urduclassic

[urduclassic]

آخری چند دن دسمبر کے

ہر برس ہی گراں گزرتے ہیں خواہشوں کے نگار خانے میں

کیسے کیسے گماں گزرتے ہیں رفتگاں کے بکھرتے سالوں کی

ایک محفل سی دل میں سجتی ہے فون کی ڈائری کے صفحوں سے

کتنے نمبر پکارتے ہیں مجھے جن سے مربوط بے نوا گھنٹی

اب فقط میرے دل میں بجتی ہے کس قدر پیارے پیارے ناموں پر

رینگتی بدنما لکیریں سی میری آنکھوں میں پھیل جاتی ہیں

دوریاں دائرے بناتی ہیں دھیان کی سیڑھیوں میں کیا کیا عکس

مشعلیں درد کی جلاتے ہیں ایسے کاغذ پہ پھیل جاتے ہیں

حادثے کے مقام پر جیسے خون کے سوکھے نشانوں پر

چاک کی لائنیں لگاتے ہیں ہر دسمبر کے آخری دن میں

ہر برس کی طرح اب بھی ڈائری ایک سوال کرتی ہے

کیا خبر اس برس کے آخر تک میرے ان بے چراغ صفحوں سے

کتنے ہی نام کٹ گئے ہونگے کتنے نمبر بکھر کے رستوں میں

گرد ماضی سے اٹ گئے ہونگے خاک کی ڈھیریوں کے دامن میں

کتنے طوفان سمٹ گئے ہونگے ہر دسمبر میں سوچتا ہوں میں

ایک دن اس طرح بھی ہونا ہے رنگ کو روشنی میں کھونا ہے

اپنے اپنے گھروں میں رکھی ہوئی ڈائری، دوست دیکھتے ہونگے

ان کی آنکھوں کے خاکدانوں میں ایک صحرا سا پھیلتا ہو گا

اور کچھ بے نشاں صفحوں سے نام میرا بھی کٹ گیا ہو گا

امجد اسلام امجد   

#Amjad Islam Amjad #Urdu #Urdu Adab #Urdu Ghazal #Urdu poetry #Urdu Poets #World

[urduclassic]

وفا کے خوگر وفا کریں گے یہ طے ہو ا تھا

وفا کے خوگر وفا کریں گے یہ طے ہو ا تھا وطن کی خاطر جیے مریں گے یہ طے ہو ا تھا

بوقتِ ہجرت قدم اُٹھیں گے جو سوئے منزل تو بیچ رستے میں دَم نہ لیں گے یہ طے ہوا تھا

چہار جانب بہار آئی ہوئی تھی لیکن بہار کو اعتبار دیں گے یہ طے ہوا تھا

تمام دیرینہ نسبتوں سے گریز کر کے نئے وطن کو وطن کہیں گے، یہ طے ہوا تھا

خدا کے بندے خدا کی بستی بسانے والے خدا کے احکام پر چلیں گے یہ طے ہوا تھا

بغیرِ تخصیص پست و بالا ہر اک مکاں میں دیئے مساوات کے جلیں گے، یہ طے ہوا تھا

کسی بھی اُلجھن میں رہبروں کی رضا سے پہلے عوام سے اذنِ عام لیں گے، یہ طے ہوا تھا

تمام تر حل طلب مسائل کو حل کریں گے جو طے نہیں ہے، وہ طے کریں گے، یہ طے ہوا تھا

حنیف اسعدی

#Haneef Asadi #Haneef Asadi poetry #Revolutionary Poetry #Urdu #Urdu Adab #Urdu poetry #Urdu Poets #World

[urduclassic]

دُکھ میں نِیر بہا دیتے تھے سُکھ میں ہنسنے لگتے تھے

دُکھ میں نِیر بہا دیتے تھے سُکھ میں ہنسنے لگتے تھے سیدھے سادے لوگ تھے لیکن ، کِتنے اَچھے لگتے تھے

نفرت چَڑھتی آندھی جیسی ، پیار اُبلتے چَشموں سا بَیری ہوں یا سَنگی ساتھی ، سارے اپنے لگتے تھے

