #lifestyle

[hkgirlinjp]

乞客無處不在! 連出名「以客為尊」嘅日本人都頂唔順?

劉華句「「今時今日咁嘅服務態度唔夠㗎」，咁多年都唔知害到服務業打工仔有幾慘!咪以為香港先多西客，其實「禮貌功夫」做得最好嘅日本，造就仲多西客呀!最近日本店家開始醒覺，認為唔可以因為怕被投訴而啞忍野蠻西客，害咗一班店員!

NHK電視台最近播出一集關於「過分客訴」專題報導，記者認為日本有好多從事服務業嘅人都曾經畀被西客無理過分嘅要求逼到發癲...

「喺居酒屋搵唔到對鞋而發嬲，逼我跪到天光，仲要賠返對鞋畀佢」

「買外賣嘅客人將汁醬滴咗落車座椅，要求賠償2萬圓清洗費」

「有客人亂摸女店員，叫警察之後反而上網公開店員名字」

報導仲提到舊年引發話題嘅一張居酒屋公告:「客人唔係神，本店員工亦唔係奴隸，所有員工都係寶!」

舊年7月，有日本網友發現一間居酒屋貼出呢張公告而喺twitter引爆話題，同樣都係點一杯生啤，費用竟然會根據客人落單態度而唔同!

「喂，生啤!」收1000日圓

「拎杯生啤來」收500日圓

「唔該，麻煩請畀杯生啤我」只以380日圓!!!

記者實地走去居酒屋測試:「喂，生啤!」女店員表情即刻反白眼唔想睬佢...「唔、唔好意思...麻煩請畀杯生啤我...」呢個時候店員即刻笑笑口!

決定出呢張公告嘅副店長表示:「我想店員可以舒舒服服工作，客人雖然好重要，但員工先係我們最珍貴嘅財產!」呢啲先係人講嘅說話，香港服務性行業嘅管理層，唔該學嘢啦!

圖片來源：NHK

#港女講日 #column #lifestyle

[hkgirlinjp]

AirPods$215？日本「遺失物商店」成另類尋寶天堂

老師及父母從小就教我哋路上執到嘢要拎去差館，你又知唔知，如果喺日本呢啲失物一直冇人去認領，最後下場會係點呢?

日本NHK電視節目「有吉のお金発見　突撃！カネオくん」最近針對失物做專題報導，原來單喺東京都內，一年喺馬路、公車、電車等地方就可以執到410萬件失物!即係平均一日執到超過一萬件!!!

呢批失物交由日本警方保管3個月後就會打包賣畀二手商店，整理出啱用嘅物品再加以修理，再以超低價出售賺錢。節目也報導販售鐵路失物嘅二手市場，見到好多人執平貨，最搶手分別係雨傘、水壺、便當盒同埋帽，而其他實用配件好似眼鏡就50日圓(約港幣$3.6)起跳、尿袋100日圓(約港幣$7.2)起，最驚訝係連AirPods都有，只係3000日圓(約港幣$215)咋!

節目最後仲提大家，只要係喺東京及周邊區域唔見嘢，都可以試下上www.keishicho.metro.tokyo.jp呢個網站依類別及時間搜尋，警察有詳細記載每件失物嘅特徵架!

圖片來源：節目截圖

#港女講日 #column #lifestyle

[hkgirlinjp]

唔好諗衰野！日本出租親人 方便大家重溫親情

自從大家投身社會，搬出來自己住或同伴侶，不時都會掛住阿媽，掛住佢煮嘅野食，掛住有人幫自己打理家頭細務，掛住人有關心自己（雖然年少個陣覺得好煩）。其實唔單止香港人，日本人都有呢個問題。日本人不少都要離鄉別井去其他縣工作，要見家人只能等長假期，為了讓大家方便或重溫親情，日本近年興起「出租親人」的行業，除可僱用媽媽，重有丈夫、女兒、孫子等。

出租媽媽能一手包辦煮飯、洗衣服、打掃等家務，亦可以幫忙照顧小孩，但同香港鐘點或工人不同，出租媽媽會以媽媽的口吻同你傾計或說教，讓客戶們可以感受到家人般的親切感，一解離鄉別井的寂寞感覺。《全日本新聞網》報導，現年69歲的黑田俊美原本是名家庭主婦，自從她成為了出租媽媽後，不但為「女兒」煮飯、打掃、洗衣服等家務，更會關心她的生活近況，「我必須配合不同家庭的需要，協助他們完成家中大小事。」

要請一個出租媽媽，價錢都唔少，每月索價至少9800日圓（約港幣$770），包3次上門，每次6小時，但仍然客人不絕。業者表示，它們專請中老年婦女來擔任「出租媽媽」，唔單止因為佢地做家務一流，亦會細心關心客戶，如果香港鐘點姨姨都有呢種服務就真係Perfect啦！

相片來源：pakutaso

#港女講日 #column #lifestyle

[hkgirlinjp]

引貓埋身話咁易！細數3大「貓大麻」之分別及功用

最近日本有個都市傳說，貓奴聽到會好興奮，就係一個令貓咪主動埋身嘅方法，簡單到人人都做到!

