ما أجمل العيد في طفل يطالعنا
تقول عيناه حبا: أعطني عيدي
ما أجمل العيد في شيخ يعلمنا
درس السنين بتكبير وتحميد
ندعو لمن رحلوا والذكريات بنا
شجيّة بين مفقود ومولودِ
ما كان للعيد لولا وصلكم فرح
عيدي وليد وأنتم فرحة العيد* 🤍💜
فيه كرسي عندنا في الصالة كان بابا دايما يقعد عليه بعد ما يرجع من الشغل ويقعدني على رجله ويحضني ونقعد نغني.. وبعدين أقوله هلعبك لعبة.. هسألك سؤال، لو جاوبت صح هديك بوسة، لو جاوبت غلط هديك تسعة وتسعين بوسة.. كان بيحاوب غلط، عشان أبوسه.. واما اتلخبط يقولي عيدي من الاول..
أنا اتعلمت العد في خد بابا.. واتعلمت القراية عشان اقرا كاتبين عن بابا إيه في الجرنان.. اتعلمت كل حاجة جميلة بسبب بابا.. حبيت المزيكا والسينما والزرع والحيوانات.. اتعلمت الرحمة من ابويا.. اتعلمت اني مسيبش حد في ضيقة.. واتعلمت إن الناس فيها عيوب، ولازم ناخدهم "شقلة" لو بنحبهم.. اتعلمت منه أعذر غيري، واتعلمت إن فلوسي مش رزقي لوحدي، دا فيها رزق ناس تانية ربنا هيحطهم في سكتي عشان يشوف هرد الأمانة ولا لاء.. اتعلمت منه أحب وإن ميهمنيش الشخص التاني يحبني ولا لاء.. لإن الحب إننا نحب مش نتحب..
اتعلمت منه أن الدنيا قاسية بس ساعات بيكون في ايدينا نعدل موازينها، بضحكة ، بأكلة، بأغنية.. اتعلمت إن اللي يحب حد هيحارب عشانه، اتعلمت اني مستناش رد الجميل.. اللي يعمل خير، يعمله ويرميه البحر.. واتعلمت إن الطيبة مش مبرر إني أسيب حد ياخد حقي.. الطيبة إنك متئذيش حد، لكن حقك افضل وراه لحد ما تاخذه.. واتعلمت من موته إن مفيش حاجة بتكمل على حالها، وإنه محدش دايم لحد..
النهاردة يبقى عدى ٢٦ سنة على موت بابا.. عمري ما هنسى، وعمري ما هبطل أدعيلك، وعمري ما هبطل أحكي عنك.. جايز أبطّل أحزن، لكن مش هبطل يصعب عليا جميع البشر عشان أبوهم مكانش ماهر مصطفى ..