arrouemezv

[arrouemezv]

Kick-ass part 1

Demat deoc'h holl. Emaon o vont da gomz deoc'h eus ar film Kick-ass. Kick-ass a zo ur film bet savet gant Matthew Vaughn deuet er-maezh e 2010. E-barzh ar film-mañ ez eus an arozh pennañ : Kick-ass, c'hoaroet gant Aaron Johnson-Taylor, Bigdaddy c'hoariet gant Nicolas Cage, Red Mist gant Christopher Mintz-Plasse ha HitGirl c'hoariet gant Chloë Grace-Moretz. Kontañ a ra istor Dave (Kick-ass) hag en deus c'hoant da vezañ un dreist-aroz met emañ o vont da welout n'eo ket ken aes hag e soñje. Kavet 'm eus ar film dreist, kalz a aksion a zo, gwad ivez rak ret eo din lavarout n'eo ket ur film gant un tammig feulster. Ket, bez ez eus gwad ha kalzig a feulster. Met daoust d'ar feulster, e chom ar film dispar ha fentus memestra. Neuze m'ho peus c'hoant gwelout ur film gant feulster hag tout ar pezh meneget, sellit ouzh Kick-ass. Ober a rin ur pennad all ar wech a zeu diwar-benn an eil Kick-ass. Kenavo

An dañvad-foll

[arrouemezv]

2013 : Bloavezh al "Loosers"

Inside Llewyn Davis : Istor ur soner folk a glask gounit e bara gant e gitar. Mont a ra a zi da zi da glask lojeiz, c'hwitaat a ra degouezioù a c'helfe savetein anezhañ. Pep hini eus e divizoù a zo diefedus ha ne gasont da nentra. Egasus eo an dudenn : Implijout a ra e mignoned evel ma vefent objedoù a servij dezhañ evit kaout ul lojeiz.

Filmet eo mat 'tre an dudennoù egasus 'se, Ur c'haner Folk disfi, ur vignonez emgar, un den kozh tev, falakr ha drammet. Hag e kreiz an dra 'se ur c'hazh bihan o redek e straedoù New York. Fent Du ar breudeur Cohen a vez gwelet mat ha n'eo ket evit displijout deomp !

Frances Ha : Frances a zo ur vaouez yaouank o chom e New York, gant he vignonez tostañ, Sophie. En em glevout a reont mat tre betek ma tilojfe sophie en ur randi all, tostoc'h deus he labour. en em gavout a ra e-unan Frances hag e rank kavout ul lojeis all... met n'eo ket ken aes en ober pa chomec'h e New York ha pa n'eo ket gwall uhel gopr un dañsourez.

Benn ar fin ne c'hoarvez netra dreistordinal d'an harozez.... An harozes e-unan a zo ispisial ha dedennus. C'hoariet mat tre gant an aktourez eo, farsus ha dedenus eo atav an divizioù. Alies mat e vez an harozed o leñvañ hag o chikanañ er filmoù, er film-mañ eo berr tre an "emganioù" etre an dudennoù. Leun a souezadennoù int hag e zeblantont bezañ gwirion, naturel ha souezus war ar memes-tro.

Ne zeus ket kalz a chañs gant an dudennoù en daou film-mañ, c'hwitaat a reont o raktresoù darn vrasañ an amzer. Ur sell dic'hortoz o deus war ar vuhez evit 'se. Tu 'zo soñjal eo menet ar skridaozourien gant ar c'hoant laoskel da gouezañ kostez sirius ar vuhez, ha n'ompas gortoz re a zraoù diouti.

Ouzhpenn da 'se e vez merzet ne 'z eus ket senenn reizhel, na istor karantez ebet en daou film-mañ ar pezh a zo ral tre er Cinema !

Pennad Skrivet gant Laouen

#looser #inside llewyn davis #frances ha #filmoù #films #critique

[arrouemezv]

Ulysse, un heuliadenn war ar rouedad

Plijout a ra deoc'h ar paotred blevek ? Peotramant an dud divarvel ? Sellit 'ta ouzh heuliadenn web Ulysse : istor ur paotr 24 bloaz en deus kollet e memor e kerzh ur gwallzarvoud, hag a zo o klask adkavout ur vuhez didrubuilh...pe doareoù disheñvel da vervel, dipant a ra eus ar mare.