بہتے پانی دُکھ سُکھ بانٹیں ، پیڑ بڑے بُوڑھوں جیسے بچّوں کی آہٹ سُنتے ہی ، کھیت لہکنے لگتے تھے

ندیا ، پَربت ، چاند ، نگاہیں، مالا ایک کئی دانے چھوٹے چھوٹے سے آنگن بھی، کوسوں پھیلے لگتے تھے

ندا فاضلی 

#Nida Fazli #Sad Urdu Poetry #Urdu #Urdu Adab #Urdu poetry #Urdu Poets #Urdu Shayari #World

[urduclassic]

کتب بینی کے شوقین افراد مفت کتابیں کیسے پڑھ سکتے ہیں؟

ڈیجیٹل دور میں جہاں زندگی کے معمولات میں بے شمار تبدیلیاں آئی ہیں وہاں روایتی کتابوں کے حوالے سے بھی بہت کچھ تبدیل ہو چکا ہے۔ تاہم یہ حقیقت نظرانداز نہیں کی جا سکتی کہ کتب بینی کے عادی افراد تاحال روایتی کتابیں پڑھنے کی اپنی عادت سے مجبور ہیں اور وہ اپنے اس شوق کی تسکین کے لیے جب تک کتاب کا مطالعہ نہ کریں تو ذہنی سکون حاصل نہیں کر پاتے۔ یہ کہا جائے تو بے جا نہ ہوگا کہ ایسے افراد کتب بینی کے حوالے سے ایک قسم کے سحر میں مبتلا ہوتے ہیں۔ دورحاضر میں جب کوئی کتب بینی کا شوقین اپنے مطالعہ کی عادت سے مجبور ہو کر چند پسندیدہ کتب خریدنے کی خواہش کرتا ہے تو وہ ان کی قیمت دیکھ کر کچھ دیر تو ضرور پریشان ہو جاتا ہے کیونکہ ان قیمتوں میں بے حد اضافہ ہو چکا ہے اور ایک کتاب 13.95 سے 18 ڈالر تک دستیاب ہے، اس حساب سے اگر چند اضافی کتب خریدی جائیں تو بل باآسانی 100 ڈالر کا تو بن ہی جاتا ہے۔ سعودی میگزین الرجل نے مطالعے کے شوقین افراد کے لیے چند ایسے طریقے بتائے ہیں جنہیں برائے کار لا کر وہ اضافی رقم خرچ کیے بغیر مفت میں اپنی من پسند کتابیں حاصل کرسکیں گے۔ 

1 ۔ لائبریری جائیں ہر ملک میں ہزاروں عوامی کتب خانے موجود ہوتے ہیں جہاں انواع و اقسام کی کتابیں خواہ وہ روایتی ہوں یا ڈیجیٹل کاپی کی صورت میں دستیاب ہوتی ہیں۔ یہ بھی یقینی امر ہے کہ کسی نہ کسی لائبریری میں آپ کی من پسند کتابیں بھی ضرور موجود ہوں گی۔ اب آپ کو صرف یہ کرنا ہے کہ آپ اس لائبریری کے رُکن بن جائیں اور وہاں سے اپنی من پسند کتابیں یا سیریز حاصل کریں اور انہیں پڑھنے کے بعد مقررہ وقت پر واپس کر دیں۔ اس طرح آپ کو کتابیں خریدنے کے لیے اضافی رقم خرچ نہیں کرنا پڑے گی۔ 

2 ۔ کتب خانوں کی ایپلکیشنز آپ اگر کسی لائبریری میں جانے کے خواہاں نہیں تو کوئی مسئلہ نہیں، سمارٹ ایپس نے یہ مسئلہ بھی تقریباً حل کر ہی دیا ہے جس کے ذریعے آپ آسانی سے کسی بھی کتب خانے میں موجود کتابوں کا مطالعہ کرسکتے ہیں، جس کے لیے آپ کو صرف یہ کرنا ہو گا کہ کتب خانے کے ہوم پیچ پر اپنا اکاؤنٹ بنائیں جس کے بعد آپ کوئی رقم ادا کیے بغیر کسی وقت بھی اپنی من پسند کتابوں کا مطالعہ کر سکتے ہیں۔ 