Twitter呢排瘋傳「只要著GU牛仔褲就會令貓咪發哂癲咁嗲你」，引起日本貓奴們個個走去試，網上大讚見效:「確實只要著住GU牛仔褲貓就會主動靠近」、「除低或者已經洗過好多次，都係不停狂舔，應該真係好鍾意吧!」

有網友更意外發現與GU同一集團嘅UNIQLO牛仔褲，一樣有呢個奇怪功效:「我家貓咪特登將掛喺椅子上嘅牛仔褲拉落嚟用爪抓佢、磨佢同埋舔佢，條褲新買已經變爛牛!」

然後網友開始質疑:「唔通裡面添加咗咩奇怪染料?」有人解答原來染料入面有「木天蓼」，其中一款稱為「貓大麻」嘅植物!不過各位貓奴請放心，木天蓼同貓草、貓薄荷一樣，都係全天然嘅植物，可以令貓咪感到開心，繼而出現流口水、地上滾動等行為。

1.木天蓼

貓咪對木天蓼的反應比貓草、貓薄荷仲明顯。木天蓼就似貓咪興奮劑，當貓精神不穩定、焦慮、食慾不振時，可給與食用，含有刺激貓咪賀爾蒙成分，有效紓解貓咪情緒。不過因為好易引起貓咪亢奮，絕對唔可以使用過量!

2.貓薄荷

含植物纖維，有效幫助腸胃消化及舒緩胃漲氣，有助貓咪排出毛球。此外仲含有天然葉綠素及維他命C，當中嘅荊芥物質可舒緩貓咪壓力，治療神經緊張。

3.貓麥草

分大麥草及小麥草，雖然貓咪對麥草反應最細，但卻係最有效嘅天然化毛食物。貓麥草植物纖維勝過貓薄荷，更有效幫助腸胃消化，不妨喺貓咪換毛時期畀多啲佢哋食。

圖片來源：twitter@risu_pyan、twitter@Mtki6yellow

#港女講日 #column #lifestyle

[hkgirlinjp]

「童話式」情侶裝!日插畫家創作「迪士尼風格夏日穿搭提案」

唔少女生遊迪士尼都會襯上閨密裝，可惜男生對dress code熱衷程度始終較低，又怕難為情，所以好少見男生肯同女友悉心裝扮襯到絕咁去迪士尼玩!不過試下畀你男友睇以下幾幅插畫，包佢對情侶裝改觀!

日本插畫家みーこ(meeco)秋冬嘅迪士尼風格情侶穿搭爆紅後，日前畫出最新夏日版，以《美人魚》、《美女與野獸》、《阿拉丁》等人氣卡通為題，將男女主角元素融入現代流行風格，唔單只顏色、髮型帶出人物特色，貼題得來又唔浮誇，實用易襯!插畫仲貼心標示埋服飾牌子同價錢，方便大家可以好似「執藥」咁買哂全套!

1.《美女與野獸》

經典黃藍配色，貝兒著住夏季必備一字膊連身裙，野獸風格則帶點都會紳士感，好得體嘅smart casual穿搭，出席晚宴、婚禮亦唔失禮。

2.《魔髮奇緣》

保留樂佩公主鬢辮look，衣著以紫色代表色為主，加頂草帽，好有日系清新感覺，有型嘅男主角係費林就著上白tee加短袖恤衫，同卡通入面一樣咁率性有型。

3.《美人魚》

當然係以海洋風為主啦，男女都係一身藍白清爽色系，好適合去Disney Sea玩!

4.《阿拉丁》

男生唔駛擔心，唔係叫你學阿拉丁咁著背心騷肌，沿用主角衣著配色，變成T恤及短袖恤衫，至於女生都好易跟，靠髮型及綁髮帶，加上天藍色服裝就好有茉莉style啦，黎緊好快有真人版電影上映，著住去睇夠哂貼題!