O paouez kregiñ da embann rannfilmoù o heuliadenn emaint hag e vefe kredet bezañ o sellet ouzh un heuliadenn gant ur sammad mat a arc'hant, pa n'o deus un nebeut hepken. Farsus an istor, skrivet en doare brav hag aes da gompren ha da gregiñ 'barzh, Ulysse a zo un heuliadenn web brav-spontus. 

M'o peus c'hoant kaout plijadur en ur sellet ouzh un heuliadenn hep bezañ re tapet gant an amzer eo evidoc'h an heuliadenn-se rak ne 'z eus nemet rannfilmoù berr ha div wech ar miz, neuze arabat kaout aon ha krogit 'barzh ! Sikour o deus ezhomm evit gellout kenderc'hel hag e c'heller reiñ ar sikour-se just en ur sellet ouzh o videoioù ha m'o deus plijet deoc'h : LIKE !

Setu liamm o chadenn YT : http://www.youtube.com/user/ulyssewebserie?feature=watch

[arrouemezv]

Shangri la

Notenn: 3,5/5

A-boan 18 vloazh e oa Jake bugg p'eo deuet er meaz e bladenn gentañ hag a 'n oa great berzh . An div ganouenn bennañ  "Lightning Bolt" ha "Two Fingers" a oa disheñvel a-walac'h deus ar sonerezh a vez great gant paotred yaouank e oad an deiz ha hiziv. Un doare folk/rock en ur ouzhpennañ Country, ar pezh a ra tout an diforc'h.Setu ma teu er maez ur bloavezh hep ken goude e bladenn gentañ un eil hini, graet "Shangri La" anezhañ. (Anv ar studio e lerc'h ma 'z eo bet enrollet ar bladenn).

Kregiñ a ra ar bladenn gant knaouennoù nerzus "There Is A Beast And We All Feed It", "Messed Up Kids", "Slumville Sunrise", kannaouennoù plijus-tre gant pozhioù brav ha speredek. An temmoù pennañ ?  An disfi, ar yaouankiz, ar baourentez hag evel just ar garantez. Kanaouennoù zousoc'h a zo e eil lodenn ar bladenn, kanaouennoù skañvorc'h n'int ket evit lod 'zo gwall dalvoudus, ar pezh a zo dipitus (ar memes kudenn a zo bet er bladenn gentañ). Reoù 'zo a zo a-galite memes-tra evel "Storm Passes Away".

Alies eo bet keñveriet Jake Bugg gant ar Beatles, gwir eo e c'heller santout o levezon war kanaouennoù 'zo (evel gant darn vrasañ ar c'hanerien hiziv an deiz, alas...) Met disheñvel eo sonerezh Jake Bugg hag e vez santet ur bersonelezh ispisial dezhañ daoust da 'se. Ma c'helfemp keñveriañ gant ur c'haner all e vefe kentorc'h gant kanerien country/ Folk evel Woody Guthrie (E keñver ar vouezhda skouer)

Memes ma ne vez ket mouzc'houarzhet kalz gant Jake bugg, eo bet savet klip "Slumvill Sunrise" en un doare farsusa -walarc'h ! Ennañ e vez gwelet an aktourez Rosamund Hanson (This is england) : Sevenet eo bet ar c'hlip gant Shane Meadows (sevener ar film-mañ)

Pennad skrivet gant Laouen

#jakebugg #critique #shangrila #Laouen #musique #sonerezh #brezhoneg #breton

[arrouemezv]

Le livre perdu des sortilèges, pe al levr hag a dalvez -3/5. Ya. NEMET ( - ).

Un istor sorserien eo Le livre perdu des sortilèges, skrivet gant Deborah Harkness, met pell eo da vezañ keñveriet da heuliad levrioù Harry Potter. Ur gouc’hemenn re vrav ha diverit e vefe !