3 ۔ مفت ڈیجیٹل کتابیں   روایتی کتاب کی طرح ڈیجیٹل کتب کو اگر آپ اپنے ہاتھوں میں نہیں تھام سکتے تو اس کا یہ مطلب نہیں کہ وہ باقاعدہ کتاب نہیں ہے، ویب سائٹ ’بک بوب‘ آپ کو یہ سہولت بھی فراہم کرتی ہے کہ جس کتاب کا آپ مطالعہ کرنا چاہتے ہیں اس کا عنوان درج کریں اور ویب سائٹ چند لمحوں میں تمام معلومات فراہم کر دے گی کہ مذکورہ کتاب کس لائبریری میں دستیاب ہے، اور اسے مفت میں کیسے ڈاؤن لوڈ کیا جاسکتا ہے۔ 

4 ۔ بک ٹریڈنگ سائٹس کے رُکن بنیں انٹرنیٹ پر اب شیئرنگ کی سہولت بھی دستیاب ہے جس سے آپ دیگر قارئین کے ساتھ کتابیں شیئر کر سکتے ہیں۔ اس حوالے سے متعدد ویب سائٹس موجود ہیں جن میں ’بک موچ‘ ’پیپربیک سواپ‘ وغیرہ شامل ہیں جن پر آپ اپنی کتاب دوسرے قارئین کے ساتھ شیئر کر سکتے ہیں۔ شیئرنگ کے لیے جب آپ کسی کو میل کرتے ہیں تو آپ کو اس کے پوائنٹس بھی ملتے ہیں۔ 

5۔ ریٹنگ کرنا کسی بھی کتاب کے بارے میں رائے دینا بہت اہم ہوتا ہے۔ اس حوالے سے آپ اگر رائے دیتے ہیں تاکہ دوسرے لوگ آپ کے مطالعہ اور حاصل مطالعے کا جائزہ لینے کے بعد کتاب کے بارے میں معلومات حاصل کرسکیں تو ’نیٹ گیلی‘ جیسی ویب سائٹس کی جانب سے کتاب کی درجہ بندی کرنے یعنی اس کے بارے میں رائے دینے والوں کو پیشگی کاپیاں ارسال کی جاتی ہیں۔ آپ اگر سوشل میڈیا پر ایکٹیو ہیں اور آپ کے فالوورز کی تعداد بھی زیادہ ہے اور کتابوں پر اپنی رائے بھی دیتے ہیں تو اس صورت میں کوئی بھی پبلشر آپ کو نئی کتابوں کی کاپیاں ارسال کرنے میں پس و پیش سے کام نہیں لے گا۔ 

6۔ چھوٹی اور مفت لائبریری تلاش کریں جب بھی آپ اپنے علاقے کی سیر کریں تو کوشش کریں کہ وہاں چھوٹی لائبریری تلاش کریں جہاں آپ کو متعدد کتابیں مفت میں پڑھنے کے لیے مل جائیں گی۔ یہ بھی ممکن ہے کہ آپ اپنی پڑھی ہوئی کسی کتاب کے بدلے میں دوسری کتاب حاصل کرسکیں۔ 

7 ۔ سوشل میڈیا آپ اگر سوشل میڈیا پر سرگرم ہیں اور کتب بینی کے شوقین بھی ہیں تو اس صورت میں آپ یقینی طور پر پبلشرز کے ایڈریسز سے بھی واقف ہوں گے۔ عام طور پر پبلشرز ایسے افراد کو جو کتب بینی کا شغف رکھتے ہیں انہیں مفت میں نئی کتابیں تحفے کے طور پر بھی ارسال کرتے ہیں تو کچھ یوں بھی آپ بنا کچھ خرچ کیے اپنے مطالعے کا شوق پورا کر سکتے ہیں۔ 

بشکریہ اردو نیوز

#Books #Books Reading #Digital Books #Free Books #Free Books Reading #Free Libraries #Libraries #World

[urduclassic]