圖片來源：twitter.com@meecosme_

#港女講日 #column #lifestyle

[hkgirlinjp]

女人識趣！日男最介意伴侶講嘅3大NG句子

成人聽男人講「無所謂」，但事實上佢真係完全唔介意?早前日雜anan網站介紹3句「唔可以同男友講嘅NG句子」，女人隨口講嘅嘢，可能男人會認為係「言語暴力」，頂唔順要同你分手!

1.收入比較

「明明人哋同你同年，但人哋好似賺好多錢...」情侶間傾計談及其他朋友嘅收入唔出奇，不過一般男人其實好在意自身經濟能力，如果女友成日拎嚟同人比較，好易令佢意志消沉。

2.衣著品味

「呢件衫好核突，唔好再著啦...」男生普遍冇女生咁有fashion sense，不過太直接批評男生「衣著老土」、冇

時裝品味等，會令男人冇哂自信，覺得同你和相處好有壓力。與其直接彈佢著得差，不如陪佢shopping改造佢仲好。

3.決策能力

「明明係點解唔可以快啲決定?」好多女人認為做男人就要有「果斷決策」嘅能力，去邊度玩、食邊間餐廳等等，係咪都一句「你話事啦」，到男人認真思考時又嫌佢慢嫌佢漏氣，如果再多口講句「你係咪男人嚟架少少嘢都決定唔到」，對方會覺得你呢個女人好煩好煩啊，飛得。

圖片來源：Pakutaso

#港女講日 #column #relationship

[hkgirlinjp]

馬鹿=白痴！5個港人勁易誤會嘅日文漢字

港人一年四季熱愛出門旅行，不過經常淤出國際，瘀事甚多...

早前有網民於「連登討論區」發文徵召因語言不通或對當地社會文化唔理解而發生嘅瘀事，有人指去到日本大阪黑門市場，聽到串燒店店員不停係咁講「可以試可以試」，滿心歡喜準備試食時，身旁友人立即出手阻止，解釋對方只係講日文「おいしい」(o i shi i)，是係「好味」，場面尷尬。

其實喺香港都成日聽到「おいしい」，唔少人質疑事主點解咁都聽唔明，亦有人分享日文漢字笑話:「有人去日本超市買蘿蔔，蘿蔔漢字係大根，佢見到咁大條食唔晒，想要條細D，就用漢字寫小根問女店員，對方表情尷尬又好笑，原來小根係解男性性器官!」

其實好多日本漢字就算聽落睇落同中文超似，但當中意思可以完全唔同!以下5個經常被人誤解嘅漢字，出發到日本前最好記一記，以免鬧出笑話!

1.切手=郵票

中文會令人聯想到攞刀切落自己隻手度咁解，其實日文漢字「切手」係「切符手形」略語，指郵票，喺日本郵局寄明信片時應該有見過呢個字吧。

2.勉強=讀書

中文解有啲事唔情願去做、又或者指能力不足但依然要夾硬去做，畀人感覺比較負面。但日文「勉強」就好正面喇，有學習、讀書嘅意思。

3.手袋=手套

女士shopping見到「手袋」減價唔好開心住，因為日文漢字「手袋」指手套，而港人口中可以拎出街嘅「手袋」，會用漢字「鞄」(かばん)或者直接由英文「handbag」譯過去嘅片假名「ハンドバッグ」、「バッグ」嚟表示。

4.人参=紅蘿蔔

餐牌見到人参唔好以為係高級食材，日文「人参」解作紅蘿蔔，而補身用嘅人參喺日本有「御種人參」、「高麗人參」等多種說法。

5.無料案內所=風月場所

日文「無料」指免費，而「案內」有介紹同帶路嘅意思，不過呢兩個字放埋一齊大家要小心，因為佢唔係指會免費幫你帶路或者免費俾旅遊情報你，而係代表風月場所!

6.馬鹿=白痴

馬鹿日文係「ばか」(Ba ka)，常用於表示蠢蛋、白痴、糊塗等，含貶義，可以講係日本國民「鬧人」嘅代表詞。

圖片來源：ig@kaka_kayee

#港女講日 #column #lifestyle

[hkgirlinjp]