Setu diverrañ ofisiel al levr, troet ganin diwar golo a-dreñv ma skouerenn : « Hini diwezhañ ul lignez hir a sorserien eo Diana Bishop, met abaoe pell eo bet dibabet ganti dilezel herezh he familh a-benn splujañ en hec'h enklaskoù skol-veur. Betek an deiz ma vo amprestet ganti un dornskrid hudstrilhouriezh [ alchimie ] : an Ashmole 782. Ne oar ket d’ar mare-se emañ o paouez lakat war well ur sekred kozh ha spontus, hag an holl – drouksperedoù, sorserien ha sunerien-gwad – a zo o troukc'hoantaat anezhañ. En o zouez, Matthew Clairmont, ur suner-gwad ken spouronus ha m'eo divinadellus. « Ul lazher », ‘zo bet lavaret dezhi. En em adkavout a ra buan Diana e-kreiz ar reuz, etre un dornskrid milliget hag ur garantez dibosupl. »

Ha setu hervezon ar pezh ho po da c’houzañv ma lennoc’h al levr-mañ : un istor pounner, enoeus, dioberoù, ur seurt remix Twilight, gwelloc’h ( n’eo ket diaes ), met ur gwir dorr-revr, memestra.

Dibosupl eo stagañ ‘barzh, abalamour d’un istor na grog james, d’un titouriñ pounner ha kalz re hir diwar-benn munudoù ( war-dro un ugent linenn bennak evit ar boued, ar memes tra evit ar gwin, hag tremen a ran war skouerioù all ) hag un haroz pell da lakat kengarantez da sevel ennomp.

Skrivañ kalz evit lavar nebeud a dra. Met aze, 517 pajenn evit netra, kalzik eo memestra. Marteze e krog an istor en eil levr… Met n’on ket evit lenn anezhañ.

Ar gwashañ en istor ? Ur film vo savet. D’en em grougañ e vo, ma ne cheñch ket ar sevenner an istor. Ha cheñchamantoù ‘zo d’ober !

O’Lantern

#levriou

[arrouemezv]

9 mois ferme

Notenn : 4/5

Setu deuet en dro Albert gant e ijin hag e fent ! Gant "Bernie", "le créateur", "Enfermé dehors" pe c'hoazh "Le villain", on oa c'hoarzet betek koll hor alann. Er sinema gall eo Albert unan deus ar re nemetañ o implijout ar fent kriz ha du 'se. Dont a ra neuze en dro hor film aozour karetañ gant "9 mois ferme". Barnerezh eo Ariane (Sandrine Kiberlain, mat-tre en he ferzh), c'hwec'h miz goude bezañ bet lidet ar bloavez nevez (kement ma n'he deus ket soñj ebet ken deus an nozvezh) e zijolo eo dougerezh. Ne vo ket echu gant he zijoloadennoù : anv tad ar babig a zo enrollet e urzhiaterezhioù ar polis, gwasoc'h c'hoazh, ur muntrer eo, gwasoc'h gwasoc'h c'hoazh : Didroc'het en eus ar c'houzañver e tammoù ha drebet e zaoulagad !

Albert a zo en e bleud e-perzh "bob" an dreber daoulagad. Ar memes doare tudenn eo ur wech ouzhpenn : Souezus, bugel ha sot alies mat. Mont a ra mat-tre dezhañ an dudenn-mañ. Memes ma zeblant bezañ tost tudenn Bob deus tudennoù e filmoù kentañ eo dirc'hortoz bepred., ha padal ken tost deus ar wirionezh. Gwellet e vez mat eo awenet Albert gant e buhez : Bob a zo bet skarzhet eus ar skol vamm, dres evel Albert Dupontel pa oa 4 bloaz (evit Gwir).

Memes ma ne blijo ket ar film-mañ d'an holl (Re bounner awechoù ?Re gortozet?) eo ret forz penaos kaout doujañs d'un den a zo bet skarzet deus ar skol vamm !

#9 mois ferme #film #critique #laouen

[arrouemezv]

Matangi

Notenn 4,5/5

Mathangi a zo anv un doueez hindou, hag anv gwir M.I.A. Kroget he deus he buhez e Sri lanka. Ur brezel diabarzh, disparc'hourien Tamoul (evel he zad), bombezennoù, taolioù mitrailhezenn o treuziñ ur prenestr er skol, dilojañ e bro india, dont en dro : setu bugaleaj M.I.A. Erruet e Londres pa oa 11 bloaz, ne gomze ket ger saozneg ebet. An dra se a ranker gouzout a-benn komprenn mat he oberenn.