اگر کبھی میری یاد آئے

اگر کبھی میری یاد آئے تو چاند راتوں کی نرم دلگیر روشنی میں

کسی ستارے کو دیکھ لینا اگر وہ نخلِ فلک سے اڑ کر

تمہارے قدموں میں آ گرے تو یہ جان لینا وہ استعارہ تھا میرے دل کا

اگر نہ آئے مگر یہ ممکن ہی کس طرح ہے

کہ تم کسی پر نگاہ ڈالو تو اس کی دیوارِ جاں نہ ٹوٹے

وہ اپنی ہستی نہ بھول جائے اگر کبھی میری یاد آئے

گریز کرتی ہوا کی لہروں پہ ہاتھ رکھنا میں خوشبوؤں میں تمہیں ملوں گا

مجھے گلابوں کی پتیوں میں تلاش کرنا میں اوس قطروں کے آئینوں میں تمہیں ملوں گا

اگر ستاروں میں، اوس قطروں میں، خوشبوؤں میں نہ پاؤ مجھ کو تو اپنے قدموں میں دیکھ لینا، میں گرد ہوتی مسافتوں میں تمہیں ملوں گا

کہیں پہ روشن چراغ دیکھو تو جان لینا کہ ہر پتنگے کے ساتھ میں بھی بکھر چکا ہوں

تم اپنے ہاتھوں سے ان پتنگوں کی خاک دریا میں ڈال دینا میں خاک بن کر سمندروں میں سفر کروں گا

کسی نہ دیکھے ہوئے جزیرے پہ رک کے تم کو صدائیں دوں گا

سمندروں کے سفر پہ نکلو تو اس جزیرے پہ بھی اترنا   امجد اسلام امجدؔ  

#Amjad Islam Amjad #Sad Urdu Poetry #Urdu #Urdu poetry #Urdu Poets #Urdu Shayari #World

[urduclassic]

صحرا ہی غنیمت ہے، جو گھر جاؤگے لوگو

صحرا ہی غنیمت ہے، جو گھر جاؤگے لوگو وہ عالمِ وحشت ہے کہ مر جاؤگے لوگو

یادوں کے تعاقب میں اگر جاؤگے لوگو میری ہی طرح تم بھی بِکھرجاؤگے لوگو

وہ موجِ صبا بھی ہو تو ہشیار ہی رہنا سُوکھے ہُوئے پتّے ہو بِکھر جاؤگے لوگو

اِس خاک پہ موسم تو گُزرتے ہی رہے ہیں موسم ہی تو ہو تم بھی گزر جاؤگے لوگو

اُجڑے ہیں کئی شہر، تو یہ شہر بَسا ہے یہ شہر بھی چھوڑا تو کدھر جاؤگے لوگو

حالات نے چہروں پہ بہت ظلم کئے ہیں آئینہ اگر دیکھا تو ڈر جاؤگے لوگو

اِس پر نہ قدم رکھنا کہ یہ راہِ وفا ہے سرشار نہیں ہو، کہ گزر جاؤ گے لوگو

سرشار صدیقی

#Revolutionary Poetry #Urdu #Urdu Adab #Urdu poetry #Urdu Poets #Urdu Shayari #World

[urduclassic]

خلشِ ہجرِ دائمی نہ گئی تیرے رُخ سے یہ بے رُخی نہ گئی

خلشِ ہجرِ دائمی نہ گئی تیرے رُخ سے یہ بے رُخی نہ گئی

پُوچھتے ہیں ، کہ کیا ہُوا دِل کو حُسن والوں کی سادگی نہ گئی

سر سے سودا گیا محبت کا دل سے پر اس کی بے کلی نہ گئی

اور سب کی حکائتیں کہہ دیں بات اپنی کبھی کہی نہ گئی

ہم بھی گھر سے مُنیرؔ ـــــ تب نکلے بات اپنوں کی جب ، سہی نہ گئی

مُنیرؔ نیازی  

#Munir Niazi #Munir Niazi poetry #Urdu #Urdu poetry #Urdu Poets #Urdu Shayari #World

[urduclassic]

سر راہ کچھ بھی کہا نہیں کبھی اس کے گھر میں گیا نہیں

سر راہ کچھ بھی کہا نہیں کبھی اس کے گھر میں گیا نہیں میں جنم جنم سے اسی کا ہوں اسے آج تک یہ پتا نہیں

اسے پاک نظروں سے چومنا بھی عبادتوں میں شمار ہے کوئی پھول لاکھ قریب ہو کبھی میں نے اس کو چھوا نہیں