點樣著得GFable? 日本男生票選 3大最愛女生打扮

水手服對男生來講係咪真係咁有魔力?話說近日一名28歲女生於「Yahoo！知恵袋」分享自己被男友要求着「女高中生感覺嘅服裝」出街而超煩惱，引起網民熱烈討論。

呢名女生有感自己都就來30歲，用「着JK制服去約會實在太難為情」呢個理由拒絕男友要求，點知男友死纏難打::「咁你起碼都要著格仔短裙赴約啦!」

版主猶豫，於是網上問其他女網民意見:「係咪應該將就，買條睇落似制服嘅短裙?」好多女網民表示，如果「自己有抗拒，唔應該完全順從對方」、「間中一兩次，例如男友生日時著都可以」、「拍拖應該係雙方都覺得開心，既滿足對方要求，同時要喺自己可接受範圍內，先可以維持健康穩定嘅戀愛關係。」

除咗制服，仲有咩打扮可以吸引男人眼球呢?又唔係一味靠露肉或賣弄性感就得嘅..,

1.Oversize上衣/恤衫

鬆身衫總會令男人有遐想，好似女生啱啱瞓醒著住自己嘅衫咁，帶有絲絲挑逗嘅性感。

2.貼身連身裙

貼身衣物最能突顯女性S型美態，喺街上令人忍唔住望多兩眼。

3.應露則露

適當地露下香肩、小蠻腰、鎖骨又或者著少少開叉嘅裙，每次露少少，比同一時間又露心口又露大脾肉更勝一籌。

圖片來源：ig@arina_hashimoto1215

#港女講日 #column #relationship

[hkgirlinjp]

日單身女漫畫家：「除咗錢，無野滿足」真心話定炫耀？

不少香港年輕人，日做夜做，希望可以襯後生賺多些錢，買樓買車或移民，等未來的日子好過少少。係日本，一個今年51歲的日本女漫畫家柴田亞美都一樣，年輕時日畫夜畫，畫漫畫同交稿無限輪迴，結果畫出不少大受歡迎的漫畫，如《南國少年奇小邪》、《格鬥小霸王》等，令佢賺到好多錢，夠佢係40幾歲時，係東京高級住宿區麻布十番一口氣買下一棟價值1.6億日幣（過千萬港幣）的三房豪宅。

可惜年輕時，柴田只懂同漫畫「拍拖」，23歲時的結婚對象卻出軌，夢想係做家庭主婦的柴田至今仍然單身，再大的豪宅都係獨自居住，令佢係富士電視台綜藝節目「OUT×DELUXE」（アウト×デラックス）直接表示「除了錢，甚麼都沒有滿足。」

由節目中可見，呢個三房豪宅，單係廳都有超過400呎，平時除了同愛犬相依為命，需要趕稿時就同助手於工作室裡埋頭苦幹。佢重自爆，因為間屋太大，平常想要補個眠就會直接訓係走廊、紅酒當水喝，紓解壓力的方式就係觀賞職業摔角，同現場觀眾一齊叫喊，但內心卻空虛到爆。嘩，情況同公司的單身高層女魔頭一樣，不如有意無意Send比佢睇下啦！

相片來源：網上截圖

#港女講日 #column #lifestyle

[hkgirlinjp]

怕個仔「餓親」...港媽打尖搶港男杯軟雪糕一句對唔住都冇

食軟雪糕、雪糕、雪糕....天氣開始熱，不過都唔駛同人爭食雪糕啩?早幾日就發生咗一宗港媽同港男爭軟雪糕個案，引來網民熱議。

日前有網民投稿至FB專頁「生仔要考牌系列」，指有日去麥記買軟雪糕，正當輪到佢個等候編號時，突然有港媽帶同年約6、7歲嘅小朋友「一手搶咗店員手上嘅軟雪糕」，佢發現野蠻港媽個籌係157，而事主係139，仲差成廿個先到佢兩母子。

其後店員問港媽係咪139號，港媽辯稱「我個仔好肚餓，唔通由得佢咩！嗱，最多我咪依家畀番佢」，但樓主驚見「小朋友啲手指已經黏住開始溶化嘅雪糕，好嘔心」，無奈之下只好「禮讓」小朋友。

點知港媽得寸進尺，一句對唔住都冇仲串事主「點知佢咁大個人都要學細路仔食軟雪糕啫」，店員見狀只好苦笑同事主講唔好意思，再擠另一杯雪糕畀佢，事主事後揶揄「港媽嘅孩子唔餓得，原來大個咗就唔可以食軟雪糕」。

網民怒斥該名港媽「冇家教」、「唔應該有後代」、「打尖搶嘢仲聲大夾惡」、「超級怪獸老母」...亦有網民指事主唔應該太忍讓，「我寧願掉咗佢都唔俾，肚餓大晒?」、「畀我一定鬧到佢反艇」。

圖片來源：wikimedia

#港女講日 #column #lifestyle