Goude Arular, Kala, M.A.Y.A e teu er meaz Matangi. Kenderc'hel a ra da adnevesaat he sonerez hep disoñjal he style dezhi. Anavezet e vez mat he zoare d'ober goap diwarbenn an holl. Seblantout a ra lod eus he c'hanaouennoù treiñ war zu an dance didalvoudus ha dister. Met n'eo ket e giz 'se ar ganerez, buhan e cheñch al lusk. Meur a wech e cheñch stumm ar ganaouenn. Gellout a ra kregiñ doare raggae, dont da Electro-Dance, hep disoñjal livioù hengounel doare Indian.

N'e c'heller ket lavaret eo eas da gompren ar c'homzoù :

"Played in the park Packed with piranhas I jump in puddle Singing NIRVANA" - Double Bubble Trouble

Impljout a ra skeudennoù, liammoù iskis etre temoù piz a ranker anavezout. Liammoù gant sujedoù Sokial ha politikel alies mat. Ur meskaj etre daou ved eo pep kanaouenn. He bro, he sevenadur hag e istor feulz ha kallet (Sri lanka) hag ur bed all ( an hini emaomp o vevañ ennañ : Pinvidigezh, kizh, internet... Lakaat a ra an daou bed 'se da skeiñ an eil ouzh egile. Meskaj Dreist. Trement a ra deus istorioù karantez boutin ha dister da istorioù arc'hant ha brezel, pe istorioù repuidi politikel. Er ganaouenn ATENTion e c'hoari gant ar ger "Tent" e-pad ar ganaouenn a-bez (liammet gant buhez ar repuidi)

Ur rebech : Kanaouennoù evel Exodus (adkemeret div wech er memes pladenn) a vefe bet talvoudusoc'h gant muioc'h a lusk hag a souezadennoù, evit ma klotfe muioc'h gant ar c'homzoù.

Kenderc'hel a ra M.I.A da soueziñ arc'hanomp ha d'ober goap diouz ar sonerezh "a-galite" boutin. Ober a ra he sonerez ar bobl, gounit a ra arc'hant gantañ hag he ro daoust da se ur stêr talvoudus ha leun a ijin da bep hini deus he c'hanaouennoù !

#mantangi #m.i.a #critique #music #laouen #sonerezh

[arrouemezv]

Smooth McGroove

Anavezout a reoc'h reolennoù ar c'hanañ en doare « acapella » ? Hag anavezout a reoc'h ar c'hoarioù video kentañ, ar re er mod 8bit gant ur sonerezh n'eus ket tu disoñjal met a blije kalz deomp pa c'hoariemp ?

Soñjit 'ta, m'o peus c'hoant selaou anezho adarre o po tro d'enober a-drugarez da Smooth McGroove, kaner « acapella » sonerezhioù pennañ ar c'hoarioù video anavezetañ. Gantañ e vez enrollet meur a son disheñvel ha da c'houde lakaet anezho asambles dre e urzhiataerezh evit sevel sonerezh a-bezh ar c'hoari. E videoioù a zo savet gant meur a garrezig e-lec'h m'en em diskouez o kanañ hag unan brasoc'h e-lec'h ma weller ar c'hoari e-unan (gant Smooth o c'hoari). Alies-mat e tap ar c'haner ampart-mañ e c'hazh gantañ hag e lak anzhañ da zañsal dirak ar c'hamera pa n'en deus son ebet d'ober (Charl eo anv ar c'hazh).

Kroget en deus Smooth d'ober seurt sonerezh e Kerzu 2012 hag eo deuet da vezañ e micher. Muioc'h eget 600 000 den koumanantet d'e chadenn en deus hag en deus gounezet un nebeut prizioù er Stadoù-Unanet evit e arz.

Ma blij deoc'h ar c'hoarioù video kentañ hag an doare kanañ acapella kit diouzhtu war chadenn YouTube Smooth McGroove ! : http://www.youtube.com/user/SmoothMcGroove/featured

Bet skrivet gant Ar C'hazh Mallow

#music #youtube #acapella #web #sonerezh

[arrouemezv]

That 70's show

Notenn : 5/5

That 70's show a zo un heuliad bet kroget e 1998 hag echuet e 2006. Padout a ra peb abadenn 22 vinutenn. En heuliad mañ e vez gwellet buhez ur strollad krenarded e fin ar bloavezhioù 70. Eric ur paotr diasur ha lentig, Donna mignonez Eric, femisistez anezhi, Kelso, ganet e fin ar sizhun (c'hoariet gant Ashton Kutsher), Hyde, ur paotr goapaus, a-enep d'ar gevredigezh, Jackie, ur plarc'h vrav, pinvidig hag egasus-tre (c'hoariet gant Mila Kunis e deroù he vicher aktourez).