یہ خدا کی دین عجیب ہے کہ اسی کا نام نصیب ہے جسے تو نے چاہا وہ مل گیا جسے میں نے چاہا ملا نہیں

اسی شہر میں کئی سال سے مرے کچھ قریبی عزیز ہیں انہیں میری کوئی خبر نہیں مجھے ان کا کوئی پتا نہیں

بشیر بدر

#Bashir Badr #Bashir Badr Poetry #Urdu #Urdu Adab #Urdu poetry #Urdu Poets #Urdu Shayari #World

[urduclassic]

یہ کس نے کہا تم کوچ کرو، باتیں نہ بناؤ انشا جی

یہ کس نے کہا تم کوچ کرو، باتیں نہ بناؤ انشا جی یہ شہر تمہارا اپنا ہے، اسے چھوڑ نہ جاؤ انشا جی

جتنے بھی یہاں کے باسی ہیں، سب کے سب تم سے پیار کریں کیا اِن سے بھی منہ پھیرو گے، یہ ظلم نہ ڈھاؤ انشا جی

کیا سوچ کے تم نے سینچی تھی، یہ کیسر کیاری چاہت کی تم جن کو ہنسانے آئے تھے، اُن کو نہ رلاؤ انشا جی

تم لاکھ سیاحت کے ہو دھنی، اِک بات ہماری بھی مانو کوئی جا کے جہاں سے آتا نہیں، اُس دیس نہ جاؤ انشا جی

بکھراتے ہو سونا حرفوں کا، تم چاندی جیسے کاغذ پر پھر اِن میں اپنے زخموں کا، مت زہر ملاؤ انشا جی

اِک رات تو کیا وہ حشر تلک، رکھے گی کھلا دروازے کو کب لوٹ کے تم گھر آؤ گے، سجنی کو بتاؤ انشا جی

نہیں صرف "قتیل" کی بات یہاں، کہیں ساحر ہے کہیں عالی ہے تم اپنے پرانے یاروں سے، دامن نہ چھڑاؤ انشا جی۔

قتیل شفائی 

#Ibn-e-Insha #Ibn-e-Insha poetry #Qateel Shifai #Qateel Shifai poetry #Urdu poetry #Urdu Poets #Urdu Shayari #World

[urduclassic]

محبت کیا ہے دل کا درد سے معمور ہو جانا

محبت کیا ہے دل کا درد سے معمور ہو جانا متاعِ جاں کسی کو سونپ کر مجبور ہو جانا

بسا لینا کسی کو دل میں دل ہی کا کلیجہ ہے پہاڑوں کو تو بس آتا ہے جل کر طور ہو جانا

یہاں تو سر سے پہلے دل کا سودا شرط ہے یارو کوئی آسان ہے کیا؟ سرمد و منصور ہو جانا

قدم ہے راہِ الفت میں تو منزل کی ہوس کیسی یہاں تو عین منزل ہے تھکن سے چور ہو جانا

نظر سے دور رہ کر بھی تقؔی وہ پاس ہیں میرے کہ میری عاشقی کو عیب ہے مہجور ہو جانا

مفتی تقی عثمانی

#Mufti Taqi Usmani #Mufti Taqi Usmani poetry #Urdu #Urdu poetry #Urdu Poets #Urdu Shayari #World

[urduclassic]

عادت ہی بنا لی ہے تم نے تو منیرؔ اپنی جس شہر میں بھی رہنا اکتائے ہوئے رہنا

بے چین بہت پھرنا گھبرائے ہوئے رہنا اک آگ سی جذبوں کی دہکائے ہوئے رہنا

چھلکائے ہوئے چلنا خوشبو لب لعلیں کی اک باغ سا ساتھ اپنے مہکائے ہوئے رہنا

اس حسن کا شیوہ ہے جب عشق نظر آئے پردے میں چلے جانا شرمائے ہوئے رہنا

اک شام سی کر رکھنا کاجل کے کرشمے سے اک چاند سا آنکھوں میں چمکائے ہوئے رہنا

عادت ہی بنا لی ہے تم نے تو منیرؔ اپنی جس شہر میں بھی رہنا اکتائے ہوئے رہنا

منیر نیازی

#Munir Niazi #Munir Niazi poetry #Sad Urdu Poetry #Urdu #Urdu poetry #Urdu Poets #Urdu Shayari #World