Ne c'heller ket lavaret e c'hoarvez traoù dreist ordinal d'ar c'henarded-mañ, met an doare ma vez diskouezet an darvoudoù a zo farsus-tre, gant ur sell kritik alies mat diwar benn kudennoù sokial ar bloavezhioù 70 (Meneget e vez alies mat brezel korea, pe an dizingaldegoù sokial etre paotred ha merc'hed pe c'hoazh an embroiñ). An dra-se sillet en un doare sutil, primha berr kuit da vezañ pouner.

Ur bern ijin a zo gant an doare da filmañ : Gwellet e vez soñjoù an dud, pe an doare da wellet ar bed goude bezañ bet eat butun drol ganto, ha traoù all, a laoskan arc'hanoc'h da wellet drezoc'h oc'h unan !

Plijout a ra deoc'h an traoù Kitsch leun a eil derez ? Dreist ! Great eo an heuliad-mañ evidoc'h !

Skrivet gant Laouen

#that 70s show #series #critique #Laouen #heuliadoutele

[arrouemezv]

Deviant ART

DA a zo ul lec'hienn (anvet ivez "plateforme" e geriaoueg ar rouedad) e-lec'h ma c'hell tud o deus c'hoant bezañ anavezet e endro an tresañ pe ar poltrediñ kas o krouadurioù. Tu 'zo lavaret eo ec'hon, frank-kenañ al lec'hienn hag aes da implijout : div varenn evit ober enklaskoù, e traoñ ar bajenn e vez kinniget an oberennoù nevesañ ha war peurest ar bajenn emañ a-bep-seurt reoù all bet posted ha kinngiet en un doare degouezhus da vat.

Pep arzour en deus e bajenn dezhañ, hag ez eus tu d'ar re a zo en em enskrivet koazeal hag eskemm asambles ; pe c'hoazh reiñ o ali war oberenn-mañ oberenn bet postet. n'eus ket ken pell 'zo eo bet ouzhpennet un dibab evit gellet pellgargañ an oberennoù a blij deomp. peotramant ez eus tu ivez derc'hel an oberenn en ul lakaat ar skeudenn el lodenn "muiañ-karet".

Siwazh eo ret lavaret ez eus danvez-arzourien n'int ket ken barrek eget lod all, pe tud all a implij DA e-giz ma vefe ul lec'hienn evit lakaat an dud da welet ar pezh o deus graet e-pad o vakañsoù...

http://www.deviantart.com/

Skrivet gant Ar C'hazh Mallow

#art #Web

[arrouemezv]

Wasabi, ur c'holl amzer ken spontus ha titl ar film

Ur film azeulet, pe dost ? Ur film milvrudet ? Ya, gouzout a ran, met n'eo ket en abeg da se e kavin ar film-mañ plijus, pe e lavarin eo ur bennoberenn... Er c'hontrol...

Pa 'zo ur mank a vuhez gant Jean Reno, penaos enebiñ ouzh an enoe ? Kavout a ra an aktour hir e amzer, sur a-walc'h. 'Mod all ne vefe ket o lenn e destenn en ur mod dilusk hag o tisoñjal evit petra eo bet paeet : c'hoari e roll.

Ar film-mañ n'eo nemet un digarez evit meur a dra : 1) strollañ tri aktour brudet 2) c'hoari e Bro-Japan 3) implijout ur fent aliesoc'h droch eget farsus ( ken gortozet ma seblant a-wechoù e vez lavaret d'an arvesterien : « Diwallit, 'benn nebeut emaoc'h o vont da c'hoarzhin ! » ).

Gant an titl e vez gwelet c'hoant Krawczyk ober war an dibar, met 'benn ar fin eo un abeg all evit sevel un arvest farsus meurbet, sañset, ( c'hoarzhin a ran c'hoazh... ) ha na vo ket donaet goude.

Ur film brudet ? Gwir eo ? Neuze e roan ma ali : ken null eo ma ne gomprenan ket perak eo ken dedennet tud 'zo gantañ. M'ho peus c'hoant sellet ouzh ur film dreist ha tremen ur mare plijus, n'eo ket ret deoc'h dispign ac'hant, amprestiñ pe pellgargañ ar pezh mell farsadenn-mañ.

Skrivet gant : O'Lantern

#filmoù #critique #film

[arrouemezv]

The Shaggs

Notenn : 5/5

Pa oa bugel an Ao. Wigging e voe lennet gant e vamm en e zorn en efe eñ ur wreg meleganez hag a varvfe araok ganedigez daou vab hag e gemerfe perzh e verc'hed en ur strollad sonerezh brudet. Goude ma vefe bet sevenet an daou ziougan kentañ e vroudas an tad e verc'hed da gas da benn en trede ziougan. Setu ma voe krouet ar strollad sonerezh "The shaggs" (Anv un doare da fichañ blev ar chas diouzh ar c'hiz tre er bloavezhioù 60) e 1968. Ur bladenn a zo bet enrollet ganto "The philosophy of the world". Ur benn oberenn a ne gavas ket daoust da 'se e begement a gouc'hemenoù, rak re abred int erruet sur a-walac'h.

Levezonet 'n eus ar strollad-mañ sonerien brudet evel Frank Zappa, pe Curt Cobain. Adkemeret eo bet ivez kanaouennoù dreist "The Philosophy Of The World" er bladenn "Better Than The Beatles : A Tribute To The Shaggs".

E 2006 e varvas ar sonerez taoserezh.

Skrivet gant Laouen

#the shaggs #the philosophy of the world #better than the beatles #Laouen #tribute #sonerezh

[arrouemezv]

Spike Island

Notenn : 5/5

Manchester, 1990, pemp krenard sot gant strollad karetañ breizh veur ar mare: The Stone Roses. Seblantout a ra bezañ simpl steñv ar film, sevenet gant Mat Whitecross. Daoust da 'se n'eo ket ar film-se istor pemp krenard o riboulad a-hed an amser, ho heuliañ ar gêr stur sot ken implijet an deiz a hiziv er filmoù : "Y.O.L.O" (You Only Live Once evit ar re warlerc'hiet ha ne anavezont ket ;-) ). Tamm ebet ! Tudennoù Spike Island a zo skoet gant krizder ar vuhez (filmet mat-tre gant ar film aozour). N'eo ket gwall vrav ar vuhez evito (kudennoù familh,...) met ur pal o deus : Mont da sonadeg ar Stone Roses e Spike Island. Darvoudoù trist, ha farsus a zigouezo dezho, an holl anezho filmet brav-tre, skeudennoù a-feson a vil vern. Ouzhpenn da 'se eo lusket an istor gant sonerez a-galite ar strollad a vez komzet outo e-kerzh ar film : The Stone Roses. Ne c'hellfe ket klotaat gwelloc'h ar sonerezh gant darvoudoù ar film. Penaos treiñ ur son d'ur skeudenn ? Mat Whitecross, ar film aozour, a responto deoc'h. Deuet eo a-benn da reiñ ene pep kanaouen da santimantoù (laouen pe drist) an tudennoù. Ul liamm ken anat etre ar sonerezh hag ar skeudenn.

Ouzhpenn da 'se eo dreist an aktourien yaouank hag e za mat-tre dezho al look total adidas, ken "in" er mare-mañ !

Ma vezoc'h tik gant ar Stone Roses eo red deoc'h sellet ouzh ar film-mañ. Ur benn oberenn !

Skrivet gant Laouen.

#spike island the film #film #laouen

[arrouemezv]

SPELLBLAST

Ur strollad power metal Italian levezonet un tammig gant ar folk metal eo Spellblast, bet krouet en 1999. Ennañ ez eus Daniele Scavoni o kanañ, Luca Arzuffi o seniñ ar gitar, Xavier Rota o seniñ ar gitar-boud ha Michele Olmi o seniñ an tempourezhioù. O bladenn gentañ ( Horns of Silence ) a zo bet embannet e 2006, da lavaret eo 7 bloaz goude krouidigezh ar strollad ; a-raok n'o doa nemet sonet e sonadegoù. An hini he deus lakaet anezho da vezañ anavezet ha da embann o bladenn a zo ar BloodStock06 English Festival. O eil pladenn, Battlecry a zo bet embannet e Ebrel 2010, lusketoc'h hervez ar burutellerien, met a blij kement d'an dud eget ar c'hentañ hini, da lavaret eo kalz.