[urduclassic]

دُنیا میں قتیلؔ اُس سا منافق نہِیں کوئی جو ظلم تو سہتا ہے بغاوت نہِیں کرتا

وُہ شخص کہ مَیں جس سے مُحبّت نہِیں کرتا ہنستا ہے مجھے دیکھ کے ، نفرت نہِیں کرتا

پکڑا ہی گیا ہُوں تو مجھے دار پہ کھینچو سچا ہُوں، مگر اپنی وکالت نہِیں کرتا

کیوں بخش دیا مجھ سے گنہگار کو مولا منصف تو کسی سے بھی رعایت نہِیں کرتا

گھر والوں کو غفلت پہ سبھی کوس رہے ہیں چوروں کو مگر کوئی، ملامت نہِیں کرتا

کِس قوم کے دِل میں نہِیں جذباتِ براہیم کِس ملک پہ نمرود حکومت نہِیں کرتا

دیتے ہیں اُجالے مِرے سجدوں کی گواہی مَیں چُھپ کے اندھیرے میں عبادت نہِیں کرتا

بُھولا نہیں مَیں آج بھی آدابِ جوانی مَیں آج بھی اوروں کو نصیحت نہِیں کرتا

اِنسان یہ سمجھیں کہ یہاں دفن خدا ہے مَیں ایسے مزاروں کی، زیارت نہِیں کرتا

دُنیا میں قتیلؔ اُس سا منافق نہِیں کوئی جو ظلم تو سہتا ہے ـــــ بغاوت نہِیں کرتا

قتیلؔ شفائی  

#Qateel Shifai #Qateel Shifai poetry #Revolutionary Poetry #Urdu #Urdu poetry #Urdu Poets #Urdu Shayari #World

[urduclassic]

اوجھل سہی نِگاہ سے ڈوبا نہیں ہوں میں

اوجھل سہی نِگاہ سے ڈوبا نہیں ہوں میں اے رات ہوشیار کہ،،،،،، ہارا نہیں ہوں میں

دَرپیش صبح و شام،،،،،، یہی کَشمکش ہے اب اُس کا بَنوں میں کیسے کہ اپنا نہیں ہوں میں

مجھ کو فرشتہ ہونے کا دعویٰ نہیں مگر جِتنا بُرا سمجھتے ہو اُتنا نہیں ہوں میں

اِس طرح پھیر پھیر کے،،،،، باتیں نہ کیجیئے لہجے کا رُخ سمجھتا ہوں بچہ نہیں ہوں میں

مُمکن نہیں ہے مجھ سے یہ طرزِ مُنافقت دُنیا تیرے مزاج کا،،، بَندہ نہیں ہوں میں

امجدؔ تھی بھیڑ ایسی کہ،، چلتے چلے گئے گِرنے کا ایسا خوف تھا ٹِھہرا نہیں ہوں میں

امجد اسلام امجد

#Amjad Islam Amjad #Urdu #Urdu poetry #Urdu Poets #Urdu Shayari #World

[urduclassic]

مرحلے شوق کے، دشوار ہوا کرتے ہیں

مرحلے شوق کے، دشوار ہوا کرتے ہیں سائے بھی راہ کی دیوار ہوا کرتے ہیں

وہ جو سچ بولتے رہنے کی قسم کھاتے ہیں وہ عدالت میں گنہگار ہوا کرتے ہیں

وہ جو پتھر یونہی رستے میں پڑے رہتے ہیں ان کے سینے میں بھی شہکار ہوا کرتے ہیں

صرف ہاتھوں کو نہ دیکھو کبھی آنکھیں بھی پڑھو کچھ سوالی بڑے خودار ہوا کرتے ہیں

صبح کی پہلی کرن جن کو رلا دیتی ہے وہ ستاروں کے عزادار ہوا کرتے ہیں

شرم آتی ہے کہ دشمن کسے سمجھیں محسن دشمنی کے بھی تو معیار ہوا کرتے ہیں

شاعر محسن نقوی

#Mohsin Naqvi #Mohsin Naqvi poetry #Revolutionary Poetry #Urdu #Urdu poetry #Urdu Poets #Urdu Shayari #World