An daou dra o deus sikouret ar strollad da vezañ merzhet a zo o sonerezh hag ar fed o defe bet sikour digant kanerien strolladoù brudetoc'h all. O sonerezh peogwir n'eo ket tamm ebet e-giz ar pezh a vez sonet gant ar strolladoù all : pa sonont, e santer mat-kenañ ar santadurioù a vez klasket treuzkas, hag biken n'eo trist pe fuloret o sonerezh, na kounaret ! Bewech eo ur sonerezh laouen-tre ha gant energiezh forzh pegement, ar pezh en deus hoalet ar selaouerien holl anezho. O son a zo gantañ ur personelezh ispisial dezhañ a-drugarez da meskaj ar folk hag ar power metal, met ivez sonioù a zo tost a-walc'h eus an epic music (gwelet va bennad kentañ) anvet Heavy-epic metal en aergelc'h-mañ.

Savet eo bet gant Spellblast ur video sonerezh hepken : Ragnarok, Dream of the End. Emañ er mare-mañ ar strollad oc'h aozañ o trede pladenn ha sañset ne tlefe ket tardañ da zont-maez.

Neuze ma 'z oc'h plijet gant o sonerezh pe m'ho peus c'hoant dizoloeiñ ur stil sonerezh pe ur strollad nevez,arabat kaout aon da vont da selaou anezho war YouTube pe war o lec'hienn : http://www.spellblast.com/site/

Skrivet gant Ar C'hazh Mallow

#musique #metal #sonerezh

[arrouemezv]

"The sea" - Corine Bailey Rae

Notenn : 5/5

Eil pladenn studio Corinne Bailey Rae eo “The sea”, deuet er maez e 2010. Tapet he devoa brud ar ganerez gant “Like a star" ha "Put your records on" e 2006. Kanaouennoù plijus (met a chome simpl padal) hag o devoa graet berzh e Europa hag er stadoù unanet. Met setu ma varvas he gwaz, ur c’hoarier saxofon skosad, e 2008 abalamour d’ar struj ha d’an alkol. An dra ‘se a lakaas un troc’h en he vicher kanerez. chom a reas 2 vloavezh hep kannañ. E 2010 padal e krogas en dro gant e labour. Ur styl nevez ganti, merket sur a-walac’h gant marv e gwaz. Ur meskad santimantoù : melkoni, tristidigezh, disfi met levenez ivez. Dont a ra a-benn da sillañ ennomp e santimantoú donnañ. Etre Jazz, Soul ha rock e chom, ar pezh a ra ur meskaj eus ar re wellañ. Ar pozhioù, leun a varzhoniez ha kevrinus, a glot mat-tre gant ton pep kanaouen. Ar bladenn a-bez a zo lusket gant ar memes atmosferenn hep ma vefe heñvel pep kanaouenn. "Are You Here" kannaouenn kentañ ar bladenn (ha martreze an hini vravañ) a spluj arc’hanomp diouzhtu e santimantoù don ha dizisplegap. Reoù all evel "The Blackest Lily" a ro energiez ha levenez deomp.

♪ "I Would Like To Call It Beauty"

Tu ‘zo gwellet ar bladenn mañ evel ur gwir oberenn, da selaou ma blij deoc’h ar varzoniezh !

Skrivet gant Laouen.

#musique #corinne bailey rae #the sea #sonerezh

[arrouemezv]

Kronikoù Yenerezh-Uhel*

Thirrin, Priñsez ar Skornegoù eo romant kentañ un heuliad levrioù bet skrivet gant Stuart Hill. Evit ar poent eo bet embannet an daou levr kentañ en heuliadenn hag emañ an trede hini o vezañ skrivet. Thirrin a zo al levr kentañ bet skrivet gant ar skrivagner ha n'eo ket gwall anavezet met plijet en deus kalz da lodenn-vrasañ al lennerien, kement en deus divizet Stuart Hill tardañ gant e labour evit bevañ gant ar skrivañ.

Al levr kentañ a c'hoarvez en ur bed faltaziek bet ijinet gant S.H. hag a denn kalz d'an henamzer da vare an impalaeriezh Roman pa oa en he mare galloudusañ. Thirrin a zo merc'h nemeti roue Carmin hag hêrez ar rouantelezh Yenerezh-Uhel e Norzh ar c'hevandir, e-tal bevenn impalaeriezh Polypont. Koulskoude memes ma 'z eus kalz a c'halloud gant impalaeriezh Polypont, e tiviz ar jeneral Scipio Bellorum aloubiñ ar rouantelezh Nordek vihan hag e varvo tad Thirrin en emgannoù evit difenn Yenerezh-Uhel hag he familhoù. Neuze e vo ret d'ar plac'h yaouank difenn ar rouantelezh a-bezh a-enep an impalaeriezh. Evit en ober e c'houlenno sikour gant an holl bobloù a vev muioc'h c'hoazh en Norzh egeti : pobl gouez an dud-vleiz, hini kriz ar sunerien-gwad hag hini dianavezet louparded an erc'h. Sikour ar galloudoù burzhudus he do ivez a-drugarez da Oskan Mab-sorserez, ur sorser yaouank o vevañ e koadoù ar rouantelezh.

Ur romant plijus, leun a nerzh ha skrivet mat eo Kronikoù Yenerezh-Uhel, gant ul live yezh dereat ha fraezh. Ar faltazi a zo unan eus temoù pennañ al levr met pa lenner anezhañ e santer ivez pouez an Istor hag ar sevenadurioù nordek ha kelt, met ivez reoù roman. Ul levr evit ar grennarded yaouank eo dreist-holl met pa lenner Kronikoù Yenerezh-Uhel aketus e kaver ivez kudennadurioù sokiologel, etikel ha prederouriezh ivez.

*Haute-Froidurie e galleg

Skrivet gant Ar C'hazh Mallow

#fantasy #levriou

[arrouemezv]

PV Nova pe Penaos cheñch sell an dud diwar-benn ar sonerezh

Lunedoù-heol liesliv war ar fri, ur vouezh sklaer ha mailhoniezh direndael, setu gant petra eo graet PV Nova. Kaner, sonaozour ha soner Pop ha Rock. Gouest eo da c'hoari gitar ha gitar-boud, ukulélé ha touchennaoueg ( piano ha synthétiseur ), taboulinoù ha trompilh... Berr-ha-berr, posupl 'vefe lavarout eo, eñ e-unañ, ur strollad sonerezh en e bezh. Ezel eo, memestra, eus ur strollad, The Mammy Novas, met ne skrivimp nemetken diwar-benn daou dra : ar pezh a vez graet gantañ en un doare solo, hag e remix diwezhañ, priziet gant ur bern tud.

War e chadenn YouTube (http://www.youtube.com/user/pvnova) e ra PV Nova, Paul-Victor Vettes deus e wir anv, studioù diwar-benn rummadoù sonerezh liesseurt : an "Hip-Hop atomikel", an RnB gall, ar Rock hag an "Dark Heavy Trash Grind Core", pe c'hoazh sonerezh ar c'hoarioù-video ! Ur mod da ginnig e savboent en un doare fentus ha sirius war ar memes tro.

Sevel a ra kanouennoù, evel GO ha My Pride, met adkemeret eo bet ivez gantañ krouidigezhioù arzourien all, evel Umbrella, eus Rihanna, We Are The People, ezel eus ar strollad sonerezh Empire of the Sun pe The Look, tennet eus pladenn The English Riviera, savet gant Metronomy. Hag, un nebeud mizioù 'zo, sonerezh milvrudet Daft Punk : Get Lucky.

Adkanañ anezhin ? Graet eo bet gant tud all dija ! E plas en deus adsavet urzh kronologel istor ar sonerezh en ur remix. An disoc'h ? Dis-par ! Ken brudet eo deuet da vezañ evel m'en deus skrivet LeFiagro.fr en ur pennad diwar e penn ! (http://www.lefigaro.fr/musique/2013/06/20/03006-20130620ARTFIG00454-daft-punk-voyage-dans-le-temps-avec-pv-nova.php)

A-benn kenveriañ an div, setu liamm sonerezh Daft Punk (http://www.youtube.com/watch?v=5NV6Rdv1a3I) hag hini PV Nova (http://www.youtube.com/watch?v=t4z66VzcvO0), ur c'haner a-vremañ.

O' Lantern.

#WEB #youtube #video #musique #sonerezh