[urduclassic]

چمن میں رنگ بہار اترا تو میں نے دیکھا

چمن میں رنگ بہار اترا تو میں نے دیکھا نظر سے دل کا غبار اترا تو میں نے دیکھا

میں نیم شب آسماں کی وسعت کو دیکھتا تھا زمیں پہ وہ حسن زار اترا تو میں نے دیکھا

گلی کے باہر تمام منظر بدل گئے تھے جو سایۂ کوئے یار اترا تو میں نے دیکھا

خمار مے میں وہ چہرہ کچھ اور لگ رہا تھا دم سحر جب خمار اترا تو میں نے دیکھا

اک اور دریا کا سامنا تھا منیرؔ مجھ کو میں ایک دریا کے پار اترا تو میں نے دیکھا

منیر نیازی 

#Munir Niazi #Munir Niazi poetry #Urdu #Urdu poetry #Urdu Poets #Urdu Shayari #World

[urduclassic]

ذکر نبیﷺ جہاں ہے وہاں ہم فقیر لوگ

رکھتے ہیں صرف اتنا نشاں ہم فقیر لوگ ذکر نبیﷺ جہاں ہے وہاں ہم فقیر لوگ

لیتے ہی اُنﷺ کا نام مقدر سنور گیا پہنچے ہیں پھر کہاں سے کہاں ہم فقیر لوگ

ہر سانس میں ہے لفظِ مدینہ بسا ہوا رکھتے ہیں یہ اثاثہ جاں ہم فقیر لوگ

گوشہ نشینی و دمِ غربت کے باوجود دستِ عطا سے کب ہیں نہاں ہم فقیر لوگ

آقاﷺ کی رحمتوں سے برابر ہیں فیضیاب جبرئیل آسماں پہ، یہاں ہم فقیر لوگ

انﷺ کا کرم ہے اپنی گلی میں بلا لیا ورنہ کہاں مدینہ ، کہاں ہم فقیر لوگ

مانا کہ ان کے در پہ پہنچ بھی گئے عقیل کیسے کریں گے حال بیاں ہم فقیر لوگ

عقیل عباس جعفری

#Naat #Urdu #Urdu Naat #Urdu poetry #Urdu Poets #Urdu Shayari #World

[urduclassic]

جو ہو نہ سکی بات وہ چہروں سے عیاں تھی

حبیب جالب کی بیگم ایک دن اُن سے ملاقات کیلئے جیل گئیں اور جالب سے کہنے لگیں۔ آپ تو جیل میں آگئے ہو یہ بھی سوچا ہے کہ بچوں کی فیس کا کیا بنے گا اور گھر میں آٹا بھی ختم ہونے والا ہے۔ حبیب جالب نے اس ملاقات کے بارے میں ایک نظم لکھی۔ جس کا عنوان ”ملاقات“ رکھا۔

ملاقات جو ہو نہ سکی بات وہ چہروں سے عیاں تھی حالات کا ماتم تھا ملاقات کہاں تھی

اس نے نہ ٹھہرنے دیا پہروں مرے دل کو جو تیری نگاہوں میں شکایت مری جاں تھی

گھر میں بھی کہاں چین سے سوئے تھے کبھی ہم جو رات ہے زنداں میں وہی رات وہاں تھی

یکساں ہیں مری جان قفس اور نشیمن انسان کی توقیر یہاں ہے نہ وہاں تھی

شاہوں سے جو کچھ ربط نہ قائم ہوا اپنا عادت کا بھی کچھ جبر تھا کچھ اپنی زباں تھی

صیاد نے یونہی تو قفس میں نہیں ڈالا مشہور گلستاں میں بہت میری فغاں تھی

تو ایک حقیقت ہے مری جاں مری ہم دم جو تھی مری غزلوں میں وہ اک وہم و گماں تھی

محسوس کیا میں نے ترے غم سے غم دہر ورنہ مرے اشعار میں یہ بات کہاں تھی 

حبیب جالب

#Habib Jalib #Habib Jalib Poetry #Revolutionary Poetry #Urdu #Urdu poetry #Urdu Poets #Urdu Shayari #World